لا تسأل عن ضيقة ايامي وقلبي لا تمره
ضاعت دروبك على آخر ليل وجروحي عطايب
وإن لمحت اسمي ترفّق به وبادله المبره
كثر مابادلك (شوق) وكثر ما ودّعك هايب
لك على يمة عروق القلب يالمغرور جره
ما تواريها السنين ولا تغيرها النوايب
والله إن قربك يسر الروح وفراقك مضره
وأنت علّة خافقي وأنت القريب من القرايب
ماقدرت أتوب عن ذكرك وعن حلوك ومره
ليه عن ذبح الغلا ياصاحبي مانته بتايب ؟؟؟
هاك ميزان الجروح وقيسها ذره بذره
ماوزنت إلا غلاك ولا طعنت إلا الحبايب
كل مايطري علـّي ظلمك تشب الكبد حره
كن في صدري رماح القوم وسيوف وحرايب
كيف أبنسى ليلة(ن) زعزعت قلبي من مقره
انفرت كبدي وخفـــاّقي غدا قبر ونصايب
هلت دموعي وحلّفتك بربك ألف مره
يابن آدم خف من الله ماورا ذبحي كسايب
أنت شخصٍ ماقدرت استوعبه خيره وشره
من عرفتك والدموع دمووووع والخفاق ذايب
لا تصدق كذبة الأيام في وجه المسره
بسمة(ن) في عين طفل ودمعة(ن) في عين شايب
وإن تذكرت الهنوف اللي على صوتك تشره
ضمها في صدرك الموحش وعرّضه الهبايب
انكسر حلم الليال وطاحت نجوم المجره
أبتدت شمس وتوارت شمس وجروحي عطايب
أنت ماتدري ولاعندك من الإحساس ذرّه
أشهد إن مصيبتى بك من عظيمات المصايب
