فلي حجاج الصمت لاصار معقود
ريبه وناجي من يناجيك بحساس
مليت تدويجت قدم تفهق النود
كني اتحاشا بالخلا نشدة الناس
من حب بوحك غصب تلقاه ملهود
ياصمتك اللي حط بي الف وسواس
انا دخيل عيون ورموش وخدود
حضرة جنابك انت ياعذب الانفاس
خلك معي دايم على طول موجود
مثل الخيال اللي حنى كل قرطاس
طفل الغلا باحضان همستك مولود
والا فغيرك لاتسيس ولا ساس
ياعذب بنات الكون يافتنة الخود
صممت لك فالقلب يابنت مجلاس
ياجوري احلامي وياريحة العود
تعوذي من كل شيطان خناس
تذهلني النظرات من خرسك السود
واصير في قربك كما البعد محتاس
اشرد من الفرقا ويملكني اشرود
فكري وانا اطالعك واقول لاباس
لاصرت بالافراح وياك موعود
تبقين في دنيا الجفا نور نبراس
لوكان باب الوصل والود موصود
اقرع بقلبك ياهوى البال اجراس
جيش الصبر يابنت لرضاك محشود
والقلب دارك والمعاليق حراس
