دلوني على قبرها وهناك اتركوني

ياللي دفنتوا جثتها.. ليه تبكون؟

لولا الحيا..لأقول : معكم خذوني

منها انحرمت وكنت انا عنها مسجون

ما أذكر لمحتها .. غير مره بعيوني

شفتها ..وكانت فرحتي مالها لون

عجزت لأوصف .. من لمحتها شجوني

ياليتني ..كنت الكفن يوم تمشون

أبقى معها بالقبر ثم تدفنوني

أو ليتني .. من خلفكم كنت (مجنون)

أتبع خطاكم والعذر هو : جنوني

أبكي وراكم .. وأدعي ان كان تدعون

ما يكفي انها عاشت عمرها بدوني؟؟

تكفون < هاكم عمري اليوم تكفون

برخص حياتي دام خابت ظنوني

ما فادني صبري !! ولا فادني عون

ولا فادني دمع(ن) .. حرق لي جفوني

يا ما بكيتها والبكي يحرق عيون

العام كان بفرحتها.. يعزف لحون

واليوم ؛ تحت الأرض .. ماهو بكوني

لكن أنا في فرحتها.. كنت مدفون

فوق الثرى .. واليوم موتها سجوني

(سميت قلبي عقب فرقاها ملعون)

هو و الليالي .. عن هناها امنعوني

ياليتني.. ماعشت لحظه بهالكون

و ياليت ربعي .. في سكات اذبحوني

وياليتكم .. عن همّي اليوم تدرون

منها انحرمت > ومن عزاها .. احرموني

حتى بوفاتها !! يوم أنا طحت مطعون

أخفيت طعناتي .. قبل لا يفضحوني

بكيت!! لكن .. ماتظاهرت بالهون

أبكي وأقول : الموت هو سبة طعوني

و إن كان في حبّي أنا ..ماتحسّون ..؟! دلوني

لقبرها .. وهناك .. اتركوني ..!!

منقول