إفتح شبابيك الهوى جيتـك اليـوم
بإحساس من زود الوله عده يطير
جيتك مثل طفلن له أيـام محـروم
عن حضن أمه أبعدتـه المقاديـر
وجيتك مثل عودن له أيام مهمـوم
وده يلاقي بأخـر الوقـت تقديـر
وجيتك حضن عاشق وهايم ومغروم
وده يضمك لين تصبح على خيـر
متى تحس إن الهوى شي مقسـوم
من قسمة الخالق على خلقه يصير
ومتى تحس إني لك أطيـح وأقـوم
وأتعب على شانك وأقدرك وآغيـر
لي في هواك أحلام وأمال وعلـوم
وأحزاب وأصحاب وقصيد وجماهير
وهموم وأفكار وهواجيس وحلـوم
ودروب وأخطار وعذاب ومشاويـر
وحب وغلا وإخلاص ومعاند ولـوم
وإحساس وإلهام وشعور وتفاكيـر
وصحبة سهر ومقاطعة لذة النـوم
وأشواق جياشه وعشـق وتعابيـر
في ذمتك مابان لـك شـي مكتـوم
من بعد ماصورت الأوضاع تصوير
لاتحسب إنك شي عابـر ومعـدوم
وتاريخ حبك فاق كـل الأساطيـر
في كل شي أتخيلك وأسمعـك دوم
وأتأملك في الوقت الأول والآخيـر
من ماضي الأيـام لايومـك اليـوم
وغلاك عندي ماحصل فيه تغييـر
وأنا لك الله ماأقبل البيـع والسـوم
ولا أرضى علي ولاعليك المخاسير
لاْني الوحيد إللي على بحرك يعـوم
وإللي عرف مرساه في رحلة السير
لحظه حبيبي قبل يسبقنـي النـوم
بضم صدرك لين تصبح على خيـر
