لا واللذي سوّاك ياكامل الزين=لاواللذي خبّاك وسط المحاره
لولن وغواصه مع البحر تمكين=صيّادها قلبي ولاقى دماره
حبك لزمني مثْل دم الشرايين=والشوق سوّاله بخدي أماره
من كثر دمعي تنشف العين وتلين=حتى على الخدين بين مساره
حبك وعشقك له عروقي مجانين=إجنون ضميانن من العشق ناره
زوّد بقلبي من حميم البراكين=حلو الكلام اللي يزود الحراره
أسقيك من نهرن يجيب البساتين=ولْك الحقوق إن كان قل إستعاره
يامنيتي يادنيتي ياهوى العين=لك ود باالخافق تعدى العباره
ياما على شانه هويت الميادين=وياما رواني حب وقت إحتضاره
والحين جاوقتن على ردة الدين=عطني همومك واعتبرني السفاره
إن كان لك ضيقن على لحظة البين=عدي الهبايب واعتبرها شطاره
العقل زينه والردى للرديين=شهب الوجيه إمسرِّجين الحماره
وإن كان لك شوقن وتخشى العذولين=خلّه بقلبك قد وصلني قراره
برسلك أشواقي مع شامه هاالحين=ولاّ العواذل ماتحيط الغباره
أشتاق لك شوق السما للمحبين=باالليل والقمرا تمدّا البحاره
واشتاقلك شوق المسا للبراهين=والشمس همّت بالغروب إستداره
كم مرتن عين الوله والحجاجين=تمشي مماشي للقلق والسهاره
وش لي بدنيا كان عنها تغيبين=أحسن أدوّر قبر واسكن عقاره
