كلام في قلبي اتعبني؟؟

كلام في قلبي اتعبني

بسم الله الرحمن الرحيم

السلام عليكم ورحمة الله وبركاته...وبعد
اخواني واخواتي احييكم جميعا واسف على ازعاجكم بما في قلبي..
السالفه هي انه كان عندي اخ يبلغ من العمر 22سنه(الله يرحمه ويتغمد روحه الجنه).وهو اصغر اخواني واحبهم واقربهم الى قلبي او بالأصح اقرب واحد للعائله كلها ومحبوب جدا من كل اقربائتا وجيراننا.ولكن قربه من امه كان فعلا غير عن كل الابناء كانت لاتنام الا وهو بجانبها رغم العتب عليها منا ومن والدي الا انها لاترضى ان تنام الاوهو بجانبها واذا شدينا عليها العتب وافقت بشرط ان ينام في الغرفه اللتي بجانبها.كانت تحبه بجنون حب غريب فعلا .لدرجة انها مهما غضبت من احد اياكان ومهما كان قوة الغضب كلمه واحده من اخي حسن(رحمه الله)تطفي كل نيرانها.والله لا ابالغ يااخوان لكن هذه هي الحقيقه..في يوم من الايام اخبرتني امي بانها تريدني ان اوصلها لأقارب لنا على مسافة نصف ساعه من بيتنا.فقلت لها طيب بس مو الحين بعد الساعه 12ليلا وكان وقتها قبل رمضان بليله.وانا اتناقش معاها دخل اخي حسن وقال ياامي انا صراحه ابي اسافر مع اصحابي انا طفشان واجازه ومستلمين الرواتب ولا رحنا مكان.قالت الوالده روح ياولدي بشرط انك تكون مع صاحبك الفلاني.وهو اعز اصحابه بل اخوه بل اكثر.استغربت انا مره وقلت كيف ياامي تخلينه يروح كذا بكل بساطه وبعدين هم بيسافرون مكان بعيد 1300 كيلو.قالت اذا هو مع فلان خليه يروح وانت يالله روح خلص شغلك عشان توديني.المهم سحبت اخوي وقلتله ياحسن انت خبل وش عندك رايح للديره الفلانيه روح الشرقيه وتونس وبعدين يااخي شوف حوادث السبارات دمرت الناس. قال يااخي امي وافقت لاتعقدها انت انا مسافر وخلاص. حاولت لكن بدون فائده.المهم اني خلصت شغلي ورحت البيت اخذت الوالده ورحنا لمشوارنا وفي الطريق دق علينا اخوي وقال احنا نبعد عن الرياض 300كيلو.قلتله طيب وانا خوك لاتسرع وانتبهوا من الملاحيس اللي في هالخطوط.سحبت الوالده الجوال وقالت شوف ابغاك توعدني قاطعها وقال برضو انتي ابغاك توعديني قالت بأيش اوعدك قال لا انتي قولي اول.قالت توعدني انك ماتسوق لارايح ولا جاي.قال خلاص اوعدك.وانتي اوعديني انك تكوني دايما راضيه عني.قالت انا راضيه عنك.وقفل.وخلصنا من مشوارنا وحنا راجعين فجأه قالت انا مين قاللي اخليه يسافر وقاعده طول الطريق تتحسف وندمانه على موافقتها والله كأنها انسانه ثانيه غير اللي كانت قبل شوي.يأمي خلاص تعوذي من الشيطان الولد مشي نصف المسافه.ماردت علي وطول الطريق ساكته.حتى انفاسها كانت قويه وصلنا وهي ساكته ونزلت وخلت بعض اغراضها في السياره وكانت في حالة هستيريا صامته ودخلنا البيت ورحت انا لغرفتي ابي انام.نرجع لاخوي واصحابه..بعد ماوصلو الى منتصف الطريق طبعا بحكم خبرتي بتلك المناطق.في تلك المنطقه يوجد أناس همج لدرجه فضيعه لدرجة انه ممكن يذبحك لو سبيته.المهم انهم لمن وصلوا لهذيك المنطقه وقفوا عند اشاره وقف جنبهم واحد ملحوس سهران له مادري كم يوم مانام معه هايلكس2009 اتوقع غماره.ونظره منه ونظره منهم وصار هياط وحدحده وعاد اخوي واخوياه صغار اكبرهم اخوي عمره توه داخل 22سنه وذاك له صولات وجولات في الحياه والسجون والمخدرات.وبدت المطارده اتوقع انه صار فيه سب ولعن بينهم.وطاردهم حتى خرجوا من المنطقه اللي هم فيها 40كيلو كان على بعد نص كيلو او اقل منهم.اخوي راكب قدام وخويه القريب ورا وخويهم الثالث يسوق.اتفقوا انهم يوقفون يشوفون وش سالفة ذا الملحوس.وقفوا عاليمين وجاك الخبل ماشي200 ومن قوة القهر اللي في قلبه ومن قوة المرض اللي في راسه ومن قوة الخراب اللي في مخه ومن قوة الجنون اللي عايشه ومن قوة النجاسه اللي في دمه جاك ناصيهم ويصدمهم من ورا!!!!يلعن ام المخدرات وش تسوي في البني ادم!!على طول مات واحد اللي هو صديق اخوي المقرب.واخوي انتها مره بس مامات وقتها والثالث اللي هو السواق ماجاه شي بس في حالة صدمه نفسيه وسواق الهايلكس جته اصابات بس مامات القطو.على حسب تقرير الحوادث انه بعد الله الايرباق هو اللي نجاه.المهم كان الحادث على الفجريه تقريبا الساعه سته الصبح اسعفوهم ودوهم مستشفى خايس كان قريب منهم.نرجع للبيت.دق علي اخوي الثاني الصبح قاللي قوم اخوي حسن سوا حادث على طول شغلنا السياره ومرينا ابو خوي اخوي اللي مات ومسكنا الخط اول ماوصلنا المستشفى عرف ابو الميت بوفاة ولده انهار على طول شفناه في الثلاجه وحاولت اهديه ماقدرت خليته في صالة الانتظار وطلعت شفت اخوي في العنايه المركزه.قال الدكتور ترا اخوك حالته مره صعبه حولوه للرياض.مسحت دموعي ورحت ابي اتطمن على الملحوس.والله يااخوان انهم سووله عمليه وهو صاحي ماتبنج من قوة اللي في راسه من حبوب.ويطالع فيني ويبتسم ويقول ماتشوفون شر.ويمسكني اخوه على طول ويطلعني برا ويقوللي ترا اخوي غلطان ميه في الميه كان ماشي 200 واخوياك كانو واقفين عالخط ويوم شطفهم انفقع الكفر الامامي وصدمهم من ورا!!!!!.وتراه غلطان ميه في الميه وقاعد يكررها اكثر من خمس مرات.انا عرفت بعدين عن الحادث.تركنا واحد من اخواني في المستشفى وحولناه اخلاء طبي للرياض وبعد يومين؟؟؟مااااااااات؟؟؟!!!.والله لايوريكم مكروه.كانت اخس ايام واتعس ليالي مرينا فيها.كلنا عانينا وتألمنا الوالد دخل في حاله هستيريه لمدة ساعه.اما الوالده؟؟؟كان الله في عونها كانت كأنها في حلم كانت تسوي اشياء غريبه وتتكلم كلام غريب ولكن الله هو اللي صبرها كيف؟الله اعلم...بعد اسبوع تنازل والد المتوفى الاول وبعد شهرين او اقل تقريبا جو أهل الملحوس قعدوا مع الوالد وتنازل الوالد بدون ان يعرف حيثيات الحادث.يمكن قوة ايمانه بالقضاء والقدر خلته يتنازل يمكن يبغا الاجر ويمكن مايبغا الناس يقولون انه اخذ بدل لولده.مادري ليش تنازل..المهم ان الوالده تعبت مره نفسيتها وكل يوم نوديها المستشفى ومن قوة الالم اللي عاشته قررت تطلع من البيت وتروح عند امها ماعاد تعرف كيف تعيش من غير حسن(الله يرحمه ويغمد روحه الجنه)لماقلت للوالد عن الحادث ما اقتنع ولما اقتنع وتغبر رأيه وقال انه بيسوي دعوى ومعامله وكلام كثير الزبده انه يوصل للمجرم الحقيقي في الحادث ويوصل للسلطات اللي طلعته من المستشفى كأنه جاي يراجع وماشي ولا حتى مسائله لانهم كانو قبيله وحده وجماعه كلهم الديره كلها قبيله وحده؟؟؟لكن مابين تردد الناجي الوحيد وتغير اقواله وهروبه من المسائله وبعد المسافه اكتفى الوالد بالسكوت والدعاء على المتسبب بالحادث اذا كان متعمد...السؤال اللذي يطرح نفسه..
هل من حق الشرطه اطلاق سراح الملحوس قبل ان يتنازل والدا المجني عليهما؟؟
وهل يعتبر الملحوس قاتل بالعمد؟؟
وهل التنازل يجب ان يكون من المحكمه ام يكتفي به في مجلس البيت!!؟؟
واذا اردت اعادة القضيه اين اذهب؟؟
وهل اعيد القضيه ام اجعل الله حسيبه؟؟ونعم بالله هوحسبنا ونعم الوكيل.
اسأله كثيره تدور في رأسي؟؟؟؟؟؟؟؟؟؟وليس لها اجابات
اسف على الاطاله لكن كلام في قلبي ويعلم الله اني ارتحت الان لما اخرجته.
(هذه القصه لي وليست منقوله حدثت قبل ستة اشهر)
تحياتي للجميع..