[يالساهره طال فينا الليل واسهرتك
جعلي الموت لين الحين سهرانه..؟
نسيت نفسي بصوتك ثم تذكرتك..
وأنتي بعد ماعليك خلاف نسيانه!!
لاقلت أخليك قلتي :ليش أخرتك؟؟
خلك حبيبي معي من جد ولهانه..
وان قلت لك : زين خلصتي مذاكرتك؟؟
قلتي لي بليييز مالي خلق طفشانه..
الظاهر أن هذرتي زادت وكدرتك
أهلي يقولون أني بنت زنانه
قلت أهذري واملي عروقي بثرثرتك
هذا هو الموت نبرة بنت نعسانة..
تدرين؟..تدرين؟ ياما على نفسي تكاثرتك
ماكنت أبا اقول بس الحين خربانه..
ياحلوتي قبل أعرفك ماتصورتك
كنتي لي المستحيل بهيئة انسانه
حتى قبل مااعرفك بالبال حظرتك
ركزت ثم قلت:تؤتؤ لا لا تشبه فلانه
أحس من كثر ماحاولت جرجرتك
للواقع .. الله وهبني إياك سبحانه
كنتي سجينة خيال وجيت حررتك
وأصبحت أسيرك وصرتي اليوم سجانه
من قبل ترتيبك لما بعد بعثرتك
يالمترفه واشهد أنك صدق فسقانة
فيك المزايا من أولتك لآخرتك
ياأطول قصيرة وياأنحف بنت مليانة
في كل ذرة بجسمي قمت بعثرتك
لين أصبحت كل ذرة فيك هيمانة
شربتك البارحة فتنة وكثرتك
شوفي عروقي بحسنك كيف سكرانة؟
ألا تعالي متى تبدأ محاضرتك؟
طيب أخليك شكلك جد تعبانة..
