رحله مع كنوز النفس

اهلا بكم اخواني اعجبني هذا المقال في احدي الجرائد اتيت به لانستمتع مع قليلا

اتمني ان ينال اعجبكم :

السادة المشتركين في رحلة البحث عن أهم كنز في حياة كل حد فينا. أحب أعرف حضراتكم إننا في الرحلة هنعدي على تلات محطات قبل ما نوصل لمكان الكنز. وإن أي حد يقدر يشارك معانا في الرحلة لأن عمر ما كان الوقت متأخر عشان تكتشف الكنز ده. وتقدر تروح الرحلة دي أكتر من مرة وفي الوقت اللي تختاره وتكاليف الرحلة هي بس قرار بجد من جواك إنك عاوز تلاقي كنزك؟ باقي المعلومات هأقولها لكم وإحنا في طريقنا. الكل ربط الحزام؟ يلا بينا.. كلنا فاكرين إن كل محطة ليها شعار.

أول محطة شعارها "إعرف نفسك"
كل مشترك فينا لازم يجيب معاه أدوات أول محطة هنعدي عليها وهى:
أهم حاجة في حياتك؟
أهم شخص في حياتك؟
أهم تلات صفات شايفهم في نفسك؟
أكتر مبدأ مؤمن بيه؟
أهم تلات صفات تحب إنهم يكونوا موجودين في صديقك؟
دلوقتى بقى لازم نعرف هندور على الكنز ده فين؟
مكان الكنز هو جوا كل حد فينا، اللي نقدر نقول عنه كلمة "تقدير الذات". يعنى نعرف قيمة كل حاجة موجودة جوانا. وفي البداية لازم نعرف إحنا جوانا إيه أصلا؟ لأننا ما نعرفش نقدر شيء إحنا أساساً مش عارفينه. واكتشاف الذات بيبدأ بأنى أقبل ذاتي وأعترف بإيجابيتها وسلبيتها وأكون صريح جدا مع نفسي و أنا بعمل ده. ولازم كمان أبقى عارف إنه عمر ما كان الوقت متأخر عشان أعمل ده... عملية إنى أقدر وأعرف واكتشف نفسي حاجة ضروري تبقى مستمرة معايا طول عمري. يمكن و إحنا صغيرين كنا بنشوف نفسنا بعيون الناس اللى حوالينا. واللى غالباً بيكونوا ماما وبابا وجدو وتيتا اللى شايفنا أحسن ناس في العالم. لكن كل ما بنكبر لازم نعود نفسنا إننا نعرف ونقدر نفسنا بنفسنا.

وعشان أسهلها لك أكتر في نظرية لعالم اسمه “Gohary” بتقول إن شخصية الإنسان مقسمة أربع مناطق هى (المفتوحة، العمياء، القناع، المجهولة). المنطقة المفتوحة فيها كل الحاجات اللي أنا أعرفها عن نفسى وكل الناس تعرفها عنى. أما المنطقة العمياء فيها حاجات أنا ما باشوفهاش في نفسي لكن الناس تعرفها عنى وشايفاها فيا وممكن تكون كويسة أو وحشة وهى من أصعب المناطق لأن الناس تقدر تأثر عليك من خلالها بشكل إيجابي أو سلبي.
المنطقة دى بتفكرنى بأيام ثانوى. مرة قررت أقول لمدرس اللغة الفرنسية قبل الأمتحان بتلات شهور.. أنا مش هأنجح فى المادة دي. قالى حتجيبى 49.5 من 50 ضحكت وقلت له حضرتك بترفع من معنوياتى... صح؟ قالى أنا عارف كل طالب عندى بيستوعب إزاى. أنا كنت مقتنعة تماما إنى مش هأنجح والمفاجأة إني جبت 48.5 وكنت منبهرة ورحت تانى للمدرس قالى معرفش الدرجة دي ضاعت إزاى. المجموع داللى جبته أكد لى إننا ما نقدرش نشوف كل حاجة عندنا.
نيجى لمنطقة القناع وده اللي بنستخدمه لما نحاول نظهر بوش تانى للناس سواء إيجابى أو سلبى زى ما حد يبين نفسه بصورة معينة عشان هدف معين عاوز يوصل له أو حد يخبى حاجة ما يحبش اللي حواليه يعرفوها عنه ومعظمهم العاطفيين اللي بيحبوا يظهروا عكس شخصيتهم علشان خايفيين الناس تسخر من مشاعرهم المرهفة.

و أخيرا المنطقة المجهولة وهى أخطر مكان لأنها ولا أنا بأشوفها فى نفسى ولا الناس بتشوفها فيا. أمال بتظهر إمتى؟! معظم الناس وقت الأزمات الحقيقة فى حياتهم بيكتشوفوا فى نفسهم حاجات أول مرة يعرفوها عن نفسهم. ومنهم شخصيات مشهورة زى د.إبراهيم الفقى اللى فى يوم واحد خسر كل حاجة.. وظيفته كمدير فندق ورجع بيته حتى من غير عربيته. لكن لما فكر وكتب أول كتاب ليه حقق مبيعات فوق توقعاته واستمر لغاية ما بقي رائد في التنمية البشرية. فترات الأزمات في حياتنا ممكن تكون وقت مناسب جدا عشان نكتشف فيها المنطقة المجهولة اللى جوانا.
وصلنا للمحطة التانية...واللى شعارها "اعرف قيمة ذاتك"
بعد ما عرفت كل الكلام عن النقط اللى أنا بشوفها فى نفسى بتكون بداية التغيير وبداية التقدير... ومن هنا بداية إنى أكتشف نفسى... التقدير... كل حد فينا ممكن يختار يوم فى السنة ممكن يكون يوم ميلاده مثلاً ويكتب الإيجابيات والسلبيات اللى بيشوفها فى نفسه أو التصرفات اللى مش راضى عنها ويوصف إحساسه ناحيتها. وممكن يعرضها على الناس اللى بيثق فيهم؛ أصدقاؤه أو عيلته مثلا، ويشوف تعليقاتهم عليها، ويشوف شعوره إيه؟ لما بيعمل سلوك معين راضى عنه وبيحبه؟ ويسأل نفسه إيه اللى ممكن يقدمه لنفسه وإزاى يتعامل مع نفسه لما يعمل حاجة غلط؟
فى الآخر ممكن كل مشارك فى رحلتنا يقدر يحط خطة لنفسه فيها أفكار يقدر ينفذها لو عمل شئ هو يقدره عن نفسه وأفكار ينفذها لتغيير أى شئ غلط هوا شايفه فى نفسه. (بداية شعورك بالتقدير يبدأ بتقديرك إنت لنفسك، ومن هنا بيبدأ تقدير الآخرين ليك ولما نعترف بعيوبنا بيكون من السهل علينا تغيرها وتعديلها. ودايما في فرصة للمراجعة مع النفس طالما فى رغبة وقدرة على التغيير.
المحطة التالتة والأخيرة شعارها ( كن أنت ولا تكن غيرك)
وده لأن مفيش شخصين متشابهين في كل شىء، افتخر بذاتك لأن مفيش حد عنده كل اللى تملكة من صفات ومعاني، عيش حياتك باحترام وتقدير لأن كنز كل شخص فينا الشخصية الفريدة اللى عايشه جواه. شوف نفسك بصورة إيجابية، تأمل الصفات الإيجابية اللي بتملكها وما تستهترش بأى صفة جميلة جواك وتمسك بها.
حافظ على الوقت فى كل شىء، وخللي ده سلوك دائم فى حياتك، لأن الحفاظ على الوقت هيخليك شخصية مميزة، والناس لما تشوف أنك صادق فى وقتك، حريص على تقدير القيمة الزمنية، يبدأوا يثقوا فيك ويكونوا مطمئنين أكتر فى تعاملهم معاك. أنت ممكن تكون شايفاها حاجة مش مهمة قوى، لكنها أساسية عشان تظهر إنسان جدير بالاحترام وكبير فى عيون الناس.
اعرف مسئولياتك ، لأن الشعور بالمسؤولية فى الأمور الصغيرة بيمكنك من تحمل المسئولية فى الأمور أو المشاكل الكبيرة. أشعر بالمسئولية ولو مع نفسك لأن ده مفتاح النجاح. ما تبصش لناس تانية تخلو عن مسئولياتهم، لأن دي سلبية، كن شجاع مع نفسك لأن مفيش حد مسئول عن أخطاءك، ما تلومش اللى حواليك بأنهم ما حملوكش المسئولية ؟ لأن "المسئولية تؤخذ ولا تمنح" .
حاول تعمل حاجة جديدة، عامل نفسك على إنها طفلك الصغير وإنت بتربيه وبتعلمه. خللى عندك توقعات واقعية عن نفسك، وقسم أهدافك الكبيرة إلى أجزاء صغيرة. أمنح الدعم للآخرين وإتعلم إزاى تتقبل الدعم منهم .
سيب لنفسك الحرية فى الاختيار والحركة والنجاح .
(طول ما فى حياة ...عملية إنى أكتشف ذاتى وأقدرها وأوجهها هى عملية مستمرة لاتتوقف)
ودلوقتى وصلنا لمكان كنزك...خطتك فى دماغك...مفتاح شخصيتك فى جيبك...
انطلق ودور على كنزك.

,منقول .

شكرا لك اخوي على هذا المشاركة واتمنى لك التوفيق..
ولعل القناعة هي اثمن الكنوز !!