ياما سهر طرف الغرام وحكالي
وياما هما دمع الفراق وبكيته
رغم إنها دنيا عدام وزوالي
إلا انت ماوالله فراقك هقيته
غايب جسد لاشك داخل خيالي
تبقى الذي ماغير قربك بغيته
يا التالي الأول ولافيه تاااالي
غيرك بقلبي والمعاليق بيته
مهما عمر قصر الغلا فيه لالي
يكفيك من فاقدك ترديد ليته
لوإنها وسواس سو استوالي
اقول كيت الوجد والشوق كيته
قولو لمن اضحى بعيد المنالي
الله لايسقيه لليل ن سريته
اقدار بس الموت غالي وغالي
ياوقت ليه اجمل زماني طويته
مااسلاه جعلك منت ياوقت سالي
وإلا علي اموت ماقد سليته
ويبقى سؤالي بس دايم سؤالي
من جد ابونايف طغيت وخذيته
استغفرك يارب ياذا الجلالي
مؤمن بأن الشي مأنت شئته
ياعالم بسري وعالم مقالي
هيضني صيت اللي يتمنون صيته
علي عريب الجد عم ن وخالي
لو ينفدا والله بعمري فديته
ويارب بيدك كل فارش ظلالي
استغفرك من كل ذنب ن جنيته
تسكن علي علين ويشرب زلالي
حوض الذي بأقراء اقراء دعيته
شفيعنا في يوم الحشر والمألي
يوم إن ذا زدته وهذا عطيته
تعطي علي مالا دريت و طرالي
و مالا تخيلته ومالا رئيته
من كل مافي جنة الخلد حالي
آمين ياللي تقصد الناس بيته
