ليت الهوى يادنيتي ماسرابه=قلبي وأنا قبل الولع حيل مرتاح
أضحك وأسولف سالين من عذابه=والضلع من نار الهوى فيني ماصاح
الوقت يجري والبلا في زهابه=قيضن شديدن والفرح فيه مالاح
ماغير دنيا كلِّ أبوها صبابه=أشواق قلبن مالها سوق وأمراح
متراكماتن مثل بيض السحابه=والوبل فيها واقفن مابعد طاح
لاقلت زانت تبتديها حرابه=تقفي ولو ليلن بلا ضوِّي مصباح
الا على اللي علمهم ماتشابه=بيض النوايا والغلا فيه ماشاح
لو يقتضي فنّ الحكي من شبابه=يندم على وقتن مضى ليه ماباح
وانثر سحابك حول من هو مصابه=قسوة ضمى ما بادروها باالإصلاح
أرضن تشا فقها هتون السحابه=لا ربعت كلْها بساتين وأفراح
واللحن في صوتي وجر الربابه=يضرب على ثلجن من إسنين ماساح
أسقيه من حبر القلم باالكتابه=علّه إذا شاف القلم يكتب ألواح
هاذا وأنا اللي عايشن في صعابه =إن غاب طيفه ماتركني للإصباح
يسكن بأحلامي وكلي غرابه=كنّه شرى الأحلام ولا بها فاح
حلوه تواصيفه وكلّه مهابه=وقدّه كما قد الأصايل إذا ماح
كم ليلتن تقضي وأنا عند بابه=وأخشى ومفتاحه معي كل ِّ مفتاح
وأغير الموجه وأعين الغلابه=اللي مع ميل الهوى وين ماراح
هاذا وأنا اللي عايشن في كأبه=أسقي وأنا كلّي سكاكينِ ورماح
ولا هوْ بكيفي يالطيف الطبابه=أبعد وأنا دمعي مثل فرط مسباح
مابين دكات الزمن وإنقلابه=عفت الكتابه من دهاليز الجراح
هاذا شحيح الوقت لا حدِّ نابه=يكسر مفاتيح الصبر ،ظيمه إسلاح
ومادام لي منزل ولاهو بغابه=باسقي حمام الورق حبري إذا ناح
والعذر كان أبطيت هلّ الإجابه=كانت ظروف ، وخاطري مابعد زاح
