*·~-.¸¸,.-~*إذا المراجل لبسة شماغ وعقـال قـل للعـذارى يلبسـن

إذا المراجل لبسة شماغ وعقـال
قـل للعـذارى يلبسـنّ العمايـم


ما عاد يفرق زول حرمه ورجـال
دام الفعايل تشبه البعـض دايـم


المرجله ما هيب كلمـه وتنقـال
وتروح ما راحت هبوب النسايـم


وإلا خشونة صوت أو رفع الأثقال
أو رزة صـدور وفعـل الزلايـم


ولا هي بعد مفتاح موتر وجـوال
وإلا ردى لسانن حديثـه شتايـم


المرجله شيمه عن القيل والقـال
رفيع نفس (ن ) حر بالجو حايـم


المرجله عقلٍ وزن وزنـه جبـال
ودون العقل وش فرقنا والبهايـم


يا مسندي لو مايل الوقت بي مال
يا ولد أبويه يا عظيـم العزايـم


يا معرب الجدين من العم والخال
يا نخوة المفزوع وقـت الهزايـم


المرجله يا خوي هي طولة البـال
هي العزم هي الصبـر فالظلايـم


فيها الكرم عـزه دلـه وفنجـال
فيها الكرامه عن ردى الطبع شايم


والدين لامنه خذا القلـب منـزال
مشى طريق الحق وابليس نايـم


ومن لا عرف ربه في طيب الحال
لابد وقت الضيـق بالهـم هايـم


حتى صلاتك مع جماعات ورجال
في خيرها يا خوي نعـم الغنايـم


ولامن نصف ليلك قم صفي البال
يا عظم أجرك بين ساجد وقايـم


ولا من رفع ربي له كل الأعمـال
حسن الذكر لا قالو فـلان صايـم


وخلك شريف القصد يا طيب الفال
سوء المقاصد فالبيـوت الهدايـم


واحذر تبيع النفس في دب الأنذال
وتتبع خوي إبليس راع النمايـم


النفس خيل لك إذا كنـت خيّـال
ومن لا قوى نفسه قوته الهزايـم


ولا صرت ما تدري لو يش رجال
والله خسارة فيك ذبـح التمايـم






اعجبتني



وحبيت انقلها لكم

أعجبتني قفلة القصيدة جدا

ولا صرت ما تدري لو يش رجال
والله خسارة فيك ذبـح التمايـم


القصيدة بشكل عام جميلة ومعبرة
ذائقة رائعة واختيار ينم عن روح
شفافة وحس مرهف وعين ثاقبة

سلمت غزولة وسلم صاحب القصيدة
تحيتي وتقديري

سلمت يمينك ياطائر من الشرق