الذنب ذنب ابوي علمني الطيب..في وقت ما للطيب فيه اي قيمه

ياكثـر مـن دور علـي العـذاريـب

وياكثـر مـن حطـوا وراي النميمـه

ناسٍ تبي في سمعتـي يذكـر العيـب

أهـل العقـول التافهـه والبهيـمـه

كنت اعتبرهم لي ضيـوف ومعازيـب

وانظر لهم فـي كـل نظـره سليمـه

خذيت منهـم فـي حياتـي تجاريـب

وابعدت فـي طيبـة معـزه وشيمـه

واخذت حقي بأمر مـن يعلـم الغيـب

والحـمـد لله مارجـعـت بهزيـمـه

حذرتهـم عيـت تفـيـد المنـاديـب

ليـن إختلـط بالجـو عجّـه وغيمـه

كل السبب عرفـي سلـوم المواجيـب

واكبر سبـب يمنـاي دايـم كريمـه

واغضي واسامح وابعد الشك والريـب

قلـبٍ نصـوح ونـيّـةٍ مستقيـمـه

مافاد فـي وقـتٍ حصـاده عواقيـب

قلت ادخل جنانـه وطحـت بجحيمـه

عكس الصحيح الصح والمخطي مصيب

واللي فعل معـروف طيبـه خصيمـه

هالوقـت وقـتٍ للطمـع والمكاسيـب

واليوم صار الطيـب موضـه قديمـه

وقـتٍ يناسـب لابسـات الجلابـيـب

اللـي يعشقـن الهـروج الذميـمـه

يضحك به الحصني ويبكي به الذيـب

ماتنفـع الحشمـه ولا بـه حشيمـه

والذنب ذنب ابـوي علمنـي الطيـب

في وقت مـا للطيـب فيـه اي قيمـه

ياللي تـدور فـي طبوعـي عذاريـب

والله ماتلـقـى بغـيـر الظلـيـمـه