وآه ياجِدّه القهر والخوف عربد في الحنايا=يوم اشوفك في شِبر مويه بسرعه تغرقين
وآه ياجِدّه لِمرّه ثانيه تبكين والفقد الضّحايا=وتندبين البخت دايم من غياب مقصّرين
وآه ياجِدّه العدل تايه بدهليز الخطايا=من زمن جرحك يغور وصابره بس تنزفين
جِدّة غير.. إيه غير وهي توابيت المنايا=والجثث تنهار غَرقا والكبار مهيّصين
إنتي ياجِدّه عروسه طرحتك حسن النوايا=لكن الغادر هتَكها وعرّى وجهك ذا الأنين
والمطر كم قد سلب من قلبك الحاني برايا=والرّضا بمكتوب ربي ينبض بعرق الوتين
كم أحبّك مانسيت ايدك وهي تروي ظمايا=وانا أتربّى بحضنك طفله وانتي تكبرين
وكم صرخت بصوتي المبحوح في عمق الزوايا=يازمن عشقي لجِدّه له حكايا من سنين
في المرض والضيق والأحزان كم كانت شفايا=وفي الفرح ترقص تغنّي للكرام الحاضرين
تذكري ياغاليه وقت السفر ذيك الوصايا=وكيف بعدك في الصدر ياعاليه صحّى الحنين
وكيف ليلك بالسّهر سوّى بأشواقي سوايا=وكيف كنتي بالوفا ثم بالأمل لي تعزفين
والمواني آه يا ذيك المواني والمطايا=بالمواويل الحزينه نجرّها لك هايمين
وآه ياجِدّه الحبيبه كم تحمّلتي الرّزايا=والغوالي كلهم صاروا بقبرك ميّتين
لابسه ثوب الحداد ومن حدادك يا مُنايا=لمّا تكمل عدّتك يمكن بلحظه تفرحين
تفرحين؟! سخرية ذا العام تفضحها الخفايا=مالك إلا هالعزا الصادق ولازم تقبلين
/
/
/
وجدان
