يوم ضاقت
قلت وينك يا الفرج ؟!
قال : جيت
وشفت حولك ألف صاحب
وخفت أسبب لك حرج !!
إرتكيييييت
بس وين اللي يشيل الحِمل وينه ؟
وين ذاك اللي ذخرته للظما قطرات .. وينه ؟
وين أبو الفزعات عني .. ما قدرت ألقاه وينه ؟
من لمحني فوق كفّ الموج .. فضّ
وكسَّر ألواح الرجا بيني وبينه !!
حزّ نفسي
غصّ في حلقي ورضّ
كل ضلعٍ لي معاه .. وغضّ عينه !!
يحسب إني مِتّ همّ
ولا درى إني حيّ لكن
مِتّ من خنقة يدينه !!
يا الفرج
صاحبي ما شفت زوله
من فقدته في يوم شِدَّه
بس.. لو جاني على قلعة عيوني
حالف إني ما أردَّه
والمودَّه يا الفرج .. هيِّ المودَّه
صاحبي .. مالي بصدَّه
صاحبي .. روحي عرينه
ولو نصاني والنواصي عشب قبري
والله إني غصب لأحيا .. ثم أعينه !!
إرتكيييييييييت
وطحت
والجلمود .. ناخ
آآآآه يا كذب الليالي البيض
آآآآه يا ظلم السباخ
من مشاها ولا وراه زنود تبري الكبد
داااااااااخ
يا كثر ما خيِّبتّ ظنّ اللبيب
ويا كثر ما غيِّبتّ .. وجهٍ قريب
ويا كثر ما شاف منها
صافي النيَّه .. وشااااخ
إرتكيييييييييييييت
واثر ظِلِّي ما يمون
و اثرني كومة طعون
من غلاة أصحابها .. ما قدرت أقول :
آآآآخ
لي مبادي
وصاحبي .. لوجار منه الجور .. عادي
وصاحبي .. لو هو قتل ذكراي .. عادي
وصاحبي .. لو هو بِخل بِرضاي .. عادي
وصاحبي
يبقى العزيز الناصع اللي له ودادي
ودام أنا ستره وثوبه
صاحبي
ما أقول : عنه أبداً، وتوبه
يا هلا به
وبعيوبه
وبذنوبه
يا هلا
إن وصلني .. ياهلا
وإن قطعني .. يا هلا
صاحبي وإلا فلا
والغلا نعمة كريم
وساقها لكلّ الملا
ويا الفرج .. حاول تحبّ
دام لأهل الأرض ربّ
ولو تشوف .. أصحاب واجد حول قلبي
لا تعاندّ
السواعدّ من سراب !
والحصايدّ من يَـباب !
والشِعرّ .. كذَّاااب !
خلّ فتَّال الشوارب .. عن يمينك
ولا تخاف من الحرج .. لو قيل وينك ؟
كلّهم مثلي تراهم .. بالنهاية
طالبينك .. طالبينك .. طالبينك .. يا الفرج !!
ويوم ضاقت
قلت وينك يا الفرج ؟!
قال : جيت
وشفت حولك ألف صاحب
وخفت أسبب لك حرج!
