ماني من اللي يرخص النفس لى ضاق

	ماني من اللي يرخص النفس لا ضاق ............ولانيب جاعل هافي الجد غالي سبحان ربي كرّم النفس بأخلاق ............الطيب عمي ومنبع الجود خالي تكبر علي العرقبه والتملاّق ............وتصغر بعيني كايدات الرجالي أمشي عزيز ٍ في صحيحات الأطراق ............ولا ميّلت سود الليالي عقالي وعما يريب النفس أثني على الساق ............ درب الطمانه ما وطتها نعالي أختار ربعي من نقيين الأعراق ............وإن ما لقيت أدله وحيد ٍ لحالي أعز نفسي عن عرضين الأشداق ............اللي لهم في كل مجلس صهالي أرفى خمال صويحبي كل ما عاق ............أدمح خطاه بوسع صدر الشمالي اللي يبيني يمه الروح تنساق ............واللي سلاني عنّه القلب سالي ما كل رجل ٍ بالرجاجيل ينطاق ............ورجل ٍ بلا ربع ٍ فلا له ظلالي ولا كنت بالمجلس على الهرج طفّاق ............أسمع وأشوف وكل شي ٍ طرالي أشري ثمين القيل وأغضي بالأرماق ............وأحشم هروجي لا انفتح لي مجالي وفنجال ذله ما شربته ولو راق ............لا خير في عز ٍ يجيبه اذلالي ولاني على صحون المعازيب سبّاق ............ولا أقلط على بارد ولو قل مالي أصبر على الشدة ولا نيب شلاّق ............جيبي إلى دارت عليّ الليالي وللسر في صدري ثمانين مغلاق ............إن ضاق في يمناي درته شمالي لا خير في هرج ٍ حمل فوق ما طاق ............ويا ما حلا قول ٍ تجيله افعالي ولاني على الغرات أومي بالاحداق ............أغض طرفي يا عنود الغزالي مالي ومال دروب تلعات الأعناق ............خليتهن لعيون حي ٍ صفالي وان ضاق صدري قمت سطرت الأوراق ............بأبيات شعر ٍ كل أبوهن جزالي أعرف موازين الشعر جل وادقاق ............وارتّب المعنى على شف بالي والشعر ما هو سلعة وسط الأسواق ............اللي يبيها قال يمي تعالي ولا هو حروف ٍ بالمجلات تنماق ............ولا هو كلام فلان راع المعالي ولا هوب سفط الهرج من كل الأرناق ............ولا كل شاعر علقوا له مدالي

الله عليك يافله
كل بيت اروع من الثاني

الف شكر لمرورك

العطر

اقتباس:

---

سبحان ربي كرّم النفس بأخلاق
............الطيب عمي ومنبع الجود خالي

---

ما أروع النقل هنا فلة .
وما أزكى ذائقتك الأدبية يا غالية .

موفقة بإذن الله ..

:thumb:

ياهلا فيك عيوني

عطرتي المتصفح

ودي