سواليف الفقراء وسواليف الأغنياء...!!!

سواليف الفقراء :
أبو خالد يستقض باكرا مع آذان الفجر ويستعد للصلاة ويذهب للمسجد في سكينة ويصلي الفجر ويخرج ويجد جارة أبو سالم , يخرجان من المسجد ويدور بينهما هذا الحوار .
أبو خالد : صبحه بالخير .. أبو سالم .
أبو سالم : هلا .. هلا .. صبحه بالنور ,أخبارك أبو خالد .
أبو خالد : الحمد لله من فضل الله بخير , أبي ألحق على المخبز قبل ما يخلص الصامولي عسى يسلفني بريال أرده له أخر الشهر تدري العيال وراهم مدرسه وما أبيهم تجي الفسحة ويشوفون عيال الناس يا كلون وهم ما ياكلون شيء .
أبو سالم : يا الله .. كان الله في عونك أبو خالد بس المخبز القريب ما به خبز يا الله تلحق على المخبز إلي بآخر الشارع عسى يمديك على الخبز , أقول تدري معي خمسة ريال خذها سلف أشتر خبز ولا تنطل وجه عند الباكستاني تتسلف منه بريال .
أبو خالد : جزاك الله خير يا جاري هاتها عساها تحجب عليك يوم تبيض وجوه وتسود وجوه , سود الله وجيه التجار الجشعين إلي ما يخافون الله , وبالمرة أشتري بالباقي جبنة المراعي أم كاس الصغيرة عسى الأربعة ريال تجيبها تعرف أبو سالم خويك مقاطع الدنمركيين عليهم غضب الله وسلط الله عليهم .
أبو سالم : ( يضحك مبتسما ) يا أبو خالد من يوم عرفتك وطني وتشجع المنتجات الوطنية .
أبو خالد : والله يا ليتهم يحسون فينا التجار الجشعين أننا ما نبي غير المنتجات الوطنية بس الدعوة استغلال صارت علينا يا الضعوف بس الله كريم .
أبو سالم : إلا أقول أبو خالد , أنا عازمك الليلة على العشاء عندي مريقات ولحمه يحبها قلبك , وش قلت قل تم وخلنا نسولف وننبسط .
أبو خالد : ما شاء الله يا بو سالم لحمه مره وحدة تدري , أكيد بجي بس تدري والله خايف أكل لحمه وعيالي لهم شهرين ما ياكلون لحم ولا يعرفون ريحته أذكر قبل الشهرين جبت دجاجه وكفتنا يومين , أم العيال الله يجزاها خير مقتصدة تطبخها مع الرز لين تذوب فيه .
أبو سالم : والله يا بو خالد لي فترة يمرني واحد كل يوم 30 في الشهر يعطيني المقسوم وأشوي لحمه ومقاضي وزيت وطحين وتكفيني لين يفرجها الله , إلا وش رأيك الشهر الجاي قبل ما يجي تمرني ونجلس مع بعض وأعرفك عليه علشان يمرك بيتك مثلي .
أبو خالد : إيه والله تكفى وأنا أخوك والله راتبي 2000 ريال وتعرف أنا حارس أمن وقطاع خاص وعساهم بعد ما يفصلوني مع التقييم الجديد بلا النظام حق وزارة العمل مجحف في حقنا يالضعوف تدري أن من بنود النظام أن صاحب العمل يقدر يفصلك قانوني ولا حد يحاسبه .
أبو سالم : إن شاء الله بعرفك عليه , بس أبش في نظام العمل والعمال إلي تقوله .
أبو خالد : فيه فقرة تقول من حق الطرفين أن يتقدم أحداهما في نهاية العقد و أن يستغني عن الوظيفة وذلك بأعطاء الموظف خطاب إنذار قبل شهر من نهاية العقد أو أن يعطي الموظف صاحب العمل خطاب يوضح فيه بعدم الرغبة في تجديد العقد والعقد إلي هو سنه ويتجدد حسب رضا صاحب العمل .
أبو سالم : يعني ماسكينك ذلة طول السنين , صاحب العمل يبي يفصلك فهمناها بس أنت تبي تفصل نفسك كيف أبي أعرف ؟ .
أبو خالد : يا خوك خلها على ربك الفساد الإداري منتشر بس ما نقول إلا الله يخلينا أبو متعب الله يحفظه ويصلح كل شيء إن شاء الله , وبعدين تعال أنتم يا الموظفين الحكوميين ما عليكم قاصر زادكم الملك 15 في المئة وزادكم 5 في المئة , كثر الله خيره أبو متعب الله يحفظه .
أبو سالم : يا خوك الله يوفق الملك لولا الله ثم هو كلونا ذولا النصابين والمسئولين والتجار بس ترى الزيادة كلوها التجار علينا ورفعوا الأسعار بس الله يوفق أبو متعب إلي تنبه لهم في القرارات الأخيرة , بس عسى التجار ما يرشون المسئولين وحماية المستهلك إلي دعمها الملك الله يقويه .
أبو خالد : والله أنا عندي اقتراح يا بو سالم يا ليت يوصل للملك الله يحفظه علشان التجار ما يستغلون السلع إلي يدعمها الملك لنا يا الضعوف .
أبو سالم : قول .. قول يا بو خالد أنت أحيانا تقول أفكار ودك أنها ما تطلع منك لأنها تضحك .
أبو خالد : ( يضحك مبتسما ) يا خوك لو يسولنا بطاقة ذكية فيها خمس أو عشر سلع مدعومة وأن حط فيها ألف ريال يسوون لها آلية معينه بحيث تربط مع رقم السجل المدني في الأحوال المدنية وتكون السلع المدعومة في مراكز حكومية مستقلة ولا تروح للتجار , وبعدين إذا بغيت أشتري أروح للمركز الحكومي إلي فيه السلع وأشتري فيها ويعطوني كل شهر كيس طحين وكرتون زيت وكيس رز وكرتون حليب ويا ليت بعد كرتون دجاج , ولا أقدر أخذ بالسعر المدعوم إلا مرة في الشهر وتسجل في الكمبيوتر أني أخذت علشان ما يجون التجار ويسحبون من السلع المدعومة ونروح فيها وتخلص .
أبو سالم : الله يقطع إبليسك من وين تجيب ها الأفكار .
أبو خالد : يا خوك الناس بتموت من الجوع ما سمعت عن مثل يقول الحاجة أم الأختراع .
أبو سالم : إلا أقولك يا بو خالد بلاك أنت بعد ما تعرف تتصرف والله يا أعرف لك أمير يحبه قلبك فاتح بابه من بعد المغرب لين آخر الليل أجي عنده وأتقهوى معه ويعطيني المقسوم وكل شهر أمرة ولا يقصر وش رأيك نروح له بكرة .
أبو خالد : بس الخويا ما يمنعونك تدخل عليه .
أبو سالم : لا يا خوك هو منبه عليهم ما يمنعون احد ولا يكلمونك ولا يقولون لك شيء تراه شيخ قول وفعل تدري أني صرت نصراوي وأحب نادي النصر بسبته وأنا ما عندي تلفزيون , تدري نوفر كهرباء .
أبو خالد : نروح له الله يكثر من أمثاله والله ما أصير نصراوي بس إلا ألبس علم الهلال وأصبغ الأبيض أصفر .
أبو سالم : ( يضحك مبتسما ) إيه والله , الله يكثر من أمثاله نروح له بكرة إن شاء الله أقولك رح لحق على المخبز خذتنا السواليف , أشوفك على خير .
أبو خالد : أيه والله أشوفك على خير الليلة لا تنسى العزيمة واللحمة .

سواليف الأغنياء :
أبو ناصر ينهض من فراشة الساعة التاسعة صباحا ويتناول طعام الإفطار ويذهب لغرفة المكتب ويفتح شاشة الأسهم – 60 بوصة - ومن ثم يرن جرس الهاتف ويستقبل مكالمة من أبو مشاري .
أبو ناصر : ألوه .. ألوه .
أبو مشاري : هلا أبو ناصر أخبارك صباح الخير .
أبو ناصر : صباح النور يا هلا ( يا هلا ببرستيج ) .
أبو مشاري : ( شاف أبو ناصر يسوي بريسيج قام يسوي بريسيج وتذكر بريستيجه ) أقول أبو ناصر قالي راعي مكتب العقار أنك رفعت الإيجار حق عمارتك الجديدة إللي بشمال الرياض .
أبو ناصر : أيه والله تعرف يا خوك الإيجارات ارتفعت وكل واحد يرفع الإيجار على كيفه قلت أرفع مع الرافعينا ( يقهقه ) .
أبو مشاري : ( يقهقه ) وكم رفعت الإيجار .
أبو ناصر : الشقة أم خمسه وعشرين صارت بخمسة وثلاثين بس تدري نبي نساعد الناس ما نبي نرفع الدوبل ألحين .
أبو مشاري : ولا احد قالك شيء .
أبو ناصر : ومن يقول وزارة التجارة ولا حماية المستهبل ( يقهقه ) كلهم ربعنا .
أبو مشاري : ( يكلم نفسه الله يقطعك أنت وبريستيجك ) إلا أبو ناصر والمستاجرين ما قالوا شيء .
أبو ناصر : ( برستيج قوي هذي المرة ) لا وش بيقولون إلي يبي ولا الشارع هو وعفشه ( يقهقه ) .
أبو مشاري : أيه والله شكلي بكلم راعي المكتب برفع مثلك , تدري نبي نعلم الناس الاقتصاد وكيف يوفرون من رواتبهم ثلاثة آلاف كل شهر ( ويقهقه ) .
أبو ناصر : ( بريسيج ) ايه والله نبي نعلمهم يقتصدون وفي النهاية إلي يوفرونه يرجع لنا في كل ستة أشهر إيجار, الناس لازم تتعلم مبدأ التوفير ويخلون الكماليات إلي مالها داعي .
أبو مشاري : الله يقطع إبليسك طول عمرك تاجر ورجل اقتصاد , إلا وش سويت في عمارتك إلي بتدشنها في المؤتمر الصحفي بكرة بالفندق .
أبو ناصر : سوينا دعوات للصحفيين وبنعطي الصحفيين أشوي كلام من ذا الرخيص إلي تعرفه وأننا رايح نجعل الإيجارات في متناول الجميع وسوف نساهم في الاقتصاد الوطني ومن ذا الكلام وأنا أخوك .
أبو مشاري : وش من جدك بتخلي الإيجارات رخيصة .
أبو ناصر : يا الذكي أكيد بخلي الإيجارات بعشرين ألف تدري العمارة في صلبوخ أبي أجرها كلها وبعد سنه نقول اليورو خفس ولا الين طلع نسيت لعبت الدولار إلي نلعبها الحين ولا لعبة تجار الهند إلي قلنا أنهم رفعوا الأسعار وهو في البورصة الطن حاليا بـ 500 دولار ونقول للناس أنه علينا بـ 1200 دولار للطن , خلك ذهين ما خبرتك كذا .
أبو مشاري : والله انك مدرسة يا بو ناصر .
أبو ناصر : أيه ما نسيت أن معي الدكتوراه من جامعة شد لي واقطع لك .
أبو مشاري : ( قهقه مع برستيج يبي يشخص على أبو ناصر اشوي ) أيه صح صح يا أبو ناصر يا دختور .
أبو ناصر : ( شاف أبو مشاري يشخص عليه اشوي ) قال ( برستيج ) إلا أقولك متى بترجع القرض إلي عطيتك .
أبو مشاري : ( ما عنده سيوله سيولته في الأسهم ) ما نسيت طال عمرك بدخلك معي شريك بقرضك في مشروعي حق ترميم الشوارع ندفن الحفر ونقول أننا سفلتنا الشارع كامل ونعطي المراقب على المشروع قرشين يروح فيها مصر وش قلت تدخل معي شريك .
أبو ناصر : أيه مع شرك , بس أنت ما تجوز عن الأسهم الخسرانة قلت لك خلك معنا في الأراضي التريبات زينه بس أنت ماش تبي كذا وكذا تبي أراضي واسهم , ومشاريع طرق , عندك أنا حاط لي 10 مليون ريال في الأسهم علشان الربح يصير مصاريف العمالة عندي ونثريات احتاجها .
أبو مشاري : إيه والله ما فيه زي التريبات بس خفت لا يسوون على الأراضي المعروضة للبيع زكاة وتفرض علينا مصلحة الزكاة والدخل الزكاة لأنها من عروض التجارة ونسدد عن كل سنة 2.5 % وترخص الأراضي ليني لا طلت بلح الشام ولا عنب اليمن ومن وين نسدد كل سنة 2.5% زكاة على أراضي رفعنا قيمة المتر فيها إلى 3000 ريال .
أبو ناصر : ردد يا ليل ما أطولك الزكاة ما رايح تجينا التريبات التريبات يا أبو مشاري أرجع لنا خلنا نلعب على مساهمة كبيرة اشوي نسميها مساهمة ركد وأنا أشوت.
أبو مشاري : نسيت عندي موعد مهم مع مكتب العمل بيجيني المكتب وأبي الشباب السعوديين إلي موظفهم حركة يداومون اليوم أبي أكلمهم
( أشوفك طال عمرك على خير ) .
أبو مشاري : إيه كل شيء إلا السعودة لازم نشجع على السعودية
( في أمان الله )

سواليف الطبقة المتوسط :
لا تعليق

( أتأسف للقراء الكرام على استخدام لغة عامية )
عبد الله الذيب
صحفي سعودي

سبحان الله
فقير وعندي المال الكثير
فقير وملبسي غالي حرير

شكرا:لك:

اقتباس:

---

المشاركة الأصلية كتبت بواسطة عنوان المحبه

سبحان الله
فقير وعندي المال الكثير
فقير وملبسي غالي حرير

شكرا:لك:

---

اهلا عنوان المحبة........

فعلا كما قال عبدالرحمن بن مساعد...

فقير وعندي المال الكثير...

إختصرت وجئتنا بالمفيد...

تحيتي...

اجتياح


يعطيك العافية
شكرا لك

الفقير يصلي الفجر والغني لايصلي

سبحان الله هل المال يدفع عنك غضب الرحمن

هل المال يأمنك من النار هل المال يرد عنك الموت

موضوع قيم ومهم شكر اجتياح

امممممممممممممم
ليه الغني يفهم في الأقتصاد والفقير مايفهم فيه؟

يقولون علماء الأقتصاد ان الاغنياء اغنياء لأنهم يدخرون اكثر ويستثمرون مايدخرون
ويقولون ان الفقراء فقراء نظرا لأستهلاكهم العالي ::sa02::

طبعا احد علماء الأقتصاد الأسلامي اذكر قريت له قال ردا على النظرية الاولى ان الأغنياء يستهلكون اكثر
لأنهم يركضون في الغالب وراء المظهر وهو مانسميه في علم الأقتصاد الأستهلاك المظهري ::d::

سؤالي انت ايها القارئ مع من؟
وبرأيك ماهو سبب غنى الغني وفقر الفقير ؟

اقتباس:

---

المشاركة الأصلية كتبت بواسطة مليت أنا الفرقى

اجتياح


يعطيك العافية
شكرا لك

---

منورة....

إنشالله إنا نستفيد من السوالف هاذي...::sa07::

تحيتي...

اقتباس:

---

المشاركة الأصلية كتبت بواسطة جبران حكمي

الفقير يصلي الفجر والغني لايصلي

سبحان الله هل المال يدفع عنك غضب الرحمن

هل المال يأمنك من النار هل المال يرد عنك الموت

موضوع قيم ومهم شكر اجتياح

---

أهلا جبران...

بالفعل أسئلة تحتاج إلى إجابة...

تحياتي...