المساعد الشخصي الرقمي

مشاهدة النسخة كاملة : لهجة اهل الرياض ...... لغير الناطقين بها



التاريــــــــخ
19 -07- 2003, 12:27 AM
لهجة اهل الرياض ...... لغير الناطقين بها


اتركم مع حتسينا :-

تسذا .. المعنى واضح يعني كذا ولازم تقولها وانت ماد براطمك لتحت

فيذا .. يعني فيذا . هنا . " حط العشا فيذا " يعني هنا

مير .. هذي مالها معنا بس تستخدم أحيانا بمعنى ثم واحيانا بمنى لكن ....

غديه او غديها .. يعني كوده او كودها ... (( يعني بيفهمون الثانيه )) ,,,,,,,,, مثل ما يقول الابو لولده التسبير " رح ادرس كود اخوانك يغارون منك ويذاكرون " او رح ادرس غديك تنجح باتسر وتطلع دختور ...

صزز .. يعني صدق والا صززيه يعني صدقيه

زلابه .. يعني بطه مالها معنى ثاني

دبووووج .... هذي شينه يعين اذا واحد قالها لك تراه يسبك اقرب شئ له كمخه

دلخ .. انظر اعلاه

ء ء .. وتطلع من الحلق مثل اذا جيتا لبزر وقلت له عطني الكوره بيقول لك " ءء " وبيرفع خشته فوووووق وهو يقولها ... معناها منيب او لا

هزع .. يعني طمن او انزل شوي ,,, اللي تبي

منهو .. افصلها لكلمتين وتعرف معناها

مهوب او مهيب.. بالعربي ( ليس ) مثل " هذا التفتر مهوب لتس يانوير هذا التفتر لاختس دليّل "

هقوتي .. يعني ( اظن ) مثل " هقوتي انه فيذا

توحي .. معناها تسمع ,,, اذا جيته تسلم على شايبن من شيابكم تهزع على راسه وتقوله مساك الله بالخير بيقول لك وشوووو ,, بتقول له انت توحي (( في وسط اذنه عشان يسمعك ) وبيقول لك من انت ولده ... الخ "

كتر .. ويقول الوا! حد لاخوه وهم يتغدون من صحن واحد " لا تاكل من كتري يعني لا تاكل من نفس المكان اللي اكل منه "

جغمه .. يعني جغمه !! مثال : صديقك راح الدكان وشرا ببسي واحد وقعد يشربه لحاله وانت عيونك شوي وتناتق تقوله ياااخي عطني جغمه ( اعتقد فهمتوها )

بصرك .. يعني بكيفك .... تقول لواحد تعال معنا ... ويقول لك لا منيب جاي ,, ترد عليه " بصرك

بعدي .. يعني مثلا يقول الابو لولده ,,, بعدي ابوي . بس مدري وشلون تنشرح المهم معناه زين مهوب شين

امصع .. يعني اسحب بقووووووه مثل الام اذا قالت لولدها تراني بمصع اذنك لو ما درست

امحق .. هذي والله نشبه ما ادري وشلون اشرحها لكن ابحاول اعطيكم مثل اللي بيفهم زين واللي مهوب فاهم احسن يعني حبكت الا يفهم هذي . المثل : الابو يقول لولده ترااا باتسر ابيك توديني لزواج قصرانا يرد والد ويقول والله اسمحلي انا مواعد ربعي في الاستراحه عاد الابو يقول امحق من ولد عاد يرد الولد اقول خلاص نيتل

يدربي .. يعني يدحرج .. مثل المسترخي يدربي راسه

كنادر .. تكرمون جزمه

زبيريه .. نوع من النعال تكرمون وهو احسن مبيد للصوارير والضواطير ! والحشرات الزاحفه الاخرى

سرسري .... يعني سربوت سربوت ........ يعني داشر داشر ,,,,,,, يعني صايع في الشوارع وهو اسهل واحد يطيح في التتن تتن ......... دخان

برندا .. ميراندا,, لان اول واحد قالها في الرياض كان مزكم وقال براندا

محلي .. مصدي

يا خزياه .... اكثر من يقولها العجز الله يخليهم لنا ولا يحرمنا من حتسيهم يعني انها استحت

سواني .. رح للجنادريه وانت تعرف وشي ,, ترا مهيب السوق

سماط .. ماله داعي تروح للجنادريه , رح لاقرب محل مواعين وقل عطني سماط ,,,,, مفرش ناكل عليه ومنول نسميه سفره

ملاس. ..ملعقه كبيره مخفسه ننتسب بها الغدا

مراصيع .. قطرت سعبواتي ، اسالو الحريم ويعلمونكم عنه تراها تنوكل

صبيب.. .انظر اعلاه ,,, هو نفسه بس بطريقه ثانيه

ترم ترم.. فلم كرتون نسميه منول ترم ترم وبعض البزران يسميه ابو تتنه (! ( اللهم لك الحمد )) وغيرهم يسميه ابوذنب (( ياربي لك الحمد )) وعيال النعمه يسمونه النمر الوردي وهو اصلا بنك بانثر

قاف .. منطقه غير معروفه احتارو فيها اكبر علماء الجغرافيا والتاريخ والفلك والاثار في تحديد مكانها ودايمن تقول الام لولدها اذا ازعجاها " رح في قاف "

عوافي الله .. هذي الكلمه عقدت كل البزران دايمن تستخدمها الامهات لتخويف البزران اذا بغو يطلعون للشارع بالليل وتقول ترا بتجيك عوافي الله

تحيـــاتي

منقول والله منقول تمرين:

أبوسامي
19 -07- 2003, 01:10 AM
أقول: يا تاريخنا ....


شكلك قد شايمت ...
واحد شايم زيك .. بعد مارجع عوج لسانه وجا يقوللي : وش سبلك انت .. وينك فيذا ..؟؟

افتكرت انه يسب .. صفقتوه .. بعدها قال هتشبحوا مالك عليه سيدي .. ؟

المشكله انه كان ناشر يعلف لمثيره حق عمه !!!!

الله يعين.

سلفر
19 -07- 2003, 01:56 AM
اخوي النمرود هاذا (التاريخ) يعرف كل شي وليش عاد اسمه التاريخ مو الجغرافيااااا

بس والله من جد شكله قد شايم بس ميمن ههههههههههههه قصدي خلف العمود هههههههههههههههه

التاريخ ما قصرت جبتها والله جابها انا ناوي اصيف ها السنه في ذيك البلاد وابي شويه لغه بس الله يخارجنا لا اصك بكلمه من هناء والا من هناء واروح في خبر كان

الحين صار معي مرجع اقدر استند عليه اول .... ودمتم

صمت الأجراس
19 -07- 2003, 02:10 AM
هلا

التاريخ

أقووووووووووووووووووووووووول

لا تعليق

دمت لنا

التاريــــــــخ
19 -07- 2003, 02:16 AM
نمرودنا المحبوب


طيب زماني كله ميمن ماهو فيها لقد شايمتو قليل

:D :D :D

التاريــــــــخ
19 -07- 2003, 02:19 AM
سلفر الغالي

مكانتها ضحك الله لايحرمني من طيبتك ياشيخ

ولقديك في ذيك البلاد تصلبي وما يهمك تمرين:

التاريــــــــخ
19 -07- 2003, 02:24 AM
أخي صمت الأجراس


شعرت بما تريد قوله من صمتك ياصمت

السهلي
19 -07- 2003, 07:17 AM
أنا متأكد انك قد شايمته
وقل للي شيشايم يقرأ هذه المشاركة

التاريــــــــخ
21 -10- 2003, 09:39 PM
ههههههههههههههههههههه

السهلي ولايهمك ...نسوي إعلان

تحايا عاطرة

رديمة
21 -10- 2003, 10:17 PM
ابتسامة:

يعطيك العافيه التاريخ على هذا المرجع

اختك في الله
امرديمه

التاريــــــــخ
13 -11- 2003, 04:38 AM
الأخت رديمة شاكر مروك وتعقيبك

تحايا عاطرة

ابوايمن
13 -11- 2003, 08:09 AM
التاريخ

مشكور على التوضيح للهجات العاصمه وماحولها
اذا زرناهم قد عندنا ماينفعنا
اما العزيز النمرود ربنا يعطيه الصحه والعافيه تمرين:
فقد برع في لهجتنا المحليه
لكم اجمل التحايا

مجاهد اليامي
13 -11- 2003, 09:05 AM
تسلم يا تاريخنا على هذا القاموس المفيد وان متاكد انك قد شايمت

مزوام
13 -11- 2003, 06:22 PM
لالالالا امصبا قد شايم :D








بارك الله فيك ياتاريخ يقول المثل من تعلم لغة قوم أمن مكرهم اوكي:












تحايا عاترة :)

التاريــــــــخ
25 -11- 2003, 05:37 PM
الغالي ابو ايمن


اسعدني مرورك الكريم وتعقيبك الطيب


لك الحب والإخاء

أخوك ابوالحسن

التاريــــــــخ
25 -11- 2003, 05:52 PM
جحفان

مزوام

شاكر لكما مروركما وتعقيبكما


عيدكم مبارك

FAISAL
25 -11- 2003, 11:37 PM
السلام عليكم ورحمة الله وبركاته..

مصطلحات مفيدة للدارسين أمثالي في مدينة الرياض..غمزة: