اخترت لكم اليوم بعض من قصائد الشاعر الكبير طلال السعيد واتمنى ان تنال اعجابكم
1_تعاتبنــــــــــــــــــــي
http://www.m7shsh.com/vb/images/smilies/36_1_6.gif
تعاتبني بنظرات خفيــة ..... وأجاملها ولا ادري وش وراها
أجاوبهـا بنظرات حزينة ..... تعبر عن ضنـا الروح وشقاها
أسايرها وأجاوب كل نظرة ..... وأخبي الوجد وأبحث عن رضاها
وعقب ما شفتها عرفت قلبي ..... تناساها ولكن ما نساها
غلاها يزود مع زود الليالي ..... وباع الناس قلبي واشتراها
وصرت أغار أنا منها عليها ..... خطا نفسي وآنا أتحمل خطاها
وأغار من أمها حتى وأبوها ..... وأغار من الذي بأمره ولاهـا
وأحسد اللي تبره بالرعايـة ..... وأحسد اللي بأحاسيسه رعاها
وأحسد البنـز لا قامت تسوقه ..... أخاف أنه يشاركني غلاهـا
وأحسد الريح لا حرك شعرها ..... وأحسد عيون غيري لا تراها
وأغار من القمر لا شع نوره ..... خذت نور القمر واصبح ضواها
وأحسد الشمس لا بانت عليها ..... أشعتها تسبب في أذاها
وأحسد الأرض لا داست عليها ..... أثر خطواتها تحيي ثراهـــا
2_ ودعـتـهـا
http://www.m7shsh.com/vb/images/smilies/36_1_6.gif
ودعتـها واخـفيت عـنها دمـوعي ..... خـايف تـحس بحسـرتي والتياعي
ودعــتها والقــلب مـني جزوعي ..... جزعٍ من الـفرقا قـليل المساعي
حـيث الفراق لـمن تــولع يلوعي ..... لـوعات فـرقاء ماوراها اجتماعي
في لحـظة الـتوديع هــديت روعـي ..... بـيني وبـين النـفس قـمة صراعي
اخـفـيت مـا حسيت بيـن الظلوعي ..... خايف عـليها لا تـحس بــضياعي
قالت فــمان الله وانطر رجوعي ..... واشـرت بالتوديع حـال استماعي
ساكـت ولارديت ماهي طـبوعي ..... مـن عـبرتي تـفرض عـلي امتناعي
حان الرحـيل وحان وقت الفجوعي ..... واقـفـت وأنـا عـيني عـليها تراعي
بـين الرجا واليأس صـبري يموعي ..... عـلى الـوداع اشـلون قلبي استطاعي
من عقبها اسهر مـسندي راس كوعي ..... لأنام خـالـي البال تـميت واعـي
تومي بـي الحسرات من غير طوعي ..... هـــذا الغـلا ماهـو غـرام صــناعي
اقــنب كما ذيـبٍ تـقـفاه جــوعي ..... لامــن ذكـرت فـراق حـلـو الطباعي
الـلي لاجــله هـان عـندي خـضوعي ..... والله مانسـى دمعته فــي وداعـي
3_لــيــش تـزعــل
http://www.m7shsh.com/vb/images/smilies/36_1_6.gif
ليش تزعل وانت ما تعرف ظروفي ..... ليش ما تسمع كلامي للنهاية
اقتنع بالعذر ترضيكم حلوفي ..... والله ان اللي حصل ماهو برضاية
من وعدني بلتزم بالوعد يوفي ..... ليش تلعب بي وتلعب في هواية
وكان خنت العهد فالحكم معروفي ..... الخيانة بالعهود أكبر جناية
كان قلبك يرحم الحال ويروفي ..... والله إنا ما لنا بالغير غاية
لا تحسب اني بطير مع الدفوفي ..... ما اشتري السلعة على سبة دعاية
لا طرت لي كلمتك يزيد خوفي ..... واتعذب من خلاية في خلاية
احسب ان الحب وياك مخلوفي ...... يوم انا اخصك بحبي مع غلاية
ما هقيتك تجرح القلب العطوفي ..... لا يا بو وجهين ما هذا جزاية
وأغار من النجوم إليا تعلت ..... وشافتها وعيني ما تراهـا
وأغار من الهدوم اذا لبستها ..... عساهـا ما تجرحها عساهـا
واغار من الخواتم في يديها ..... وساعتهــا وكل اللي معاها
وأغار من القلادة في نحرها ..... وأغار من الشعر لامن كساها
وأغار من القصيدة لا قرتها ..... ولو هي قصتي واشكي جفاها
وتشمل غيرتي حتى المرايا ..... يحق لهــا بشوفتها تباهـا
نعم وأغار حتى من الوسادة ..... وأحسد فراشها ويا غطاهــا
آلا يا من يساعدني عليهـا ..... يوصلني هوى النفس ومناها
عجزت أعالج جروحي بروحي ..... جروح القلب ما تشفى بلاها
4_ صــمــت الوداع
http://www.m7shsh.com/vb/images/smilies/36_1_4.gif
فارقت من لاكان ودّي أفارقـه ..... عقب الصلاة وتوّها الشمس شارقه
الفجر يوم الناس تسعى لرزقها ..... أنـا عيوني بازرق الدمع غـارقه
بكى وأنا أبكي يوم وقّفت أودعـه ..... والكـل منّا يذرف دموع حـارقه
سـلّمت ويديني بياديـه ترتجف ..... ويديه بيديني من الخـوف عارقـه
وأقفا وأنا قفيت والصمت حيلتي ..... عز الكـلام ودمعـة الياس فارقه
وحسّيت كن القاع حدري تزلزلت ..... يـوم ألتفتلي وأسـتهلّت غـوارقه
سـرقت من دنياه لـذّات دنيـتي ..... برضـاي سارقني وبرضاه سارقـه
همّي وهـوجاسي وحـبي وغيرتي ..... للي بوسـط القلب ناصـبٍ بيارقـه
وعـوّدت للمطلاع حزينٍ ملتجي ..... والقلب مـّني طـارق الهم طارقــه
ضلعٍ ورا المطـلاع شـوفه يريحني ..... عسـا الحيـا يسقيه لالاح بارقه
كتبت في عاليه حـرفي وحـرفها ..... ورسمت قلب الحب والسهـم خـارقه
ذكرى غـرام مات من قبل ينولد..... بفـراق من لا كـان ودي أفارقــه
5_وادعـيـنـي
http://www.m7shsh.com/vb/images/smilies/36_1_44.gif
وادعيني وامسحي دمعه بعيني .... الوداع صعيب لكن وادعيني
حاولي تنسين هاللحظه الحزينه .... ولا بعدت بعيد عنك ذكريني
اكتمي العبرات عني لين اسافر .... ماقدر اتحمل دموعك ساعديني
بالبدايه لا تقولين انتهينا .... فوق جرحي الاولي لا تجرحيني
ما انتهينا ما تفرقنا الليالي .... قلبي بيدينك وقلبك في يديني
خلي لحظات الوداع تصير ذكرى .... تبقى تذكار الوفا بينك وبيني
إنسي إنّا عقب لحظه بنتفارق .... عن هوانا عن غلانا كلميني
يكفي لا تقولين بالبعد نتغير .... مانتغير لا وربي صدقيني
مابي اسمع منك للنسيان طاري .... لا أبد ما انساك لا لا تظلميني
أنا كيف أنساك أنسى حياتي .... لو نست يسراي قصتها يميني
حبي أكبر حتى من كلمة أحبك .... ماقدر أوصف لك شعوري سامحيني
كل دقيقه تمر وانا بعيد عنك .... عن سنه بتكون من سبّة حنيني
واسمعي الكلمات مني وردديها .... أوعدك ما انساك لكن واعديني
6_ يــا عــيــونــي
http://www.m7shsh.com/vb/images/smilies/36_1_44.gif
يا عيوني خاطبي دمعة عيونه ..... جاوبيها خففي ثورة ظنونه
حاولي تنسين نفسك لو دقيقه ..... مايبي منك سوى نضره حنونه
لاحظي الدمعات تحكي عن عذابه ..... لاحظيها كل ما طبّق جفونه
ودّه يحكي ويتكلم عن غرامه ..... ومن حيا يخاف تعبيره يخونه
صدقيه اللي حصل ماهو بمنّه ..... غصب عنه فيه ناس يمنعونه
ياعيوني معذره هذي الحقيقه ..... حالت العادات من دونك ودونه
اعذريه وسامحي هذي النهايه ..... دمعتك صارت صدى دمعة عيونه
7_ جـــوني ثــلاثــه
http://www.m7shsh.com/vb/images/smilies/36_3_11.gif
جوني ثلاثة كلبوهم محــبـيــن ....... وكلن بنفسه حاجـتــن ما قضاها
قلت آمروا قالوا نصيناك عانين ....... وافزع الحال اللي حياته شكاها
الاولى مجبور في داعج العين ....... لكنها خطبت وغيره خذاها
قلت انت حل مصيبتك يامسكين ....... تصبر الين النفس تلحق هواها
اما تولــــع في هوى ناس ثانين ....... والا تـســــرح ثم تسرح معاها
والثاني الي عذبه كامل الزين ....... واقفت وراحت مادرى وش بلاها
قلت انت لاتتبع هوى ناس خالين ....... واتهين نفسك من سبايب جفاها
نفس العنا بالك تذلك على الشين ....... خلك عزيز النفس وأقطع رجاها
والثالث اللي ماعرف للمزايين ....... يبي الهوى ويخاف من منتهاها
قلت انت بالك تدخل الحب هالحين ....... ليما هذيك البنت ابحث خفاها
كانك لقيت احباب قلبك حبيبين ....... ادخل واحذر لايصيبك عناها
وكانك لقيت انه نوايا شياطـين ....... بالك توهق بالمحبه وشقاها
8_وشــلــون باصـبـر؟ ؟؟
http://www.m7shsh.com/vb/images/smilies/36_1_44.gif
البارحه هاجت علي التفاكير ...... ليلي قضيته بين هوجاس وافكار
ولا لقيت لما وطا النفس تفسير ...... وأصبحت كني راعي النار والغار
حزنٍ بقلبي كسّر القلب تكسير ...... لولا ضلوعي تردع القلب كد طار
على الذي له داخل القلب تقدير ...... الصاحب اللي بيني وبينه أسرار
دار الزمان وصار بالعهد تغيير ...... مدري غدر بي مدري الوقت غذار
قبل الموادع قال تذكرني بخير ...... إبعد وانا ابعد وافرض الحب ما صار
حنا نوينا وعاكستنا المقادير ...... وهلّت دموعه يوم فكر بالأقدار
قال النهايه جعل دربك مسافير ...... حاول تناسا اللي مضا صير صبّار
قلت الله اقوى ما طلبتيه بيصير ...... غصب عليّه قلت ماكنت مختار
ياللي جرحت القلب ليه المعاذير ...... جرحتني لا تترك الجرح تذكار
وشلون ابصبر كان شفتك مع الغير ...... وانا الذي عليك من نفسي اغار
9_وقــالت بــدو
http://www.m7shsh.com/vb/images/smilies/36_7_4.gif
وقالت بدو
وصدت وقالتها بقرف
بنت الأكابر والترف
متكبره .. متعاليه
يعني بدوي يقعد طرف !!
قالت بدو
والمعنى دون المستوى
ماحنا وياها سوى
احنّا بنظرها من نكون ؟
ريشة يطيرها الهوى
مفهومهما حنّا عدد
رقم ولا أكثر بعد
يعني مجرد تكملة
ولا فهي أصل البلد
قال بدو
تعني صفر على الشمال
هذا على أحسن احتمال
تصدر حكم ، ما تلتفت
تحكم ولا تترك مجال
قالت بدو
متصورتني باستحي
وأترك مكاني وانتحي
وتفاجئت ، تغيرت ، تلعثمت
ما تدري أني بافتخر
ولي الفخر !!
حنّا بدو
حنّا عمى عين العدو
حنّا البداوة وضعنا
وأهل الوفا هم ربعنا
حنّا نتفاخر بأصلنا
يا بنت هذا طبعنا
ماهي بداوة تلفزيون
ولا مسلسل أردني
بس بدوي بالميكرفون
ولا هد سيفه ينثني
ولا بدو بيت السدو
حنا البدو
حنا بداوتنا الأصل
بالقمة حنّا مو أقل
حنّا بداوتنا تراث
من جيل لي جيل انتقل
حنا معاني ساميه
نروي السيوف الضامية
نرد المنايا ما نهاب
لو هي سعاير حاميه
حنّا بدو
حنّا البداوة عيدنا
ما ناكل إلا صيدنا
ما نعيش عالة مجتمع
نموت .. ما نمد أيدنا
حنّا البدو
حنّا البداوة بدمنّا
ما نسمي أحدٍ عمنّـا
حتى ولو منهو يكون
لو هو زعل ما همنّا
حنّــا بدو
حنّـا البداوة عمرنا
ماحد بيصبر صبرنا
لأنها مصنع للرجال
نمشي وتمشي بأمرنا
حنّــا البدو
حنّا البداوة أصلنا
حنّـا البداوة فصلنا
حنّـا بدو متماسكين
وهذي نتيجة وصلنا
يا بنت ياللي تضحكين
قلتي : ابدوي تستهزئين؟
غرج لباسج الأجنبي
والمشكلة ما تعرفين
أن البدو أصل العرب
تبغين هالكلمة طرب
صارت نشب
يا آنــســة
يـا عانســة
يا ضايعــة ومستانســة
يا تارسة وجهج صبغ
يا تارسة عينج شدو
حنّــا البدو
ولو كان قلتيها بقرف
لنا الشرف
أنّــا بدو
حنّــا بدو
حنّــا بداوتنا شيم
ديــن وقيّــم
معنى كبيــــر
ما أظن مثلك يعرفه
لو تدعين المعرفه
شي عسيـــر
ما أظن مثلك ياصله
صعبه ولاهي حاصله
كلمة بدو !!
تعني التمسك بالجذور
ماهو التخلف والجهل
ولا بعد حب الظهور
ولا التنكر للأهـــل
كلمة بدو
تعني الشمم
فعل وكرم
مبدأ حضارات الأمم
حنّــا القمم
نارٍ على راس العلم
يشهد لنا سيف وقلم
وإن كان ما عندك خبر
لنا الفخر
لو عشنا ببيوتٍ شعر ..
عيشة ألم ..
عيشة فقــر ..
عيشة تعلمنا الصبر
ما نقترض لجل السفر
ونحسّب أيام السفر
ما نفترض
ونعيش واقعنا بحذر
وبالضيق نرخص بالعمر
نشرب من الماي الهماج
ونكحل نواظرنا بعجاج
وغسيلنا حفنة رمل
هــي الدوا
واهي العــلاج
عيشة رضــا
ماهي نكــد !!
ما فيها تعقيد أبد
ساعات ما نلقى ذرا
يكفي نتلحف بالنجوم
وفراشنا رمل الثرى
وسراجنا نور القمر
لا من ظهــر
وننام من عقب العشا
ونصحى قبل وقت الفجر
نؤمن بقضانا والقدر
ماهو كســل
ولا نعيش بلا أمــل
نملك طمـــوح
علــم وأمـــل
ونرعــى الإبــل
ونــرعى الغنم
ونعزف من الونه نغــم
ونتابع أخبار المطر
وندوّر الروض الخَضَر
ونسري ورا
برقٍ سرى
ولا نتراجع للورى
ونبحث عن المرعى العشيب
ومن شعيب إلى شعيب
ما نستقــر
عنواننا كل الديار
تجوالنا ليل ونهــار
نعيش عيشه هاديه
وهذي حياة الباديه
سنة الربيع ، سنة دهر
ورغم الفقر
نخاف من قولة أفا
ونتعب على قولة نِعِم
ونعيش عاليين الهمم
من فضل ربي ما نخون
نرعــى الذمم
ونركض ونتعب ما نمل
ماحنا مثلك لا شغل ولا عمل
ما غير بس أكلٍ ونــوم
ومن الشحم ضاقت عباتج والهدوم
يا أسمن أنواع الحريم
يا عايشه على الريجيم
يا آنــســة
يـا عانســة
يا ضايعــة ومستانســة
يا تارسة وجهك صبغ
يا تارسة عينج شدو
حنّــا البدو
ولو كان قلتيها بقرف
لنا الشرف
أنّــا بدو
ياللي تقولين ابدوي
أنا ابدوي
ولي الفخر أني ابدوي
عزمي قوي
ما أخون
ما أبوق الخوي
يبدأ نهاري بالصلاة
وأصارع أمواج الحياة
ما ضاقت الدنيا أبد
ولاني من أصحاب الحسد
أرفع ايديني للسما
وأطلب من الله واستخير
ما اقول يمكن ربما
ولا يصير .. أو ما يصير
محافظ على الخمس الفروض
واضح ولا أحب الغموض
ولا أتلون والتوي
لاني ابدوي
متمسك بأصالتي
ولا أغير لهجتي
أنا ابدوي
في فزعتي
وفي قومتي
وبقعدتي
وفي مشيتي
وفجلستي
وفي كلمتي
وبنخوتي
وحتى عقالي ولبستي
ولو قلتي عني فوضوي
ما ضرني
بالحيل يا بنت ابدوي
ويسرني أعرف .. من أنتي ؟
ومن أنا ؟
والفرق واضح بيننا
تدرين وأدري من أكون ؟
ويكفينا نعرف بعضنا
أنتي مثل عمر الزهور
مالك عمر
مالك سنين
شهرين ويجيك الجفاف
وتذبلين
وتصبح ألوانج باهتة
وأنا جذوري ثابته
ماخذ من الصحرا الهدو
وإن كان هذا يسعدج
حطي على راسك يدج
هالمرة لا قلتي بدو
يا تارسه وجهك صبغ
يا آنــســة
يـا عانســة
يا ضايعــة ومستانســة
يا تارسة وجهك صبغ
يا تارسة عينك شدو
حنّــا البدو
ولو كان قلتيها بقرف
لنا الشرف
أنّــا بدو
http://www.m7shsh.com/vb/images/smilies/36_1_41.gif
تحياتي .............. النااادر
