زجل بعنوان " اسم الله عليه النبي حارسه" بقلم مخلص مصري

اسم الله عليه النبي حارسه

بينصح غيره وناسي نفسه

وبيعمل الشئ وضده

فاكر لا قبله ولا بعده

_________________

عارفين إن الكلمة أمانة

تأثيرها شديد أوي جوانا

والداعي لا بد يكون قدوة

مش ينقد وهو اللي ف لهوة

__________________

ابدأ بنفسك غيرها

من جوه مش من مظهرها

ولو فيها حاجة كده طهرها

وقوي العزيمة وصبرها

_________________

ونصيحتي ليك بقي تتعلم

وتفهم قبل م تتكلم

دالكلمة الحلوة هـ تفتحلك

ابواب قلوب ياما ترتاحلك

_________________

ساعتها بقي تنصح غيرك

وابدأ في دايرة تأثيرك

أخوك أختك أمك أبوك

واصحابك اللي بيحبوك

________________

ولما تحس إنك وفيت

كل الناس اللي حواليك

ابدأ وسع المجال بايديك

وان حسيت بصدود وقسوه

اوعي تيأس اوام وتمل

الشر عند البعض شهوة

وياما دعاة شافوا الذل

_________________

وطول م انت ماشي في طريق الخير

اطلب من ربك يعينك

وهو اللي هيسخر من الغير

ناس كتير أوي هتفيدك

واخيرا اياك يوم تنسي

انك تقصد وجه الله

ولو غير كده احسن لك تنسي

ومتستناش في الآخرة جزاه

__________________

مخلص من مصر

ينقل للقسم المناسب

زجل جميل جدا وبلغة مبسطة
ويحمل الكثير من المعاني والقيم الإنسانية
ونابع من شخص قد عرك الحياة وتعلم منها الكثير .

شكرا أستاذ مخلص

كلمات رائعة

معطرة بالنصائح

أبدعت يا أخي وإن كنت لدي ملاحظة على الجملة الأولى

فلو توضحها لي أكون لك من الشاكرين؟

"اسم الله عليه النبي حارسه"
اخي عبد الله: هي كلمة بالعامية المصرية يتداولها اهل الريف في مصر وتعني بسم الله ما شاء الله وهي تقال للأطفال كثيرا كلما قاموا بعمل مميز رغم صغر سنهم
ولذلك فهي هنا تحمل معني السخرية ممن ينصح غيره وينسي نفسه 00 ارجو ان اكون وضحت