ياليل علمها عن العشق ياليل
وعن الحبيب اللي يفارق حبيبه
عن نهدتن تلوي الظلوع المناحيل
وعن لهفة ن بين الحنايا عطيبه
مابين صدر ن لوعته الغرابيل
وبين الظروف وبين هذا نصيبه
ضاعت امانينا بوجه المقابيل
هذا ندب حظه وهذا رضيبه
استخلفت سود اليالي مداهيل
ورجم الفراق استوحش البين ذيبه
يالليل خل البهذله والتهاويل
واسأله عن حاجه لنفسه قريبه
قله حلت له في جفانا تعاليل
وإﻻ ضحك سنه وعينت نيبه
جمرالغضى وقد وكن المعاميل
حدب ن بكت راسن بدا فيه شيبه
الله من سرد العناء بالتفاصيل
يسقيك من سم المفارق غصيبه
لكن عسى تالي المحبه تساهيل
وكل ن على ماقيل ﻻزم يصيبه
أللي كتبه الله ضناك وتذاليل
والحمد ﻻ اللي كل خافي دريبه
يالليل قله اعشقه موت يالليل
وفرقاه والله في حياتي مصيبه
أنا دخيلك يالرموش المظاليل
قالو حياة الحب رغده رطيبه
قالو سمر فيه السوالف مواويل
تعزف على اوتار الشعور الخصيبه
ﻻ تجعلين الحب حد المصاقيل
وﻻ تدفعي شوقي لشوفك ضريبه
يابنت عشت الوقت ضحك وتماليل
وعايشت فيه الواضحه والمريبه
لكن على الله ياغموض المجاميل
يبقى وضوحي مصدر لكل هيبه
