كل مافيني من اشواقي ( سقـــم )

ياسواليف الغلا والعشق (هـم) ... وأنـتـي عـلـوم (الـغـرام) ... والـهـوى لـيـلـه ســرى =لاتخليـن الهـوى كله "جفـى" ... مابـقـى بقلـبي "خـضـار" ... ومـلـت جفـونـي الـكــرى
كل مافيني من أشواقي (سقـم) ... ومـات بشفـاهي (الـكلام) ... ومـاحــدٍ عـنـي درى ...!!=الزمان اللي على عشقي "عفـى" ... كـل مـاراح "إسـتــدار" ... والـهـوى هــد ... وبــرى
أدري إن قلبي من الشوق (إنظلم) ... والـهـوى مـالـه (نـظــام) ... كــل مـابــاع إشـترى =والقدم من كثر مايمشـي "حفـى" ... كـل دربٍ فـيـه "ســار " ... ليـن بالطرقـة ضـرى ...!!
من سلم بالعشق من كلش (سلم) ... ماشكـى وحـشـة (ظـلام) ...لـه عــن الـوحـشـة ذرى=ومن سلم بالعشق وقته له "صفى" ... تمـشـي سنيـنـه "قـصـار" ... ماطـرى له مـاطـرى ...!
ياعذابـي منـك ياحبـر (القلـم) ... وماعلـى الـهـاوي (مـلام) ... وماجـرى لـي قــد جــرى =الشتاء مقبل وأنا احتاج "الدفـى" ... والهـوى بشفـاك " نـار" ... ومـن قـرى حرفـي ... قـرى
طاح كاسي من يدينـي و(إنثلـم) ... وطيـري المربـوش (حـام) ... فـيـه جـرحٍ مـابـرى ...! =وضاع جفني وسط ليلك ما"غفى" ... وإن مسكت الـنـوم "طـار" ... كــن فـي جفـنـي غــرى
أثر تالي العشق قافيـه (النـدم) ... وأولـه بـرد ... و(سـلام) ... وآخــره يرجــع ورى ...!!=وإن صفى لك يوم عشرة ما"صفى" ... كـن في صـدرك "وجـار" ... وأنت قـل لـي وش تـرى...؟!

من ديوان غزليات على ظفائر انثى
لعبدالكريم المهنا