@@((للحــب عنــــوان)) ..,, قصـــه حلـــوة @@

الفصل الثاني من الجـ 17 ــزء
للحب عنوان
==========
ملخص الجزء السابق: (( لوم غزلان على انشغالها عن اهلها.. وندمها على هالشي.. تدهور صحة سلطان ودخوله المستشفى في العناية المركزه.. توعد احمد بإنه بيأدب مريم على سواتها))
================
أحمد وبعصبيه: شوف عبدالعزيز.. اذا اختك ما ظهرت بعد خمس دقايق صدقني ما بحشم ولا واحد فيكم وبدخل البيت وبيرها..
عبدالعزيز: اعوذ بالله.. أخبرك انا احترمتك لأنك ولد خالتي.. بس عاد مب قادر اسكت زود. إحشم البيت والي فيه.. ريال شكبري جدامك احشمني واحشم لحيتي..
أحمد: لك الحشيمه ياخوي.. بس اختك ما حشمت احد فينا.. كيف تباني احشمها..
عبدالعزيز: انزين انت هد بالك وقول لي شو صاير؟؟
أحمد وبصوت عالي: اختك المصون هي سبب طيحة سلطان في المستشفى ... تعرف يعني شو اخوي في المستشفى..؟؟
مريم من سمعت طاري ان سلطان طايح في المستشفى انقبض قلبها وحست انها هي السبب تمت مبهته مكانها ومب رايمه تظهر من الغرفه.... وأحمد يتم يزاعج وهو ينادي عليها وهي متررده انها تظهر من الغرفه ولا اتم مكانها.. وعبدالعزيز من عرف السالفه من احمد عصب.. واشتب .. كيف اخته جيه اتسوي ما كفاها المره الأولى سودت ويهنا يوم بغت تنتحر احين ترد اتسوي مشاكل من بين اثنين وواحد فيهم طايح في المستشفى والسبب طيش اخته بسرعه ربع داخل البيت وصعد الدري وتم ينادي عليها .. مريم من سمعت صوت عبدالعزيز تمت ترتقل من الخوف.. مب عارفه شو اتسوي.. لأنها تدري بأخوها ما بيعدي الليله على خير خصوصا انه انسان دين وما يرضى بمثل هذي الأمور..
تم يدق باب غرفتها وهي مب طايعه تفتح الباب..: والله يا مريووم ان ما فتحتي الباب لا أكسر الباب على راسج... فتحي الباب غربلج الله من بنت فضحتينا..
مريم تمت ساكته واتصيح مب عارفه شو اتسوي.. ومن بعدها دش احمد البيت.. وتم يصارخ: شو فيج منخشه في دارج زايغه.. بعد شو؟؟؟.. بعد ما خليتي سلطان يدخل الإنعاش والسبه انتي.. خليتي امي وخواتي كلهن يذرفن دموع عشانه وانتي هني منخشه في دارج.. تفو عليج من بنت خاله؟؟.. اتبرا منج يوم هاي سواتج.. شو من بشر انتي..
مريم انهارت من الصياح.. كأن ضميرها صحى من غفلته.. تمت ياسه على الأرض ومتسانده على الباب وملتويه على عمرها.. بس والله ما كان ودي اضره ..(بصوت واطي): انا احبه وما اتخيله لغيري عشان جذا سويت الي سويته والله مب قصدي اني اذي سلطان.. سلطان قطعه من روحي كيف بسوي به هالشي واذيه.. ما اتخيل حد ياخذه عني.. ماكان ودي اني اسوي به شي واضره..
عبدالعزيز: مريوم فتحي الباب واظهري احسن لج..
أحمد: خلها منخشه في دارها.. ماقول غير حسبي الله ونعم الوكيل منج.. بس والله اقول هالرمسه وجدام اخوج وانا واثق من رمستي.. اذا صاب شي سلطان ... والله ما بيهنالج الرقاد بعد يا مريوم لأخلي ايامج سوده مثل ما سوديتها علينا..
في هاللحظه زاد خوف مريم ما لقت عمرها غير ناشه من مكانها وفتحت الباب ومنزله راسها اتصيح.. مب منتبهه انها مب مغطيه شعرها.. واحمد من شاف هيئتها لف عنها: والله مب طايق اشوف رقعه ويهج؟؟ اعوذ بالله من شرج..
نزل من الدري.. وقف في نص الدري: بس تذكري كلامي زين.. اذا وطيتي ريولج صوبنا .. وان سمعت انج ناويه عشي.. والله يا مريم اني انا الي بوقف بويهج وقتها برويج منو احمد..
كمل دربه ونزل.. اما عبدالعزيز فمن شافها تم مصدوم فيها: والله اني اليوم اكثر يوم احتقر فيه انج اختي.. احتقرتج من قبل بس قلت ياهل.. واحين احتقرج زود.. (مسكها من شعرها).. اذا ابوي دلعج وماعرف كيف يوقفج عند حدج انا اعرف كيف اوقفج عند حدج.. (يرها من شعرها وفرها على الكنبه .. وشل عقاله وتم يضربها وهي اتصيح ولا اتصارخ ولا اتحس بالعوار.. لأنها عارفه نفسها غلطانه..).. فشلتينا.. (من بعدها مسكها من ايدها وقفها وهي من التعب ما كان فيها حيل توقف.. وهي مب رايمه تواجه اخوها في عينه.. وصفعها ذيج الصفعه الي عقتها على الأرض وضربت راسها على الرخام وبدت تنزف).. انتي موتج رحمه تدرين.. تموتين احسن.. يلعن الساعه الي ييتي فيها.. دومج مسوده ويهنا .. ليييييييييش فهميني ليش؟؟ .. قصرنا عليج بشي؟؟ .. الي تبينه تلقينه قبل لا تطلبينه..
مريم كانت دايخه وكانت تسمع رمسته ومب حاسه بعمرها وايد.. وتوه عبدالعزيز بيظهر ومتجاهل منظرها والدمان الي عليها .. صعدت امها وشافت مريم طايحه على الأرض تمت اتصيح وتنادي على عبدالعزيز.. واتصارخ: عبدالعزيييييييييز.. الحق على اختك بتموووت .. حرام عليك ليش كل ها؟؟
عبدالعزيز بقهر وغصه: خل اتموت.. حرام انها تعيش .. بس كافي الي يانا منها.. كافي..
بس ما قدر يشوف امه اتصيح.. ومهما قال ترا هالرمسه مب من قلبه تظل مريم اخته وما يهون عليه.. شلها على ظهره ودخلها الموتر وداها المستشفى.. وعلى طول الدكاتره دخلوها غرفه العنايه.. وكانو في نفس المستشفى الي فيه سلطان... أحمد من شاف عبدالعزيز صد عنه.. اما فدوى وامها سارو صوبهم ينشدون شو السالفه
ام عبدالعزيز وهي تتطالع ام سلطان: كله من ولدج.. بنتي بين الحياة والموت..
ام سلطان: اشووووو مريم اشفيها:؟؟
فدوى: خالو انتي شو اتقولين؟؟.. اخوي شو له؟؟
ام مريم: سوي عمرج ما تعرفين عن سوات ولدج... خلا عبدالعزيز يضرب اخته وطيحها.. واتقولين شو له؟؟..
عبدالعزيز: بس امي.. عن الفضايح.. كافي اختي فاضحتنا.. امي مريم غلطانه ما يحتاي حد يوزني عليها..
ام سلطان ما كانت فاهمه شي .. راحت صوب أحمد تسأله شو السالفه .. وفدوى وياها.. وقالهم أحمد الي صاير..
ام سلطان: لا.. بس الله ما يرضى جيه.. حرام البنت تنضرب هالضرب وتدخل المستشفى انا ما ارضى بهالشي
أحمد: يعني ترضين سلطان الي ما يندرى عن حاله طايح هني.. وماترضين على الي وصل سلطان لهالشي..
فدوى: صدقها امي .. حتى لو.. بتم مريم اختنا .. وهي ياهل..
أحمد: روحو لا.. اي ياهل..صخوا عني دخيلكم والله ان واصل حدي..
والكل سكت.. وصار الهم همين.. هم مريم وسلطان... وداد نشت من حاله الإغماء وتحسنت.. وهند قالت لها السالفه وقرت الرساله


ليش جيه يصير فينا لييييييييش؟؟ .. انا هالرساله كاتبتها من سنين لسلطان.. ليش يا مريم الله يسامحج..
هند: احين الي صار صار.. وما نقدر انسوي شي غير ندعي انهم يقومون بالسلامه؟؟
وداد بإستغراب: يقومون؟؟ .. ليش منو غير سلطان؟؟
هند: مريم.. اخوها من درى بالسالفه ضربها .. وقامت تنزف من راسها من الضرب
وداد: لا حراااااااااام.. (تمت اتصيح).. يارب ليش هالعذاب.. وسلطان ليش ماقالي ليش ما واجهني وسكت..

هند: اكيد خاف يظلمج .. كان محتار..
وداد تمت اتصيح في حضن هند.. ومن بعدها ظهرت عشان يسألون عن حاله مريم وسلطان.. مريم تحسنت لأن الضربه كانت سطحيه على راسها.. وسلطان استقرت حالته بس بعده تحت تأثير المسكنات راقد.. الكل ارتاح شوي من سمع هالخبر.. اما عبدالعزيز فأحالوه للتحقيق ليش إنه ضارب اخته.. وفهمهم عبدالعزيز السالفه ..
الظابط: بس ها مب اسلوب.. واذا كنت السبب في موتها شو موقفك
عبدالعزيز: افهمني.. شو موقفك لا ياك شخص وقال لك اختك هاي سواتها.. شو بترد عليه؟؟ .. شو بتقول له؟؟.. بتضحك.. وانا ريال لي سمعتي ومكانتي.. اخرتها اتيي اختي اتخرب سمعتي.. ما قدرت اتمالك اعصابي..

الظابط: والله ماعرف شو اقول لك.. بس لو اختك طالبت بفتح قضيه ومحاكمه ترا من حقها .. لأن ما يحق لك الضرب بهالطريقه
عبدالعزيز: ليش الفضايح أكثر من جيه..دخيلكم انا شو ذنبي انفضح من كل صوب.. والسبب طيش اختي..
الضابط: انا اسف هاي القوانين..
ونش عنه وماعطاه مجال يرمس.. وسار صوب غرفه مريم .. ودخل عندها كانت ياسه اتصيح.. وكلمها بالموضوع..
مريم: لا مابا..
الضابط: هاي اخر رمسه
مريم: هي نعم.. انا غلطت غطله كبيره وهاي يزاتي واقل بعد.. لازم اتحمل كل الي ييني
الضابط: وقعي هني لو سمحتي
وقعت مريم على الأوراق وظهر عنها الضابط وتلاقى ويا عبدالعزيز في الدرب: سامحها.. امبين عليها ندمانه.. وربي ايسر اموركم..
دش من عقبه عبدالعزيز عند مريم .. الي من شافته وشافت الغضب في عيونه خافت.. : عبدالعزيز .. ابا اسير عند وداد وسلطان وهلهم.. ابا اعتذر منهم واحد واحد..
عبدالعزيز تم يطالعها وساكت..
مريم: دخيلك.. والله اني ندمانه .. بس والله اباك تفهمني انا احب سلطان ولد خالتي ومن الصغر كنت امي تقول لي انتي مالج غير سلطان.. وسلطان يوم صغير كان يقول لي امج قالت اتزوجج وانا بتزوجج.. وانا تعلقت به لا تلوموني دخيلكم..(تمت اتصيح بحرقه). .. والله غصبن عني.. ما تحملت ان سلطان يكون لغيري.. تيننت .. والشيطان لعب بدوره فراسي.. سامحني والله.. ماتخيلت ان المشاكل توصل لهالدرجه..
عبدالعزيز سار صوب اخته.. وحضنها: مريم انا ما كان ودي اضربج هالضرب انتي مب ياهل عشان تنضربين.. بس ما قدرت ايود عمري.. افتشلت جدام احمد .. ولد خالتي يقول لي هالرمسه.. ماقدرت اتحمل.. وانا اسف لأني ضربتج ومديت ايدي عليج.. بس مريم انتي مب ياهل .. لو سلطان كان يباج جان ياج وخذاج.. هو ما بغاج .. ولو فرقتي امبينه وبين وداد تراه ما بياخذج.. ويوم صغار الله يسامح امي يوم خلتج تتعلقين بوهم..
مريم: يعني انت مسامحني؟
عبدالعزيز: اكيد..
مريم: عيل قوم ودني لهم اعتذر منهم..
عبدالعزيز: متأكده انج تبين اتسوين هالشي..
مريم: هيه..
عبدالعزيز: عيل اتريي لين باجر تتحسن حالته وبنسير..
مريم وهي تبتسم: خلاص اوكي..
====
في غرفة سلطان..
====
الكل كان قاعد حول سلطان ويسولفون وياه الا وداد الي كانت ياسه برع ويا هند مب رايمه اتجابل سلطان.. ويلس أحمد حذال سلطان عشان يفهمه الي صار..
أحمد: مب حرام علي الي سويته فينا زيغتنا عليك ياريال
سلطان وهو يبتسم: ماعليه.. لازم ادلع عليكم شوي اشوف غلاتي.. (بصوت واطي).. الكل هني الا وداد وينها؟
أحمد: وداد برع يا سلطان..
سلطان: ليش ما تدخل
أحمد: عرفنا بسالفه الرساله.. وداد زعلانه منك.. كيف اتشك فيها للمره الثانيه .. منجرحه منك يعني..
سلطان نزل راسه وتم ساكت.. واحمد كمل رمسته: انا بفهمك كل شي في سالفه الرساله..
تم أحمد يقول لسلطان السالفه من اولها لآخرها.. للحظه الي دخل فيها سلطان المستشفى .. تم سلطان امبهت .. في خاطره يكفخ عمره.. كيف للحظه فكر ان مريم صادقه بكلامها.. وحده مثل مريم ونواياها مستحيل تصدق
سلطان: دخيلك احمد.. قول لوداد اتيي ابا اكلمها..
أحمد: ان شاء الله
سلطان: علي..
علي: لبيه..
سلطان: لباك ربي.. علي.. سامحني دخيلك لأني شكيت فيك..
علي: افا عليك والله لا تقول هالرمسه.. امره بزعل عليك
سلطان: والله مادري انا كيف سمحت لنفسي اني اصدق مريم.. خوفي من وداد انها ما تسامحني وتخترب علاقتي وياها
علي: انا اقولك مستحيل.. وداد اتحبك
سلطان: الله يسمع منك..
في هاللحظه دشت وداد.. وفي عيونها الدموع واحمد ينادي عليها تدخل.. الكل صد صوبها يتريا رده فعلها.. وسلطان من شافها نزل راسه مفتشل من عمره.. جربت منه وداد والدمعه في عينها .. ومن قربت منه.. مسكت ايده ورصت عليها بالقو.. : الحمد لله على السلامه حبيبي (وابتسمت له )
سلطان طاااااار من الفرحه من شاف هالموقف.. ها معناته ان وداد سامحته .. وانها مب زعلانه منه.. لعلني افداج..: الله يسلمج.. سامحيني وداد
وداد: افا عليك.. انا احبك.. وماطيق الدنيا من دونك.. (وداد في هاللحظه متجاهله وجود الكل ومب معبرتنهم.. تفكيرها كله عند سلطان.. الكل يطالعها ومستغرب كيف ترمس جيه جدامهم وفي نفس الوقت استانسوا ان علاقتهم ما اختربت.. وفرحوا).. مره ثانيه لا اتسوي جيه بغيت اتموتني من الزيغه عليك
سلطان: بغيت اشوف اشكثر اتحبيني
وداد وهي تمسح دموعها وتصد بويهها واتشوف الكل يطالعها .. اختلفت الإبتسامات من خبث وفرح .. افتشلت وانصبغ ويهها.. لا اراديا غطت ويهها بإيدها.. جنها ياهل.. الكل تم يضحك بصوت عالي.. هادف وناصر واحمد تموا يصفرون ويعلقون.. جانتفش ايديها وتتطالعهم نظره خبيثه.. واتحرك شفايفها بصوت واطي اتقول لهم: انا اراويكم يالحمير..
وظهرت من الغرفه.. وتم يطالع سلطان وداد وهي تمشي لين ما ظهرت.. وتم الكل عنده لين الساعه 11.00 وراغوهم المساكين الأمن الي في المستشفى لأن وقت الزيارات خلص وهم تموا اكثر من الوقت المسموح.. ظهر الكل وهو مستانس.. وفدوى وام سلطان راحوا عشان ينشدون عن مريم قالو انها طلعوها لأن حالتها ما تستدعي انها اتم في المستشفى.. وردوا البيت

====
في بيت بوسعيد
===============
غزلان وعلي.. وهند.. قاعدين يسولفون..
غزلان: الصراحه كله ولا اللحظه الرومانسيه.. جان زين لو صورنا المقطع
علي: هي والله.. ههه وحليلهم.. الله يهنيهم..
هند: ولا وداد مب حاسه في عمرها.. شقايل غطت ويهها من الفشيله..
غزلان: وينك يا خلادي..
هند: هههههههه.. بدت العاشقه الولهانه..
علي: روحي رمسي حبيبج من الصبح حارق تليفونج وانتي ما تردين..
غزلان: اتصدقون ما كنت حاسه بالتليفون .. والله بالي كان مشغول في سلطان..
في هالوقت رن تليفون غزلان ولأنها حاطتنه على الهزاز فزت من مكانها وخافت .. ففرت التليفون.. : بسم الله الرحمن الرحيم.. من طريناه دق.. يني..
هند: خل يسمعج اتقولين جيه عنه..
غزلان: مابا ارد اخاف..
علي: ليييييييييييش؟
غزلان: احين لازم ايلس ساعه اراضيه وانا مب فايجه.. علو .. شو اسوي به ربيعك دلوع
علي: ههههه .. عادي دلعيه شرات ما دلعت وداد ريلها ما تعلمتي..
غزلان وهي تمشي عالدري: يبالي اخذ كورس من عندها.. (ردت على التليفون).. مرحبا..
علي: وحليلها..
هند: الله يهنيهم ويا رياييلهم.؟.
علي وهو يتأمل ملامح هند الي كانت اتلف شيلتها واتعدلها.. ومب حاس في عمره: ويهنيني وياج..
هند في هاللحظه فجت عينها ورفعت راسها .. تمت تتطالعه وهي مبهته.. شو يقول ها؟؟.. شو يخربط؟؟ .. تلاقت نظراتهم.. هند كلها تساؤلات.. وعلي كلها حب وشوق..
هند:ااانا.. ببسير ارقد..
علي: ليش؟تو الناس.. قعدي وياي؟؟
هند بإرتباك مب عارفه شو اتسوي: لا ماعليه برقد..
علي: انا مافيني رقاد
هند: انزين بقعد شوي بس..
علي: ماعليه.. هند.. ممكن اصارحج بشي.. لني ماروم امسك عمري اكثر من جيه..
هند وهي مستغربه : شو السالفه؟
علي:.. هند.. انا.. انا..
احبك . واقولها ماهمني شـي @@ ماهمنـي هالنـاس هالعالـم يا ضنيني فـي شعـوري

ياللي اسرتني بين هالرمش وذاك(تم يأشر على رومشه) @@ ماخفـت تجنـي بحياتـي(ويأشر على قلبه) دون لا تشعرنـي
حبك ضيعني وتوهني وجنــنـي(تم يأشر على راسه بحركه الجنون) @@ بيـن شوقـي ولهفتـي ... ونظـره ضيعنـي
غربلني وعفسني وشغلني وعـن @@ دروبـي ضيعنـي واسحرنـي ... واسرنـي

ومن اسرني ... احرمني من نومي(غمض عيونه بخفه وكل حنيه.. تمت هند تتأمل كل حركاته ومب مصدقه الموقف) @@ وذوقني عذاب الحب واشعلني يـا عذابـي
بطلبك يا حب يا شمعة تنور درب @@ تسمحن لي ارخي الهرمش(يأشر على رموشه) لا صرت تمرن بي
(تأليف ™§ SweeT HearT §™)
هند من سمعت هالرمسه من علي وهي مب مصدقه الجو الي هي عايشتنه.. ياربي انا في حلم ولا في علم.. معقوله الي قاعد يصير جدامي أحين.. معقوله انا ياسه اسمع علي يقول لي انا هالرمسه.. نزلت راسها.. وتمت ماسكه طرف الشيله.. وتلعب فيها.. رفعت راسها لوهله شافت نظرات علي الي كانت متجهة صوبها... ردت نزلت راسها.. وتوها بتنشي جان يزقرها علي: هند..
هند تيبست مكانها.. مب عارفه شو تقول.. شو ترد ..
علي: هند.. انا والله احبج من قبل لا اشوفج.. ويوم شفتج وطلعتي بنت خالتي ياحلاة الحب في عيني وياج.. هند.. انا اباج.. هند انا محتاج لوقفتج يمي..
هند تمت متيبسه مكانها.. بعدها مب مصدقه الموقف..لما قال لها علي اباج.. حشت بجسمها ينتفض بطريقه غير طبيعيه.. من المفاجأة تحس قلبها بيوقف.. معقوله يحبني مثل ما انا احبه.. معقوله حس بحبي له..
علي: ليش ساكته.. هند..
هند من غير لا تحس بدت تذرف دموعها.. بس تحاول ما تبينهم بس لاحظ هالشي علي.. : علي انت شو تقول.. انت تدري ان انا ماقدر اعرس.. (رفعت راسها وهي تناظر عيونه.. وعينوها بحر من الدموع).. لا تبني على أساس من الوهم .. انا ماقدر..
قاطعها علي: هند.. كل شي بإيد رب العالمين.. وربج روحه ايسر.. انت تقدرين وصدقيني انا ما برضى بغيرج حليله لي..
هند نشت والدموع تذرف من عيونها ومشت عنه بسرعه صوب غرفتها.. وعلي كان بيلحقها بس تردد وتم مكانه.. يالس يفكر في هند.. الي من دخلت الحجره وهي ما تسكت من الصياح.. كيف هذا كله يصير .. لا مستحيل اني اعذب علي وياي.. انا ما اصلح له.. هالحب لازم يتم بس حب.. ما يزيد لأي علاقه ثانيه.. آآآآآه يا علي.. تعبت..
وتمت لاويه على المخده الي على سريرها واتصيح بحرقه.. لين ما اذن الفجر نشت وتمسحت وصلت لها ركعتين الفجر وقرت لها شوي من القرآن وظهرت من الغرفه عشان تنزل تشرب ماي وتاخذ دواها.. شافت علي يالس في الصاله وحاط ايده ورى راسه ومتساند على الكنبه سرحان.. نزلت بهدوء عشان ما يحس فيها خصوصا انه كان مغمض.. بس علي كان في هاللحظه يفكر في هند كيف ما بيحس فيها وهو يحس بها تمشي في عروقه.. يحس بريحتها لو من بعيد.. فتح عينه ولقاها تتخطى عنه صوب المطبخ.. تم يطالعها.. مستحيل اني اتخلى عنج يا هند بهالسهوله.. وانتي احس بج صرتي قطعه مني.. نش من مكانه واصطلب مكانه ومشى صوب المطبخ وشاف هند ياسه وتتطالع من الجامه وتشرب لها كوب حليب وسرحانه.. وهي شافت ظله في الجامه بس ما صدت صوبه..
علي: هند.. انا اباج .. ابااااااااااااج..
نشت عنه هند ولا عطته مجال يرمس وتوها بتتخطاه.. مسكها علي من ايدها.. حست بكهربا تسري في كل عروقها.. تمت ترتعش وتعرق.. وعلي الي عمره ما لمسها بس هالمره غير.. من لمسها حس نفسه مب قادر يرمس.. مستحيل هالإنسانه ابعدها عني.. : هند انتي لي انا فاهمه.. ومافي شي يمنعني عنج..
هند تمت اتصيح: علي افهمني انا ..
علي حط ايده شوي بعيد صوب ثمها.. : اسكتي.. لا تنطقين بولا كلمه.. انا احبج.. وانا اباج.. فاهمه.. وانتي اتحبيني وماترومين تنكرين هالشي لأنه باين في عيونج (تم يطالعها في عينها وهي متفجأة مب رايمه اتنزل عينها).. يلا سيري رقدي لأن الشمس طلعت وانتي بعدج واعيه..
هند تخطته وسارت صوب البيت عشان تدخل وتصعد غرفتها.. وعلي تم طول الوقت يطالعها وهي تمشي.. تساند على اليدار وربع ايديه وتم يطالع وسرحان.. يارب .. اتكون من نصيبي..
الكل كان راقد وراح علي ورقد..
عالساعه 11.00 الكل نش عشان يتزهبون لصلاة العشى.. ومن بعدها تروح وداد لسلطان وتيلس وياه.. أحمد طبعا ما يروم يطول وايد وياهم لأنه عالساعه 4.00 بيسير ويا ربيعه الكلية.. من خلص الصلاة راح عند سلطان .. ودخل عنده
أحمد: هلا والله اشحااااااااالك؟؟
جرب منه وتخاشم وياهم ويلس حذاله استانس سلطان يوم شافه اخيرا في حد بيشيله عنه الملل وتم يسولف وياه لين ما سمعوا دقه الباب والكل صد صوب الباب يتريون من بيدخل عليهم .. كانت غزلان ويا وداد استانس سلطان يوم شاف وداد تمت غزلان تتطالع وداد بخبث وتضحك.. تجاهلت غزلان نظراتها وسلموا على سلطان وقعدوا..
غزلان: اقول احمد.. امس قريت قصه روميو وجولييت مب شي الصراحه شي قصص حب(وتتطالع وداد وسلطان).. أحلى بوااااااااااااااااااااااايد..
سلطان فهم نغزاتها وتم يطالع وداد الي كانت تتوعد لها بنظراتها.. ووده يضحك بس ماسك عمره عن تعصب وداد..
أحمد: هيه والله.. ولا ليلى وقيس رامو عليهم..
وداد: احم احم..
غزلان: اختي حبيبتي شي بلاج.. بلاعيمج اتعورج ترانا في المستشفى ..
أحمد: لا صوتها رايح ماتروم ترمس..
غزلان: ساير يشم هوا..ههههههه
وداد: الحمد لله والشكر..
وفي هالوقت دخلت ام سلطان وياها منى.. الي من شافها أحمد تم مصطلب مكانه.. وهي من شافته اطالعته بنظره لوم .. يعني هي بعدها زعلانه.. ونشوا الحريم سلموا على بعض ويلسو ومن بعدها دخل بوسلطان وياه ناصر.. وقعدوا الرياييل بصوب والحريم بصوب..
منى: الحمد لله على السلامه سلطان..
سلطان: الله يسلمج اختي.. ليش متعبه عمرج..
منى: افا عليك لا متعبه عمري ولا شياته.. ولا تنسى بعد ان لك ويانا وقفات ما تنسى وهالشي الي اسويه الا هو شي بسيط ممكن اوفيه به حقك..
سلطان: لا تقولين هالرمسه ترا بزعل منج.. الا وينه عارف ما يه وياج.. ؟؟
منى: لا يستحي تدري حريم هني.. قال بيتصل فيك خلاف..
سلطان: مب مشكله اهم شي انتي مرتاحه..
منى: الحمد لله..
وتموا يسولفون ومر الوقت وصارت الساعه 3.00 وهم مب حاسين بأعمارهم.. نشت منى من بعد ما دقت لعارف عشان اييها وياخذها.. وظهرت من الحجره بعد ما سلمت عليهم كلهم.. نش أحمد من غير لا يحس ان الكل لاحظ عليه ولحق منى.. الكل ابتسم.. خصوصا ام سلطان لأنها تحب منى وتتمناها تكون من نصيب أحمد..
أحمد مشى ورى منى .. : منى..
منى صدت وراها وشافت احمد .. بس ما عطته ويه ومشت.. تم ينادي عليها لين ما وقفت.. : منى .. انا اسف..
منى: على شو؟؟
أحمد وهو يطالعها وفاهم انها تستهبل: شو على الشو.. على الي صار أمس..
منى: لا ماصار شي.. ذكرني بس جان صاير شي وانا مادري..
أحمد وهو مفتشل منها نزل راسه: منى انا ماكان قصدي.. بس والله من ربكتي واليوله الي صارت عشان سلطان حسيت راسي مفتر مب رايم افكر عدل..
منى: وانا شو ذنبي اتصرخ بويهي .. ليش اتطلع حرتك فيني انا؟؟
أحمد: انا اسف عااااااد.. خل قلبج حنون وسامحيني..
منى تمت تتطالع حركاته الي كان يسويها بكل عفويه .. ابتسمت له ومشت عنه.. إرتاح أحمد حس انها سامحته.. وتوه بيرد الغرفه .. بس صد ورى وزقرها: منى.. (منى لفت صوبه).. انزين سلمي علي قبل لا تروحين..
منى: ههههه.. مع السلامه..
أحمد: بحفظ الله.. ابا ايي الإسبوع الياي واشوفج انتي الي تفتحين لي الباب.. وتفرشين لي زوليه حمرا بعد لا تنسين..
منى ابتسمت وهزت راسها على اساس انها موافقه على كلامه ومشت.. وتم أحمد يطالعها .. ومستغرب من عمره.. ليش جذبتني هالبنت بالذات.. مع انها عاديه.. بس فيها شي غريب جذبني

ليش جيه مهتم.. (فجأة ينصدم ويفج عيونه).. يالفشيله انا ظهرت جدامهم ورى مريوم.. احين شو يسكت نصور وغزلانو هاييل .. اففف.. صدق اني فضيحه يعني لازم اظهر على طول وراها.. جان اترييت شوي.. اسميني بعد..
رد الغرفه والكل تم يطالعه بنظره خبث.. وهو تجاهل النظره : سلطان بوعبيد يسلم عليك..
سلطان ماعرف منو بوعبيد.. وماحب يفشل أحمد: الله يسلمه.. شخباره.. ؟؟
أحمد: بخير.. يتحمد لك بالسلامه..
ام سلطان وهي تتطالعه بخبث: منو بوعبيد أحمد؟؟ .. اول مره تطري هالإسم..
أحمد: ها واحد من الربع دقيت عليه اشوف متى بييني..
غزلان بخبث: هيييييييه .. دقيت عليه .. سلم عليه بدالي بعد.. سلام كثير كثير..
أحمد فهم نغزاتها.. وتم يطالعها وهو مضوق في عيونه .. وسلم على سلطان وهله عشان يروح يتلبس ويسير الكليه ويا ربيعه.. وتوه بيظهر جابل عبدالعزيز وكانت مريم وراه.. سلم على ابراهيم وتوه بيخطف حذال مريم من غير لا يسلم عليها.. نادت عليه.. وقف مكانه من غير لا يصد صوبها: شو عندج من بلاوي يديده..
مريم: أحمد انا ندمانه على كل شي صار.. وانا يايه استسمح من الكل واولهم انت وسلطان و وداد وعلي.. والباقي.. ابا افتح صفحه يديده مع الكل..
أحمد: انا ما يحتاي تستمحين مني.. سيري عند اصحاب الشأن استسمحي منهم.. واتمنى اتكونين صادقه وماتكون لعبه يديده منج.. بس انا حذرتج من قبل وتذكري تحذيري زييييييين
وسار أحمد من غير لا يسمعها شو بترد.. وعبدالعزيز ما لام أحمد على رمسته لأنه عارف ان معاه حق.. ودقوا الباب ودشوا.. الكل من شافهم انصدموا.. وأولهم سلطان ووداد .. سلطان عصب من شاف مريم .. لولا هله الي يالسين جان قطعها بالرمسه.. بس نزل راسه لأنه حاس عمره مب رايمه يطالع ويهها.. وسار عبدالعزيز وسلم على سلطان وتعذر منه.. وقاله بصوت واطي ان مريم يايه تستسمح.. وداد كان ودها تظهر من المكان وما تقعد فيه.. وعلي نفس الشي.. بس سلطان منعهم.. وغزلان الغضب في عيونها ودها تنش من مكانها وتمسك مريم وتسدحها على الأرض وتلعب ملاكمه وياها.. وتمط شعرها..
مريم كانت ملاحظه لنظراتهم.. وحست بالي سوته .. وشو الي جنته من ورى عمايلها.. تمت عيونها تدمع.. وجربت من سلطان.. : سلطان..
سلطان ما صد حتى يطالعها تم ساكت.. وهي تمت اتمسح دموعها وترمس: سلطان انا اسفه.. يايه اليوم عشان افتح صفحه يديده مع الكل.. واكسر حاجز العمايل الي سويتها واعتذر من الكل أولهم انت ووداد وعلي.. الي تسببت لكم بهالمشاكل.. بس سلطان انا الي سويته من قله عقلي.. لأني من صغري وانا اسمع طاري انك لي انا.. وهالشي الي خلاني ما اتقبل فكره انك تاخذ وداد.. وكنت دايما حاطه في بالي انك اتحبني.. بس اليوم بس تأكدت ان مالك غير وداد في هالدنيا..
سلطان: مريم.. مايحتاي هالكلام كله.. يكفي انج تكونين صادقه مع نفسج وبكلامج.. وفعلا نادمه على الي سويتيه اهم شي الندم.. وانتي اخت عزيزه وغاليه ..
مريم استانست من رمسى سلطان.. واتجهت صوب وداد الي بطبعها السموح وقلبها الطيب والكبير مارامت غير انها تحضن مريم واتهديها من الصياح.. : مريم ما يحتاي اتقولين اي كلمه.. انا في عمري ما حطيت في خاطري منج وانتي تدرين .. فديتج (وتمت تمسح على راسها واتطبطب على ظهرها.. والكل مستغرب من تصرف وداد خصوصا سلطان الي كبرت في عينه وداد بعقلها الكبير.. ).. خلاص عاد بلا دلع..
نشت عنها مريم وهي تشكرها وتستمح منها.. وصدت صوب علي: اسفه علي.. ماكان ودي اهينك.. (قاطعها علي وماخلاها اتكمل)..
علي: لا تقولين هالرمسه.. دام ان الكل سامحج انا بعد بسامحج.. مابيني وبينج شي عشان ماسامحج.. وربي يهديج
مريم استانست ان الكل سامحها .. وأكثر واحد كان مستانس عبدالعزيز.. وسارت مريم صوب خالتها وتمت اتصيح في حضنها وتبوس ايدها عشان تسامحها على الي تسببته لسلطان.. بس ام سلطان مستحيل تزعل من بنت اختها لأنها في النهايه شرات بنتها.. وتموا يهدون مريم.. وقعدوها وياهم وسولفو وياها عشان تنسى كل الي صار.. ومن بعدها ظهرت لأن مع ذلك حاسه عمرها مالها ويه اتجابلهم زود.. بعدها مفتشله منهم.. ونشت وسلمت عليهم وظهرت ويا اخوها الي كان مستانس للي سوته.. وتم طول الوقت حاط ايده عجتفها وهي لاويه براسها على جتف عبدالعزيز.. وساروا...
==========
في البيت
هند كانت ياسه روحها اتفكر في الي صار امس.. مب مصدقه بعدها ان الي صار صدق وماكان حلم.. وتمت اتفكر واتفكر.. لين ما رن التليفون وفزت عليه.. نشت شافت مكتوب مكالمه (يعني من برع البلاد)... ردت بسرعه.
سعيد: هلا والله هندووووووو.. هلا وغلا بالتوأم مالي؟..
هند في قلبها.. جن الا اخوي حاس بي.. : هلا والله بأخوي الغالي.. اشحالك؟؟
سعيد: بخيييير طاب حالج.. اشحالج انتي واشحال الأهل.. ؟؟
هند: كلهم بخير.. متولهين عليك.. متى بتخلص ياخي ملينا .. طفرنا من القعده هني من غيرك.. موشي البيت من دونك
سعيد: ادري ادري مايحتاي اتقولين
هند: دومك خقاق..
سعيد: اقول هند.. انا ماروم اطول لأن البطاقه الي عندي شوي وبتقطع بس خبريني عالسريع شو صار بموضوع وداد لأني واااايد كنت احاتي..
هند: اطمن كل شي بخير.. ورد طبيعي
سعيد: هي.. هاي الأخبار ولا بلاش.. طمنتيني ربي يطمنج بالخير.. انزين بخبرج شي بس اياني واياج تقولين لأي حد.. بقولج لأنج توأم مالي بس..
هند : شو السالفه؟؟
سعيد: اوعديني بالأول محد يدري بالسالفه؟؟
هند: قوووول طيحت قلبي..
سعيد: أنــا..

كرهتوني صح.. وقفت في نقطه حساسه..
ماعليه لزوم التشويق؟؟
شو تتوقعون سعيد يقول لهند.. شو هالسر؟؟
ومريم .. ياترى صدق ندمت واصطلح حالها؟؟
هند.. بتظل رافضه فكره علاقتها ويا علي.. ؟؟
منى وأحمد.. كيف ممكن تتطور علاقتهم.. معقوله منى بتقدر اتنسيه حصه؟؟
غزلان وخالد.. شو التطورات الي ممكن تصير من بينهم؟؟
ورمضان جرب.. يعني السفر للعمره جرب..؟؟
انتظروني..

سعيد: اقول هند.. انا ماروم اطول لأن البطاقه الي عندي شوي وبتقطع بس خبريني عالسريع شو صار بموضوع وداد لأني واااايد كنت احاتي..
هند: اطمن كل شي بخير.. ورد طبيعي
سعيد: هي.. هاي الأخبار ولا بلاش.. طمنتيني ربي يطمنج بالخير.. انزين بخبرج شي بس اياني واياج تقولين لأي حد.. بقولج لأنج توأم مالي بس..
هند : شو السالفه؟؟
سعيد: اوعديني بالأول محد يدري بالسالفه؟؟
هند: قوووول طيحت قلبي..
سعيد: أنــا..


هند: انت شوو..
سعيد: انا سعيد.. هههههههههه..

هند: سخييييف والله انك سخيف.. ماحبك مادانيك.. قلت احين بيقول انا راد البلاد ومن هالرمسه الي تفرح القلب.. جني الا ماعرف انك سعيد ..

سعيد: هههههه .. ادري بس قلت اذكرج يعني ..

هند: اقول.. اجلب ويهك.. شو بطاقتك ما بتخلص..

سعيد: افاااا.. الحلو زعل.. يلا عااااد.. هنوووده.. عاد انتوا البنات غير شكل من اتمدن بوزكن خلاص شو يرده..

هند: وانا اروم ازعل من توأمي.. لو أحاول ترا ما يهون علي..

سعيد: ادري.. فديت روحج.. ليش تبين بطاقتي اتخلص.. مب مشتاقه لي؟؟

هند: لا والله لا تقول جيه.. من كثر ما تولهت عليك ودي اييك هناك..

سعيد: تعاااااااالي.. انتي ماوراج دراسه ولا شي.. شو رايج اتيين عندي والله اني طفران هني مب عارف شو اسوي .. على الأقل بتسليني

هند: وين ايي بلاد الغربه.. ولا تنسى انك تروح الكليه وترد متأخر يادوب بيلس وياك فليل.. وبعدين اناماروم افارق امي وابوي..

سعيد: وافديت طاريهم انا.. اشحالهم؟؟

هند: بخير.. دوم يطرونك ومشتاقين لك وايد

سعيد: انا اكثر منهم صدقيني

هند:عيل شد حيلك ورد البلاد

سعيد:الله كريم...اقول البطاقه بدت تقطع شكله بيخلص.. سلمي على الكل خلاف بدق لهم

هند: يبلغ ان شاااء الله في امان الله

سعيد: مع السلامه

بند سعيد عن هند وهو حاس براحه شديده للخبر الي سمعه عن وداد وسلطان .. من بند تم يطالعه وضحان بإستغراب بلاه يضحك بهالطريقه...شافه يوم بند الخط.. عرف ان اكيد الأمور تحسنت في بيتهم.. فجأة ارتبش سعيد... تم ايول ويغني.. ويحرك بإيده صوب وضحان كأنه يهدي له هالإغنيه..

متى أشوفك نظرعيني.. تنور عمري وسنيني.. انا مالي سواك(يأشر على وضحان).. تعبني الشوف واضناني.. وخلاني مع احزاني.. تعب قلبي(ويأشر على قلبه) معاه..(وغير الإغنيه).. باقي من الوقت لي عندك ربع ساعه(يأشر على الساعه الي في ايده).. واروح واغيب عنك طول الأيامي.. اشوفك اليوم.. بعد الضحك مرتااااحه.. واليوم بروح.. لو تبكين(ينزل صبعه من تحت عينه على خده كأنه دموع) جدامي..

وضحان: عاش الرجال مرتبش اليوم..

سعيد: الا شو مب مرتبش.. أول مره احس براحه نفسيه من بعد السالفه الي ضايجت بي..

وضحان: عسى ايامك كلها فرح

سعيد: آميييييييين يارب..

وضحان: انزين.. خل عنك الرقص والأغاني لبعدين ورانا شغل ترتيب الشقه قبل لا نخليها وننقل اغراضنا للشقه الثانيه..

سعيد: اوووووكي.. انا اليوم بسوي كل شي.. حاضر.. انت امر بس..

وضحان: شو هالنشاط.. عساه دوم.. عشان ماعود اشتغل..

سعيد:لا تجرح احساسي.. انا انسان حساسي.. ليتك تداريني.. واتحس ياقاسي.. واااااااه فديت غزولتي والله تولهت عليج..

وضحان اطالع سعيد واستانس لوضع سعيد والفرحه الي هو فيها.. وكمل شغله وسعيد تم يغني ويشتغل ويا وضحان.. لين ماخلا وضحان يرتبش وياه .. شوي يشل اغراض وشوي يرقص ..

===============

هند من بعد ما بندت عن سعيد وهي تفكر في علي.. كيف ترد عليه.. كيف تقدر انها ترفضه وتصده.. وهي كل مالها تحس به يقرب منها زود وهي تتعلق به اكثر واكثر.. ياربي ساعدني.. وفي هالوقت سمعت حشره غزلان..

غزلان: اففففف.. ليش انزين انا بغيت اتم زياده

ناصر: ههه.. كم مره اقول لج ما يخلون اليهال يقعدون وايد..

هادف:كم بتفهمها ولا بتفهم..

غزلان: لو سمحتو.. احترموا نفسكم.. ترا انا اكبر عنكم..

ناصر: اسمع اونها اكبر. الا هو شهرين ونص.. اونه اكبر..

غزلان صدت صوب هادف وتمت تتطالعه بغضب.. وهو تم يبتسم لها ابتسامه بريئه.. : نصور اليوم ياي عندكم.. هاي شكلها ناويه تجتلني..

غزلان: توقع اي شي مني..

هند: شوفيكم.. شو هالحشره..

ناصر وهو يأشر بإيده صوب غزلان: مادريبها هاي عيوز ماكلين عشاها.. حشرتنا طول الدرب..

هند: غزلان شو صاير؟؟

غزلان وهي تمد بوزها : ماخلوني ايلس ويا سلطان اكثر خلوني غصب ارد البيت..

هادف: هند.. يعني انتي ماتعرفين قوانين المستشفيات ان الأطفال ممنوع عليهم الدخول.. بس دخلوها بتصريح وانتهت صلاحية التصريح..

هند تمت تضحك على رمسه هادف.. وتشوف شكل غزلان والشراره طالعه من عيونها.. : انزين تعالو.. مسويه سويتات عجب.. الي يلحق يلحق.. والي ما لحق كيفه..

وفي هالوقت سمعت صوت من وراها.. كان علي.. توه داش وسمع رمستها: عيل خل الحق..

غزلان: افففف.. عز الله تم لنا شي من السويت..

علي: شو قصدج دب انا..

هند انصدمت.. بس ابتسمت له كعادتها وسارت صوب المطبخ.. وبسرعه فرت غزلان عباتها وتمت بالشيله وربعت وراهم المطبخ عشان تلحق على السويتات وتاكل منهم.. وتموا يسولفون ويضحكون.. وكان علي ما يشل عينه من على هند وطول الوقت نظراتهم موجهه لبعض.. بس الكل كان منشغل بالسوالف وما انتبهوا..

======

في بيت عادل..

أميره: أمي شو احط في الطحين احين..

عادل وهو داش المطبخ: لاحووووول.. مشكله الي مايعرفون يطبخون ويسوون اعمارهم شي..

أميره: جب انت.. اصلا انت تمووووت على اكلي..

عادل: اي اكل.. انتي ولا تعرفين شي.. كل شوي تسألين امي..

أميره: لا اعرف بس ابا اتأكد.. مافيها شي,..

عادل: لا مافيها شي..

أميره: بنشووووف حصوص شو بتسوي لك..

عادل: حصوص.. اتعرف.. وقايله لي عن اكله اتحداج ترومين عليها.. وكل يوم بتأكلني اياها..

أميره: شو.. فتحت شهيتي الصراحه من قبل لا اعرف الأكله ..

عادل: بعد اكله مفيده كلها بروتينات.. ومواد غذائيه مفيده.. شي شي..

أميره: شو انزين.

عادل: مابقول.. قالت لي خلطه سريه ماقول عنها..

أميره: خلاص انا بدق لها وبسألها..

عادل بسرعه يلحق اميره قبل لا تشل تليفونها: لا لا لالا ..

أميره: ههههه.. رياييل ما ايون الا بالعين الحمرا.. (تمت اتصرخ في ويهه بكلمه حمرا وردت مكانها اتكمل شغلها)..

عادل: مشكله.. ترا اذا سألتيها بتيلس تتحرطم علي ليش قلت وكشفت موهبتها في هالأكله.. بس بقولج اياها ولا تقولين لحد..

أميره: لا مابقول قول..

عادل وهو يطالع حوالينه اذا في احد.. ويهمس لها: بيض وطماط..

أميره بغت اتمووووت ضحك.. كملت التمثيليه وجربت منه وفي ايدها كله طحين.. : ههه.. مابقول لحد.. (وجان اتمشي الطحين في ويهه.. عصب ورد وصخ ويهها بالطحين.. ).. يالخايس انا اراويك..

شرد عنها عادل وتم يضحك.. كانت ام عادل في هالوقت توها بنده التليفون ومن شافت هالمنظر استانست ان الفرحه بعدها في البيت.. وتمت تدعي ان هالفرحه تدوم.. دوم.. وسارت عند أميره اتساعدها وعادل من دخل غرفته بسرعه شل التليفون واتصل في حصه .. وعرف منها ان سلطان في المستشفى..

عادل: والله مايستاهل.. لازم ازوره..

حصه: هيه اتسوي خير..

عادل: سلطان ريال والنعم فيه.. الصراحه انعجبت في شخصيته يوم قعدت وياه يوم خطوبه اخته..

حصه: عايله غزلان كلهم طيبين..

عادل: لو كان عندي اخو..جان خليته يناسبهم..

حصه: انا كان ودي انها تكون مرت اخوي.. بس الله ماراد..

عادل: يالله ماعليه.. الله كريم.. الله يوفقها احين..

حصه: انزين انت بتزور سلطان عندك رقمه ولا اي شي.. ؟؟

عادل: لا زين قلتي لي.. خذي رقمه وعطيني اياه..

حصه: خلاص.. انا بدق في غزلان وبسألها عن رقم سلطان وبعطيك اياه..

عادل: خلاص اوكي..

بندت حصه عن عادل واتصلت في غزلان شافته مشغول.. جان تضحك وتكتب لها مسج.. (بس بابا لا يسوي جرجر واجد مافي جين).. غزلان من قرت المسج ماتت من الضحك وقالت لخالد..

خالد: اففففف حاسدينا حتى على سوالفنا..

غزلان: شفت عاد..

خالد: لايكون بتبندين.. ؟؟

غزلان: اكيد تبا شي ضروري ولا ما بطرش مسج لو كان مشغول..

خالد: خلاص شوفيها شو تبا وانا بسير الميلس لأن في رياييل يايينا..

غزلان: خلاص خير ان شاء الله..

خالد: يلا حبيبي.. احبج مع السلامه

غزلان: في امان الله..

بندت عنه واتصلت في حصه..

غزلان: هلا والله بحصووووص..

حصه: زعلانه منج.. ليش شاغله الخط؟؟ ماتعرفين انا بتصل..

غزلان: فدييييييييتج.. ههههه.. شوعرفني لو ادري جان ما شغلت..

حصه: فديت روحج..مابضيع وقتج وايد.. بس بغيت اسألج كم رقم سلطان لأن عادل يبا يزوره

غزلان: وحليله ريلج.. لحظه بجيك عالتليفون.. (تمت تتعبث وظهرت رقم سلطان).. هاج سجلي..

حصه: لحظه.. يلا قولي..

غزلان: ******.. كتبتي..

حصه: هي .. مشكوووووره

غزلان: العفو .. اشحالج..؟؟

حصه:بخير.. اقول.. بعطي الرقم لعادل وبستأذن من امي وبيي بيتكم تولهت عليج يالدبه.

غزلان: محد دب غيرج.. ويلا اترياج

حصه: اوكي..

بندت عن غزلان ودقت لعادل وعطته رقم سلطان واستأذنت من امها وسارت بيت غزلان..

سلطان كان يالس في هالوقت ويا وداد بروحهم في الغرفه بعد ما رد الكل.. ويسولفون.. ويضحكون.. ناسين كل همومهم.. ومتذكرين بس الحب الي بينهم.. في هالوقت رن تليفون سلطان ماعرف الرقد ورد عليه..

سلطان: الوو

عادل: مرحبا الساع..

سلطان: مرااااحب.. ماعرفنا الشيخ ؟؟ منو ويانا؟

عادل: وياك عادل ..

سلطان:عااااادل.. اشحالك؟؟ شخبارك؟؟

عادل: بخير.. شو هالأخبار الي سمعناها .. ماشر ان شاء الله.. شو وداك المستشفى وطيح بك جي

سلطان: بعد .. المرض مايرحم ياخوي..

عادل: صدقت والله.. صدق ان المرض ما يرحم.. بغيت انشد اذا انت بعدك في المستشفى ولا رديت لأني بغيت ازورك ..

سلطان: ليش هالعباله والتعب كله.. مايحتاي.. اتصالك يسد..

عادل: لا ها واجب لا تقول هالرمسه..

سلطان: تسلم والله.. من طيب اصلك.. انا والله بعدني في المستشفى لين باجر.. وجان بغيت اتيي تعال غرفه 13 عنبر الرجال..

عادل: خلاص امره تم..

سلطان: حياك الله

عادل: مع السلامه..

بند سلطان عنه وصد صوب وداد الي كانت واقفه صوب الجامه وتتأمل برع.. تم يطالعها سلطان وسرحان.. : ليش وقفتي بعيد عني.. تعالي يسي صوبي.. خليني اجابل هالويه لعلني فداه تولهت عليه

وداد: حتى انا والله بعد.. يمكن زود عنك بعد.. لعل ربي لا يخليني منك

سلطان : ولا منج عيوني

وداد: شو ربيعك احين بيي؟؟

سلطان: مادري شي جي قال

وداد:شو تعرف انت عل ليش اسألك..

سلطان: هههههههه.. فديتج والله

وداد استحت ونزلت راسها.. : بس عاد بلا دلع اونج عاد

وداد: هههههه.. مشكلتي ماروم امثل

سلطان: وهالحلو فيج..

وداد: يلا هذو اتصل علي اكيد ياي.. انا بروح عيل

سلطان: خلاص سلمي على الكل وتعالي باجر.. ترا بشتاق

وداد وهي تبتسم له: ان شاء الله ..

وظهرت من الغرفه.. عشان ترد البيت..

==========

في بيت بوخالد في الميالس..

----: الا ما قلت لي بوخالد.. من بنته خذتوا لخالد..

بوخالد: بنت خليفه العمران..

-----: خليفه العمران.. اخبرك بوسالم.. منو خليفه العمران نعرفه؟؟

بوسالم: والله يابوعمر اظني راعي شركه المقاولات..

بوعمر: هيه..

بوجاسم: لحظه.. مب ها الي ولده دش السجن من فتره ليش انه طعن ربيعه؟؟

بوخالد: اشووووو.. منو الي دش السجن..

بوسالم: بلا بلا.. ذكرت.. هيه ولده اظني اسمه.. ها.. ها..

خالد قاطعه وهو مستغرب من الي يسمعه ومتفاجئ: هادف..

بوسالم: عليك نور .. هادف..

في هاللحظه صد بوخالد صوب ولده خالد الي روحه مب عارف شو السالفه.. : داش السجن؟؟ متى هالكلام؟؟

بوعمر: من فتره بسيطه.. عنبو مناسبينهم وماتدرون بهالشي..

بوخالد حس بالفشله من رمسه ربيعه.. تم منزل راسه ويعابل بمسباحه.. وساكت.. وخالد بسرعه غير السالفه عشان يخف على الجو الي مكهرب من بينهم.. وخلصوا سوالفهم وتعشوا وسارو.. تم بوخالد وخالد في الميالس روحهم..

بوخالد: خااااالد.. شو ها الرمسه الي سمعتها.. شو انت تلعب علينا؟؟

خالد: والله ما كنت ادري بهالموضوع ابد..

بوخالد: شقايل ما تدري واتقول انها من هل ربيعك؟؟

خالد: بس عمره ربيعي ماياب لي هالطاري..

بوخالد: معلوم ما بييب لك طاري سواد ويهم.. اخرتنا اناسب ناس مجرمين.. خالد.. دام ان النفس عليك طيبه.. وبعده ما توقهقنا بعايله خريجي السجون هاييل ابتعد عنهم..

خالد وهو منصدم: شووووو.. لا ابوي ليش؟؟ انا البنت اباها.. ومتعلق بها.. شو هالرمسه.. والبنت شو ذنبها في اخوها.. ولا تنسى ان اخوها صغير..

بوخالد: صغير كبير مب شغلي.. المهم انه داش السجن.. نحن الي طارينا على كل لسان تبا اخرتها يقولون عني نسيب خريج السجون..

خالد نش من مكانه .. وضرب بإيده على اليدار وحط راسه عليه.. : وانا شو ذنبي.. (صد صوب ابوه).. ابوي لا تحمل البنت واتحملني ثمن شي مالنا ذنب فيه…

بوخالد وهو يعابل بالمدواخ وينش من مكانه.. وتوه بيظهر.. : اسمعني انا قلت الي عندي.. تبا رضاي.. وتباني ايوزك وانا راضي عنك.. سو الي قلت لك عليه.. واذا ما تبا الباب ياسع جمل..

وظهر من الميلس من غير لا يعطي مجال لخالد يرمس.. وتم خالد يالس مكانه وراسه مفتر.. مب عارف شو يسوي.. يرضي قلبه ولا ابوه.. دش عليه يده وشافه يالس وحاط راسه بين ايديه.. استغرب.. تم يدز ريله بعصاته.. : خوز هناك وسع.. خل ايلس عندك..

خالد: يدي.. حياك..

اليد: شوفيك ابوي.. ليش شايل هموم الدنيا على راسك؟؟.. الغرشوبه سوت بك شي.. قولي انت بس لا اصلخها بهالعصاة..

خالد: لا .. (وقال السالفه ليده.. ).. شفت احين انا ضايع يدي..

اليد: ماعليك.. ادري الحق وياك.. البنت شو ذنبها.. ماعليك انت انا برمس ابوك وبشوف شو بيقول..

خالد: دخيلك يدي (ومسك ايد يده وتم يبوسها),,, ابوس ايديك..

اليد: استغفر الله.. شو هالرمسه بعد.. انت ولدي وانا ماسويت شي غير واجبي..

خالد: يدي انا ما اتخيل عمري اعيش من دونها.. تعلقت بها.. انا ما اخترتها من بين البنات الا لأني شفت فيها الزين الي ماشفته في الباقي..

اليد: هي والله ذكرتني بغرشوبتي..

خالد ابتسم من ورى خاطره.. : انت بعدك عطاريها..

اليد وهو يهز راسه: الحب وليدي ما يرحم كبير ولا صغير(وتنهد)..

خالد: هههههه.. عاشو يدي يحب..

اليد وهو يضربه بالعصا: حزن.. شو تتحرا ماعندي قلب شراتك.. تراني شباب اكثر عنك بعد..

خالد: لا معلوم صح صح..

اليد: اقول نش يلا سير ارقد.. لا اغير رايي..

خالد: لا كله ولا اتغير رايك بنش..

وربع خالد وظهرمن الميالس.. وتم اليد يالس يفكر شو يسوي..

==========

في المستشفى..

سلطان: والله ماقصرت ياعادل.. رايتك بيضا..

عادل: افا عليك.. واجبي..

سلطان: اصيل وتعرف الأصول..

عادل: تسلم.. الا ماقلت لي .. متى بيظهرونك..

سلطان: ان شاء الله باجر..

عادل: بالسلامه ماتشوف شر.. يلا ما بنأخرك زود عن رقادك.. بخليك ترتاح وانا برد البيت لأني احس اني تأخرت على الحريم في البيت تدري ماشي ريال عندهم ما يصير..

سلطان: لا ماعليك.. بس ما اقبل هالزياره لازم اتيي بيتنا..

عادل: ان شاء الله.. يلا مع السلامه

سلطان: مع السلامه

مر اليوم كأنه كابوس بالنسبه لخالد مب عارف شو يسوي.. ماقام يرد على مسجات غزلان ولا اتصالاتها في هاليوم.. سرحان بأفكاره مب عارف شو يسوي.. يضحي بحبه في سبيل رضا ابوه.. ولا يعاند ابوه ويتمم هالحب بالزواج غصبن عن ابوه.. هالشي كان محير خالد وايد.. في هالوقت الي كان يرمس فيه يده مع ابوه عشان يحاول يساعد حفيده خالد..

بوخالد: ابوي لك مني كل الإحترام بس انا ابخص بعيالي ومصلحتهم.. ِشو تبا يكون خال احفادي مجرم.. شو بيستوي بهم..

اليد: شو هالرمسه ياوليدي.. تراه الولد خاطره في البنت.. يباها.. مايصير ..

بوخالد وبعصبيه: ابويه.. انا ماراح اوافق لو تنطبق السما عالأرض.. وجان فيه خير يروح يتزوجها خل يروح.. بس لازم يعرف شي واحد (صد صوب الصاله الي فيها غرفه خالد وتم يعلي صوته عشان خالد يسمع).. ان اليوم الي بياخذ فيه هالبنت .. بيكون مكانه في الشارع هو وحرمته.. ماله مكان عندي وينسى اني ابوه.. وراح ينحرم من كل شي.. فهمت يعني كل شي..

اليد بحكم كبر سنه وحالته الصحيه مايروم يعاند ولا يناقش ولده وخصوصا انه يعرف طبعه وعناده.. نزل راسه وتم يهزها.. ويتمتم: لاحول ولا قوة إلا بالله..

خالد من سمع هالرمسه تم منصدم.. معقوله ابوه بهالقساوه والعناد.. زادت حيرته ماعرف شو يسوي ولا كيف يتصرف.. ليش يا غزلان ليش خشيتي عني هالموضوع.. وعلي.. علي ليش ما خبرني بهالسالفه.. ليش خدعوني.. لو كنت ادري من البدايه جان ما تقدمت لها ولا تعلقت بها زود.. اااااااااه.. ليش جيه حظي ليش ياربي..



من الناحيه الثانيه غزلان كانت في حيره.. ماتعرف شوفيه.. راحت غرفه علي ودقت عليه الباب..

علي: تفضل..

غزلان فتحت الباب ودشت وهي منزله راسها وخلت الباب مفتوح: علي.. ممكن ارمسك شوي؟

علي حس ان في شي صاير من ملامح غزلان: شي صاير ؟؟ قولي؟

غزلان واتحس بعمرها شوي وبتصيح .....

علي: ليش ساكته.. خالد زعلج بشي.. ضايقج.. قوووووولي؟

غزلان هزت راسها بمعنى لا..

علي: عيل شو السالفه طيحتي قلبي..

غزلان: صار لي خمس ساعات وانا ادق واطرش مسجات لخالد ما يرد علي .. مع انه بالعاده حتى لو كان ويا ربعه ولا هله ما يفارقني لو بالمسجات.. اكيد شي صاير له..

علي ابتسم لغزلان وحس بالعلاقه الي تربطها بخالد.. من خلال اهتمامها وخوفها .. : احين هذا الي مخوفج ومزعلج افا عليج انتي.. ولا تزعلين احين بدق عليه..

غزلان ابتسمت.. وتمت تترياه يدق لخالد.. واتصل في خالد تم يرن ويرن بس خالد مارد عليه.... استغرب زود.. شو سالفته.. لايرد علي ولا على غزلان.. أكيد صاير شي..

غزلان: شوف مارد عليك؟؟.. (وبدت تنزل دمعتها من غير لا تحس).. اكيد في شي..

علي: لا تحاتين برد اتصل..

وتم علي يحاول لين ما رد عليه خالد: الوووو.. وينك بوالوليد شغلت بالنا عليك.. حرام عليك ذبحت البنت وهي تتحرقص وتحاتيك.. سوت لنا مناحه من كثر الصياح..

خالد تم ساكت وفي خاطره يتفداها.. فدييييتج والله.. بس.. اااااااه.. من الزمن كيف يفرق....

علي: وين سرحت.. كل هذا عشان قلت لك عن حبيبه القلب..

خالد.. لا تطعن بقلبي زود ياعلي دخيييييلك.. لآ تزيد جرحي زود ماهو مجروح.. : الو.. السموحه بس ماكنت اسمع عدل.. اشحالك؟

علي:لا بالله الريال مريض بالحب.. تمام يسرك حالي.. وينك احين ممكن اعرف.. ليش اتعذب البنت؟

خالد وبحزن: علي.. ممكن اقابلك احين ابا اكلمك في سالفه ضروريه..

علي حس من نبره صوته ان في شي صاير.. واكيد هالشي كبير.. بس ما حب يبين لغزلان هالشي عشان ما تزعل زود: افا علييييييييييك انت بس.. نسهر ليش لا.. وين تباني اييك؟

خالد: مكاننا المعتاد صوب البحر..

علي: خلاص نلتقي هناك.. يلا في امان الله

غزلان : وين وين في امان الله ابا اكلمه..

علي: ها.. لآ بند خلاص..

غزلان: اوووووووووف.. ِشو.. انا كييف اكلمه يوم مايرد علي؟

علي: يقول يبا يتغلى شوي. وانتي بعد اتغلي..

غزلان وهي توقف على ينب وتربع ايدها: لا والله.. انا اراويه.. اسبوع ما بكلمه..

علي: هههههههه.. خيييييبه وايد ظالمه.. ماعلينا يلا برع ابا ابدل واسيرله

غزلان وين بتسيرون؟

علي: مايخصج..

غزلان: افففففف.. ماعلي علو انا اراويك

علي وهو يدزها وطلعها برع الغرفه وهي تتحرطم وصك بويها الباب.. وبعدها تتوعد له وتتحرطم.. وبسرعه غير ملابسه وظهر من الغرفه شاف غزلان ياسه في الصاله بس ماعطاها مجال وهي كانت تنادي عليه وهو طنش وسار ركب الموتر وراح عند علي الي كان يترياه ..

------------------

صوب البحر..

خالد: علي.. بسألك سؤال وابا الرد بصراحه..

علي: اسأل..

خالد: لو انت عندك من تحبه... وتمووووووت عليه.. وخيروك بين رضاه ولا رضا والدينك.. شو بتختار..

علي تم ساكت ومستغرب من كلام خالد.. : الصراحه.... سؤال صعب وايد.. لأنه اتخيريني بشيئين صعب علي اتخلى عن أي واحد فيهم..

خالد: ابا الرد..

علي: بكل صراحه.. انا مهما حبيت ومهما عشقت .. ومهما كانت علاقتي صادقه بحبيبتي الا ان محبتي لأمي وابوي تختلف عن أي محبه ثانيه وتفوقها.. يعني بكل صراحه رضا والديني اهم .. لآن برضاهم بتوفق.. وبرضاهم ربي بيرضى علي..

خالد: وانا هالي اقوله..

علي: خالد في شي صاير؟؟.. شو هالسؤال الي طرالك..

خالد: والله ماعرف شو اقول .. بس عندي سؤال ثاني..

علي: اسأل..ياكثر الأسئله اليوم.. بس ماشي جوائز عليها..

خالد: ههههه.. ليش ما خبرتني عن موضوع هادف؟

علي وبإستغراب: هاااااااااادف؟؟ أي موضوع؟؟.. واي هادف تطري؟

خالد: منو غيره اخو غزلان..

علي: شو من موضوعه؟

خالد: علي ارجوك لا تستهبل ... انا عرفت الموضوع ... ما يحتاي اتخش عني

نش علي وقف مجابل علي.. : انت شو تقول عن أي سالفه تطري؟؟ .. حيرتني؟

خالد: رفع راسه تم يطالع علي.. الي فعلا كانت مبينه من ملامحه مب عارف شي.. : سالفه هادف يوم دش السجن..

علي وبصوت علي: سجـــــــــــن؟؟!!!!!!!!!.. أي سجن و متى هالكلام؟؟ رد علي؟

خالد: علي احلف انك ماتعرف؟

علي: اظني العلاقه الي تربطني فيك.. والثقه الي من بينا ما تحتاج اني احلف فيها عشان تصدقني..

خالد نزل راسه وافتشل من عمره.. تم يطالع البحر ويرمس: اااااااه يا خالد.. ليتني ماعرفت السالفه هاي الا عقب زواجي.. ليش جيه حظي؟؟.. انا ماعرف الموضوع عدل.. بس جنه الا هادف طاعن واحد ودش السجن وظهر من عقبها

علي: انا مب فاهم شي.. ماعرف شي عن هالسالفه اول مره اسمعها منك.. محد ياب لي طاريها ابد

خالد: ابوي من عرف السالفه.. وهو مشتط علي.. ومصر اني افسخ هالخطوبه وانفصل عن غزلان.. (رفع راسه والحزن في عيونه).. بس انا مابا ياعلي.. غزلان قطعه من روحي.. مب عارف كيف بقدر اني اتنازل عنها

علي وهو يحط ايده على جتف خالد : انا حاس بكلامك والله.. ومب عارف شو اقول لك.. بس خلني اول شي اتأكد من الموضوع؟

خالد: كيف.. بتسير بتقبضهم وبتقول لهم شو سالفه هادف؟؟

علي: لا .. شو رايك باجر انسير انا وياك عند سلطان ونسأله..

خالد: ها شورك؟

علي: هيه.. مادري انت شو رايك؟

خالد: خلاص.. نتريا لباجر

علي: بس لا تبين شي لغزلان احين لين ما نتثبت من كل شي.. وعقب نحاول نلاقي حل للموضوع

خالد: علي انا خايف على غزلان..

علي: انا اكثر عنك.. لأني شايف اشكثر هي متعلقه فيك..

خالد: وانا بعد متعلق فيها.. بس

علي : انت لا تفكر بشي احين لين ما نشوف شو بيستوي لين باجر

خالد: خلاص..

علي: انا بترخص عنك احين وبسير اشوف السالفه في البيت

خالد: خلاص.. اترياك باجر مر علي يوم بتسير عند سلطان

علي: ان شاء الله

وراح علي عن خالد الي كان مصدوم من الي يسمعه.. ياربي.. ظهرنا من مشكله دشينا في الي اكبر عنها.. مستحيل.. هذا الي يصير... ليش كل شي مجلوب في هالدنيا.. وربي يهديك يابوخالد.. لوالموضوع صدق... غزلان شو ذنبها تتحمل غلطه هي مالها خص فيه.. والله راسي قام يعورني.. وينك ياسعيد.. تساعدني.. شال هموم اخوانك بروحي وغير همومي انا الي مثجله علي.. وفجأه انتبه لواحد يخطف من جدامه دح بريك والله ستر انه ما دعم الريال .. ونزل يشوفه.. كان الريال موخي راسه.. وميت خوف ..

علي: السموحه الوالد.. عسى ماشر..

الريال: شو انت ماتشوف.. ناوي تجتلنا.. حد يسرع في شارع في منطقه سكنيه

علي انصدم.. تم يطالع الريال وهو مصدوم.. لا مستحيل الي قاعد اشوفه جدامي.. معقوله انا كنت بدعم هالشخص.. يارب ارحمني .. خذ روحي من هالهم الي انا فيه..

تم يطالع الريال ومب رايم ينطق بأي كلمه.. طبعا الريال لأنه شوي كبير في العمر ما قدر يشوف علي عدل ويعرفه.. ولأنه الدنيا ليل والنور خافت .. فالرؤيه مب واضحه عنده..

علي: اااااالسموحه الوالد والله.. (وباس راسه.. وفي وقتها حس بقلبه بيظهر من مكانه.. وايديه ترتجف.. ).. حقك علي..

الريال من شاف علي باس راسه هدا شوي وطب طب على ظهره وكمل دربه.. زقر عليه علي: الوالد

صد الريال صوب علي: نعم..

علي: تعال بوصلك وين ما تبا..

الريال لا مشكور البيت مب بعيد وايد..

علي: لا لازم اوصلك..

الريال ماحب يفشل علي مشى صوب الموتر وفتح له علي الباب ويلس داخل وصك الباب.. وتم يمشي في الدرب الي قال له الريال وهو مغمض كأنه حافظ هالدرب من سنين.. ونزل الريال: يزاك الله الف خير يا وليدي.. بس لي طلب عندك؟

علي: امر ابوي..

الريال: لا تسرع ياوليدي.. ترا السرعه ماهي بزينه..

علي: ان شاء الله..

نزل الريال وسار عن علي ودش البيت.. وعلي طول الوقت يفكر ويفكر... كيف ياربي.. اااااه مب قادر راسي بينفجر من التفكير.. كيف اتحمل.. وعلى طول اتصل في اخوه محمد لآن صار له فتره ما كلمه فيها.. وغير جيه يبا يقول له عن الي صار..

علي: وهذا كل الي صار لي يا محمد.. شو رايك؟؟

محمد تم ساكت منصدم من الموقف الي صاب علي.. : وماعرفك يعني؟؟

علي: ولا حس فيني..

محمد: يمكن عشان ان الدنيا ظلام مارام يشوفك عدل

علي: وانا بعد اقول جي.. بس انا ليش كل هذا يصير لي.. ؟؟

محمد: مادري.. بس انت تصبر ..

علي: بس تدري هم بعد انا مستانس اني شفته.. وأخيرا من بعد هالسنين كلها أشوف ابوي جدامي.. ماكنت مصدق.. كان ودي احضنه واقول له آسف.. وافتح صفحه يديده في حياتنا.. كان ودي اصيح في حضنه وابوس راسه.. وماراح تكتمل فرحتي غير بشوفه امي الغاليه

محمد: ادري انا حاس فيك والله.. وبالمعاناة الي انت فيها.. بس ترا ما يصير كل شي نسويه احين لازم تصبر شوي؟

علي: بصبر.. تراني صبرت طول هالسنين ماظني هالكم يوم الزياده راح يخسروني شي لو اترييت..

محمد: يلا ان شاء الله خير..

علي: انا وصلت البيت بنزل احين تامرني بشي؟

محمد:لا سلامتك.. بس ماقلت لي اخبارك ويا هند؟؟

علي: ااااااه يا محمد.. البنت هاي بتذبحني.. موضوع علاقة الحب ها رافضتنه .. كله حاطه في بالها ان العوق الي فيها راح يمنعها.. الظاهر هي الي بتييب لي العوق بعد

محمد: ههههه.. بسم الله عليك يا روميو.. اااقصد ياعلي..

علي: هههههه..

وبند علي عن اخوه ودش البيت.. وشاف الليتات مبنده يعني الكل راقد.. صعد فوق.. صد صوب غرفه هند شاف الليت مفتوح .. بغا يروح لها.. بس تردد فتح باب غرفته توه بيدخل.. طلعت له هند..

هند: متى ييت؟؟

علي زاغ.. : بسم الله.. خرعتيني.. توني ياي؟؟

هند: غزلان خبرتني بالسالفه.. شو بغا منك خالد؟؟

علي تم يطالعها وهو متردد اذا يقول لها عن الموضوع ولا لا.. هند تمت واقفه تتطالعه تترياه يرمس ويقول شي.. بس هو تم يتأمل في هند ومايعرف شو يسوي.. ويفكر..

هند: الووو.. تراني ارمسك..

علي: ادري.. والمشكله انا مب عارف شو ارد عليج..

هند: الصدق..

علي: وانا ماروم اجذب عليج اصلا انتي اتعرفين هالشي.. تعالي ننزل تحت واقولج السالفه..

هند: خلاص يلا..

طلعت من غرفتها وبندت الباب وراها.. وعلي بند الباب ونزلوا ويا بعض وساروا الصاله.. ويلس ويا هند.. : والله ياهند ماعرف كيف ابدا لج السالفه ومن وين.. بس انا عندي سؤال ابا اعرف جوابه بكل صدق؟

هند: خير اسأل؟؟

علي: هادف.. داش السجن؟؟

هند فجت عيونها مستغربه من وين عرف علي هالرمسه.. وشو دخل هادف بالسالفه.. تمت ترمس وهي مستغربه وحاسه راسها يدور من الأفكار.. : هيه على ذمة التحقيق لفتره معينه ليش انه تضارب ويا ربيعه وطعنه.. بس طلع بكفاله وسالفه عن طريق سلطان.. نحن كنا في ألمانيا مادرينا الا عقب.. وهادف ندم على كل شي.. ودر الشله الفاسده.. وحتى اهل ربيعه هم الي تنازلوا عن القضيه وربيعه الي طاعننه دوم يتمشى وياه؟؟

علي: ليش ما قلتو لي عن هالسالفه ؟؟

هند: مايت على بالي.. وبعدين ماحبيت احرج هادف جدامك؟

علي: يعني تتوقعين الناس ما يدرون.. وما بيرمسون في السالفه؟؟

هند: انت شو تقول.. شو صاير؟؟.. مب فاهمه شي تراني..

علي: أهل خالد عرفوا.. واعتقدوا اني غشيتهم.. وهم احين معارضين ارتباط ولدهم بغزلان واما خالد فيبا غزلان ويبا رضا ابوه وامه مايعرف شو يسوي.. هذا الي صاير يا هند..

في هاللحظه سمعوا صريخ.. صدوا صوب الدري شافو غزلان وهي تربع تصعد الدري.. من بعد ما سمعت هالكلام كله.. نش علي بسرعه لحق غزلان وراه كانت هند.. غزلان حست بإنهيار من الي سمعته.. لا مستحيل.. يعني بفارق خالد.. يعني خالد بيبتعد عني.. لا ماقدر.. انا احبه كيف يبتعد عني.. ماقدر.. لا بس خالد يحبني مستحيل بيستغى عني.. (وبدت اتصيح بحرقه في غرفتها وهي ياسه على الأرض وسانده على الباب من بعد ما قفلته.. هند وعلي كانو يدقون الباب بس ماشي فايده مب طايعه تفتح الباب.. وسمعت في هالوقت وداد كل هالحشره بحكم ان غرفتها حذال غرفه غزلان في قسم البنات.. )

وداد: شو صاير.. شو بلاها غزلان؟

هند اتطالعت وداد وهي اتصيح .. وداد خافت.. بسرعه سارت صوب هند وحضنتها: شو صاير خبريني..

علي تم متولم مب عارف شو يسوي.. حس راسه بينفجر من زود التفكير.. خايف ان غزلان يستوي بها شي.. لأنه ما كان يبا غزلان تعرف بالموضوع جيه فجأه.. بغوا يوصلون لها السالفه بطريقه غير مباشره..

هند وهي تصيح قالت السالفه لوداد.. الي انصدمت زود.. وسارت صوب باب غرفه غزلان.. : فتحي الباب غزووول.. انا وداد.. فتحي الباب الله يخليج..

غزلان ما كانت ترد عليهم.. كانت غارقه بأفكارها .. اتصيح ومنهاره.. مستحيل الي سمعته صدق.. اكيد انا احلم.. خالد يحبني ما بيتخلى عني.. لا مستحيييييييييييييييييييييييييل..

هند وعلي ووداد.. كانت حالتهم منجلبه فوووق تحت.. مب عارفين شو يسوون يحاتون.. يدقون عليها الباب وما تفتح.. يلسوا في الصاله الي مجابل غرفتها.. الا هند الي تمت ياسه عند باب غرفه غزلان وتنادي على غزلان.. :غزووول.. فجي الباب دخيلج.. انا هندو.. ترا بزعل وبتعب جيه.. فتحي الباب الله يخليج..

غزلان يوم سمعت صوت هند وانتبهت له.. وحست فيها تعبانه.. على طول نشت وفتحت الباب ومن شافت هند فرت عمرها في حضن هند: هند قولي لي ان الي سمعته غلط.. قولي لي ان خالد ما بيودرني.. قووووولي..

علي كان يشوف حالة غزلان ومتلوم.. ووداد تقنعه ان الي يصير مصيره كان بيصير .. علي ماله ذنب.. تم يتخيل شو بيصير فيها يوم السالفه بتستوي جد وبينفصلون.. شو الي بيصيب غزلان.. لا مستحيل..

غزلان صدت صوب علي وتمت تتطالعه بغضب وتصارخ في ويهه.. وجربت منه: قول ان السالفه من تأليفك.. مستحيل يودرني صح.. قولهم خل يعرفون ان خالد يحبني مستحيل يتركني

علي صد على الجهة الثانيه لأن حاس عمره مب قادر يشوف غزلان وهي بهالحاله ومنهاره بهالطريقه..

غزلان وهي معصبه .. وتمشي دموعها بإيدها بسرعه: رد علي.. قول ان جذب.. قول ان مقلب..

علي: غزلان.. هدي عمرج..

غزلان: ليش اهدي عمري ليش (بدت تنهار واتطيح على الأرض ومسكتها وداد وبدت اتيلسها).. انت اتقول ان خالد بيودرني.. تعرف يعني شو بيودرني.. بيخليني بروحي.. وانا مابا اتم روحي من غيره.. (وبدت اتصيح وهي حاطه راسها عكتف وداد.. هادف سمع هالحشره وظهر من الغرفه.. واستغرب من المنظر الي جدامه.. هند ووداد وغزلان يصيحون.. وعلي شكله متضايق.. تم يطالعهم ومستغرب.. ومن شافته غزلان .. زاد غضبها).. كله بسببك انت.. وبسبب طيشك.. غلطه انت سويتها وانا الي اكلها احين وادفع ثمنها عنك.. ليييييييييييييييييييييييش؟؟.. انا شو سويت لك عشان اتخرب حياتي.. اكررررررهك..

هادف تم مستغرب .. غزلان ليش اتقوله هالكلام.. بدا يقرب صوبها.. بس علي منعه وسحبه وياه الغرفه..

هادف: خلني اعرف شو صاير.. ليش اتقول لي هالكلام؟؟.. شو سويت لها ..

علي:ماعليه.. خلها بتهدا وبترد عاديه..

غزلان كانت تصارخ وتسمع هادف رمسه: مابا اشوف رقعه ويهك جدامي.. أكررررررررررهك.. انت سبب دماري.. ماحبك.. ليش انت اخوي لييييييييييييييش؟؟

هادف: علي فهمني شو الي صاير.. ليش غزلان لأول مره اترمسني بهالطريقه؟؟

علي يلس هادف وصك الباب وتم يقول له الموضوع.. انصدم هادف.. وحس بالغلطه الي سواها.. وفعلا ان اخته مالها ذنب وليش تدفع ثمن جريمه هي ما ارتكبتها.. نش من مكانه وسار صوب الجامه..وماحس بعمره غير يصيح.. وتمنى ان الله ياخذ روحه في هاللحظه.. يكفي الفشله الي حط ابوه فيها.. واحين اخته توها ما كملت شهر على خطوبتها كل شي راح يخترب والسبب طيش منه.. : ليش جيه يصير فينا يا علي.. أول شي وداد.. واحين غزلان.. بس .. حراااااااااام تدفع ثمن غلطتي..

علي جرب من هادف ومسكه من جتفه: هادف لو انا ماعرف انك تغيرت كنت بلومك وبطيح فيك.. بس انا في يوم من الأيام كنت طايش مثلك.. وخسرت هلي.. ولولا هالطيش جان ما شفتوني متلته وعايش عندكم لا بيت ولا مكان اقعد فيه..

هادف ماعرف شو يسوي.. حس انه بيختنق من الغصه الي فيه.. كيف ؟؟.. مستحيل اصلا.. اكيد انا بعدني راقد والي قاعد يصير هذا كله حلم.. اكيد حلم.. : علي.. قول اني انا احلم والي سمعته توه كله حلم.. الله يخليك علي.. مستحيل.. والله مب قادر اتحمل زود.

علي: ياريت لو انه حلم.. ماعليك.. غزلان بتهدأ وكل شي بيرد طبيعي .. بس بياخذ وقت..

هادف: انت شو تقول.. غزلان تكرهني.. تعرف يعني شو تكرهني..

علي: ماعليك.. لين ما تمر الأزمه هاي كل شي بيتغير عقبها.. بس تصبر وادعي ربك..

هادف: بس والله حرام وظلم.. ليش؟؟

علي: ادري.. هاي الدنيا ما نقدر انغير فيها شي.. خل نتريا لين باجر.. بنشوف شو بيصير ويا خالد وشو بيسوي عقبها يحلها ألف حلال.. بس تبا شوري..

هادف: شو؟؟

علي: لو انا مكان غزلان.. ولا بزعل عليه تدري ليش؟؟

هادف: ليش؟

علي: لأن الي ما يرضى بأهلي.. وما يشرفه وجودهم.. انا بعد نفس الشي ببادله.. مثل ما هو فضل هله لأن رضاهم فوق كل شي.. انا بعد ذات الشي.. رضا هلي فوق كل شي.. ما بفضله على هلي.. محد بينفعني في هالدنيا غير هلي.. والله يعوض كل شي..

هادف نزل راسه وظهر من الغرفه.. وهو خايف يواجه غزلان.. بس شافها مب موجوده بسرعه دخل غرفته وصك على عمره الباب وتم يصيح من خاطره.. حاس عمره محتاج انه يصيح عشان يهون على روحه.. وعلي ظهر شافهم محد.. دق على تليفون هند.. وقالت له ان غزلان من التعب رقدت وهي وياها في الغرفه ومعاهم وداد.. تطمن وراح غرفته وحس ان هاليوم تعبه وايد بأحداثه.. وحط راسه وغط في نوم عميق..

===

يوم الأحد..

الصبح..

========

في بيت حصه..

كانت تتريا غزلان اتييها عشان يسيرون المدرسه سوى.. تمت تتصل فيها بس تليفون غزلان مغلق.. استغربت.. وابراهيم ينادي عليها عشان اتيي بسرعه تركب الموتر لأنه هو الي بيوصلها لأن الدريول ساير بوظبي ويا بوحصه..

حصه: لحظه انزين.. يايه.. بس اتريا شوي..

خذت التليفون واتصلت على تليفون هند الي كانت واعيه.. : الوو

هند: هلا والله.. صباح الخير

حصه: صباح النور.. اقول هندوو وين غزلان ترا اتأخرنا وهي ما يت..

هند: اسمحي لي نسيت اخبرج انها ما بتيي اليوم المدرسه تعبانه شوي..

حصه وبتعجب: شوووو.. تعبانه؟؟ .. امس كنت عندها ماكان فيها شي؟

هند: لا بعد ما سرتي حست هي بتعب عشان جيه..

حصه: فدييييتها ما تستاهل.. خلاص.. سلمي عليها وقولي لها يوم برد من المدرسه بمر عليها وبييها .. بشوف شو فيها.. اذا طلعت تتدلع ياويلها مني

هند:ههههه.. خلاص اوكي

بندت حصه عن هند وبسرعه ربعت تنزل ويا شنطتها عشان تسير المدرسه ..كان إبراهيم واقف عند باب الموتر ومحرج ليش انها تأخرت عليه وهو تأخر بسببها..

إبراهيم: مالت عليج.. مره ثانيه ما بوصلكم ... شو ها مذله انتوا البنات..مادري وين سايره؟

حصه: ههه.. (سارت صوبه وعطته بوسه على خده وتبتسم له).. ولا تزعل

إبراهيم: لوتيه .. يلا ركبي.. وينها ربيعتج .. لا يكون بعد ناويه تتأخر بروح تراني

حصه استغربت من ابراهيم اول مره ما ينطق بإسمها.. كأنه متجاهلها.. : ما بتيي تعبانه ..

إبراهيم: هذا انتوا البنات.. تتعلثون عشان ما تسيرون المدرسه.. ونحن وحليلنا انخسي انقول تعبانين بالخيزرانه عظهورنا..

حصه: ههههه.. عيل نحن ليش بنات اذا ما تدلعنا..

إبراهيم: فديتج انتي والله شيخة البنات.. ها الملجه قريبه.. شو شعورج؟؟

حصه: اسكت عني لا اتذكرني كل ما اتذكر احس شي بيستوي بي..

إبراهيم:بسم الله عليج.. شو هالرمسه بعد..

حصه: والله مرتبكه.. بس ربي يعدي كل شي على خير.

إبراهيم: شو خلصتي شرواتج.. وفستانج ومادري شو..

حصه: هيه امس سويت اخر بروفه على الفستان.. وبستلمه يوم الأربعا الياي..

إبراهيم: يعني قبل الحفله بيوم.. والله انتوا البنات شغله.. نحن كندوره ونعال وغتره وعقال وبس..

حصه: هههه.. هي والله صدقك ياريت لو نحن شراتكم مافي شي..

إبراهيم:يلا ماعليه بنكمل عقب.. شكلك بتمين واقفه هني عند باب المدرسه وما بتدخلين..

حصه: اوه.. والله ما انتبهت ان وصلنا اتصدق.. بس موشي ادخل المدرسه من غير غزلان..

إبراهيم تجاهلها يوم نادت بإسم غزلان.. ونزلت حصه وبسرعه خطف وسار الدوار.. ودخلت حصه المدرسه.. وشافت شله نوال .. الي ما تحبهم.. الله يستر.. من صباح الله خير نجابل هالويوه.. وينج غزلانو اتدافعين عني.. انا ماعندي لسان انطق..

نوال: ههههه.. البودي جارد مالها ما يت وياها..

عنود: أكيد كنسلت ويزتها عشان جيه..

حصه كانت مغيضه منهم ومن تعليقاتهم.. تمت تمشي وهي مب معبرتنهم.. وهم يزيدون بتعليقاتهم.. ومب منتبهين ان المديره (ابله نعيمه).. واقفه وراهم وتسمع تعليقاتهم..

سعاد: اونها عاد ما تسمعنا.. هالبنت قليله ادب.. تمشي حذالنا وما تسلم..

نوال: ماعليج.. دام ان البودي جارد محد اليوم اعرف كيف اتصرف وياها..

عنود: تتحرى عمرها قويه..

ابله نعيمه تمت تتحمحم وراهم عشان ينتبهون لها.. ومن شافوها ماتو خوف.. تمت كل وحده فيهن ترتقل مكانها مب عارفه شو تقول.. ويتطالعن بعضهن وهن زايغات مب عارفين شو الي يترياهن من ورى نظرات المديره لهن..

ابله نعيمه: نوال.. عنود.. وسعاد.. تعالو عندي الغرفه بسرعه..

ومشت عنهن وسارت صوب الغرفه.. طبعا أول شي لأن حصه خطيبه ولدها .. طبعا محد من بنات المدرسه يدري بهالشي.. لأن حصه ماقالت لحد.. وثاني شي..لأنها ما ترضى لمدرستها ان يكون فيها بنات من هالنوع..

عنود: احين انتي ما حصلتي مكان اتطيحين فيه في حصووو هاي غير صوب مدخل الإداره..

نوال: شو دراني انها واقفه ورانا

سعاد: الله يستر احين شو بتسوي فينا روحي مادانيها

نوال: وشو بتسوي يعني.. خل اتولي الا هي ..

عنود: نوالووو بس.. صخي مافينا بعد نتوهق زود..

مشوا ودخلوا غرفه المديره الي كانت قاعده تترياهم والشراره في عيونها ومبين عليها محرجه.. سعاد طبعها خوافه رغم طوله لسانها.. قويه على الي اضعف منها.. من شافت هالنظرات تمت تتنافض من الخاطر.. حتى المديره لاحظت عليها هالخوف..

المديره .. وقفت ورى مكتبها.. وهي حاطه ايدها على الطاوله : شو هالسخافه الي فيكن؟؟.. يايات تدرسن هني ولا تتشمتن في الخلق.. صدق انكن ما تستحن.. المدرسات كانن يقولن عنكن وعن سوالفكن انا ما كنت اصدقهن.. كنت اقول مستحيل بنت من بناتي اتكون جيه.. بس طلعت غلطانه .. ومغشوشه فيكن..

نوال توها بترمس.. : بس أبــ...

قاطعتها المديره: جب ولا كلمه فاهمه.. لا انتي ولا وحده فيكن ابا اسمع حسها.. بعد لكن ويه ترمسن.. يلا جدامي كل وحده تطلب امها في التليفون.. وماراح تحضرن اي حصه.. وبتمن في غرفه الأخصائيات لين ما ايين امهاتكن هني واتفاهم انا وياهم..

سعاد من سمعت ان المديره بتطلب امها ما قدرت تمسك عمرها زود.. بدت اتصيح: والله انا اسفه ابله اخر مره.. اوعدج ما اكررها بس لا تطلبين امي.. دخيلج..

المديره: ليش انتي بشو احسن عن الباقي عشان ما اطلب امج.. الي يغلط هني لازم يتأدب.. وان ما تأدب مره وثنتين ما يتمن عندي في المدرسه..

نوال طبعا مغروره جدا.. وكلام المديره ما هز شعره فيها.. ودوم اتحس عمرها انها الصح والي حولها هم الغلط.. المديره كانت تتريا ان نوال تعتذر لأنها تعرف طبعها.. بس يوم شافت نظراتها وهي رافعه خشمها ولا كأنها مسويه شي غلط.. خلاها تعاند زود والا انها تعاقبهم.. وكل وحده فيهن دقت على امها وقالت لها انها تحضر المدرسه.. وظهرن من الغرفه وسارن عند الأخصائيات الي كانن يرمسونهن ويهزئونهن.. وسعاد طول الوقت اتصيح

نوال وهي تتطالع سعاد بغرور: ماعندج سالفه تدرين ..

سعاد: انتي ما تدرين امي شو بتسوي فيني

عنود: طاعو هاي.. شو بتسوي بج يعني بتجتلج.. الا هي كم كلمه بتهزبج وخلاص..

سعاد: اقولكن ما تعرفن امي زين..

نوال: بس صخي الله يخليج الي يشوفج يقول حد ميت لها.. صخي فضحتينا جنج ياهل..

في بيت بوسعيد..

عرفت ام سعيد وبوسعيد بالموضوع بعد ما خبرهم علي بالي صار..

ام سعيد: لا حول ولا قوة إلا بالله.. ليش بناتي جي حظهن في الدنيا.. ؟؟

هند تأثرت من رمسه امها.. حست انها بعد من ضمنهم.. صدت اتطالعت علي الي كان منزل راسه وروحه هموم الدنيا على راسه مب عارف شو يسوي.. وردت نزلت راسها..

بوسعيد: استهدي بالله ياحرمه.. شو هالرمسه بعد.. كل شي من قضاء ربج.. وبناتج ماشي احسن عن حظهن.. وداد ربي وفقها بريال والنعم فيه.. وغزلان الله ماكاتب لها انها ترتبط فيه يمكن هالشي خير لها..يمكن الله كاتب لها الي احسن من هذا (غزلان كانت ياسه عالدري فوق وتسمع شو يقولون واتصيح وهي موخيه راسها على رويلها).. وهند ألف من يتمناها..

هند: أبوي (وهي محرجه).. لا تيبون طاري انا.. ولا عمري بفكر في الزواج..

ام سعيد استغربت من ردت فعل هند.. والكل نفس الشي.. بالذات علي.. الي صد صوبها وشافها عاقده حياتها ومعصبه.. : ليش تتطالعوني جيه.. خلنا في موضوع غزلان..

بوسعيد ما حب يزعل بنته زود.. لأنه فاهم كلامها.. واحساسها.. : خلاص هدي يا بنتي ماكان قصدي شي.. وسالفه غزلان ترا نحن ما بيدنا نسوي شي.. بس انا بقولكم الصراحه اذا هو عاند هله والا ياخذ بنتي ترا انا ما بوافق.. حطو في بالكم هالشي.. مااااابوافق.. دام انه هله مب راضين ببنتي ولا اهلها.. نحن بعد ما بنرضى بولدهم ولا بأهله.. هم بشو أحسن عنا عشان ما يبونا.. أصلا ينياز لهم يحصلون شروات غزلان.. نحن مب عاقين بنتنا عليه.. وما نبا بنتنا ما تتوفق في حياتها.. لأن الشي الي بالغصب صدقني ما بيدوم.. بيتم طول عمره بيعايرها وبيذلها انه خذاها غصب عن هله اذا زعلته بشي.. وانا ما ارضى هالشي لبنتي

هالكلام كان مثل الماي البارد على فؤاد غزلان.. حست بشي غريب في قلبها من سمعت كلام ابوها.. حست كأن في حد وعاها عشي هي ماكانت حاسه به.. ولا حسبته في راسها.. تذكرت يوم ياها هادف في الغرفه وكلمها ولامها ليش انها نستهم من يوم ما انخطبت لخالد.. وهالشي يدل انها كانت في بال هادف وهالشي الي خلاه يحس بإهمالها.. انا كيف افكر بإنسان توه داخل حياتي يادوب مقابل هلي.. الي مالي غناة عنهم.. الي لو ادور الدنيا ما بلقى شرواتهم.. والله اني غبيه.. وصدقه ابوي.. ما جذب.. انا ليش قاعده اصيح .. (نشت من مكانها وقفت على ريولها.. وعدلت شيلتها ومسحت دموعها بإيدها.. وصعدت وسارت صوب غرفه اخوها هادف لأنه ما سار المدرسه من التعب الي كان فيه.. والتفكير الي ذابحنه.. شافته راقد ..راحت بسرعه صوب الستاره وفتحتها .. والشمس مجابله غرفه هادف فنور الغرفه.. وهالشي الي خلا هادف يفتح عيونه.. وشاف غزلان ما صدق الي يشوفه.. غزلان في غرفته.. لا مستحيل.. اكيد انا احلم.. تم يحج عيونه وغزلان تتطالعه وتبتسم.. هي والله صدق.. غزلان بشحمها ولحمها جدامي)

هادف: غزلان.. شو اتسوي هني؟؟

غزلان: شو شو اسوي هني.. ماتباني ادخل غرفتك بعد.. خلاص بظهر..

هادف وهو مستغرب وحاس نفسه ضايع ومب فاهم شي من تصرفات غزلان.. : لا لا لالا.. تعالي..

بسرعه سارت صوبه ونقزت على سريره.. وتلحفت حذاله.. : بررررررد.. عادي..

هادف: لا مب عادي خوزي مناك بتوصخين لحافي..

غزلان وهي تمد بوزها.. وتفره بالمخده : مالت عليك وعلى لحافك.. ماباه..

ونشت من مكانها وسارت صوب التسريحه وشلت شيلتها وشلت مشطه وتمت اتمشط شعرها ..

هادف: ودري مشطي.. بترسينه قمل..

غزلان صدت صوبه.. وعقدت حياتها .. اونها معصبه: هاك.. (وفرته عليه).. زطي.. توني اكتشف انك زطي

توها بتظهر من الغرفه وهادف بعده مستغرب.. يحس عمره يحلم .. كأنه يتذكر ايام الي كانت فيها غزلان اوكي وياه .. لأنه متأثر من تصرفها امس معاه..

فتحت غزلان الباب وتوها بتظهر.. وردت صدت صوبه وهي تبتسم.. وبعدها صدت صوب الباب .. : هادف.. انا اسفه على كلام البارحه..

وظهرت من الغرفه وسارت صوب غرفتها وصكت الباب وراها وفرت عمرها على السرير ومسكت المخده وتمت اتصيح واتصيح بحرقه.. اااااااه ياقلبي.. ليش حبيته ليييييش.. ؟؟.. يارب انك اتساعدني انسااااه .. خلاص ماباه لو هو حتى بغاني... يوم انه هله الخقاقين ما يبون هادف اخوي.. انا بعد مااباهم.. بس.. بس انا احبه.. احبه.. احبه..

وتمت اتصيح.. في هالوقت كان هادف بعده مب مصدق الي صار له.. بسرعه نش الحمام تسبح وظهر وتلبس وطلع من غرفته وسار صوب غرفتها وشاف الباب مصكوك.. بغا يدخل بس خاف عن يكون الي صار له حلم وينصدم.. تراجع ونزل تحت وشاف الكل قاعد في الصاله ويرمس..

هادف: صباح الخير..

الكل: صباح النور..

هادف: انا اليوم مادري شايف حلم ولا صدق.. بس اظني حلم.. مستحيل يكون صدق..

هند وهي مب فاهمه كلامه: شو اتقول انت.. فهمني؟؟

هادف: اففففف.. ولا بتفهمون.. غزلااااااااان

هند وبخوف: شوفيها؟؟

هادف: مادري.. تيننت ولا تخبلت.. ولا انا كنت احلم

ام سعيد: واعليه بنتي.. وينها؟؟.. شو صاير.. انطق؟؟

علي: هادف.. ممكن ترمس وقفت قلبنا..

هادف: سمعوا.. انا كنت راقد اوكي.. فجأة نشيت وحسيت بنور في عيني.. فجيت عيني لقيت غزلان تفتح الستاره.. تخيلو غزلاااااااااااااااااااان عندي في الغرفه..

علي: انزين بس جيه السالفه؟؟,, يمكن حلمان؟؟

هادف: شو حلمان انت بعد.. اقولك فتحت الستاره وسير غرفتي بتشوف الستاره مفتوحه..

هند: انزين كمل وبعدين..

هادف: ماشي تم اتسولف وتضحك وياي.. وتلعوزني كعادتها.. واخر شي قبل لا تظهر وهي معطتني ظهرها.. قالت لي انا اسفه على كلام البارحه.. وظهرت من غرفتي..

الكل تم فاج عيونه.. معقوله الكلان الي يقوله هادف يطلع صدق.. هند بسرعه نشت من مكانها وربعت صوب غرفه غزلان.. وتوها بتنش ام سعيد.. مسكها بوسعيد..

بوسعيد: خلج.. خل هند تروح وتشوف شو السالفه

ام سعيد: واعليه بنتي..

في هالوقت رن تليفون علي .. وكان الي متصل خالد.. الكل كان يطالع خالد الي انجلب ويهه ماعرف شو يسوي.. نش عنهم بسرعه وظهر من الصاله عشان يرمس على راحته

علي: الووو

خالد: هلا ..اشحالك؟

علي: بخير.. انت اشحالك؟

خالد: علي شو صار على الموضوع؟

علي: والله شو اقول لك يا خالد....الموضوع طلع صدق.. هادف دش السجن على ذمه التحقيق وأهل الولد تنازلو وعشان جي ظهر من السجن ..

خالد سكت.. كأنه انصدم وفقد أي أمل كان عنده انه يستمر ويا غزلان..

علي: شوفيك ساكت.. بس على فكره غزلان عرفت بالموضوع؟؟

خالد: شووووووو؟؟ .. ليش قلت لها؟

علي: انا ما قلت لها..كنت ارمس اختها سمعتنا.. لو تشوف حالتها امس.. جان بتصيح..

خالد سكت.. حس بنفسه مخنوق .. مب عارف شو يسوي.. وحس اشكثر هو جبان..

علي: خالد.. خلاص دام ان في مانع في ارتباطك من غزلان ما يحتاي ترتبط في البنت.. لأن عمي رافض انك ترتبط بغزلان اذا هلك مب راضين...وانا بعد لي نفس الراي..

خالد: يعني الكل عرف..

علي: هيه الكل عرف.. الموضوع ما ينسكت عنه..

خالد: بس..

علي: لا بس ولا شي.. انت فكر.. ويوم بتقدر تقنع هلك رد علينا.. بس رجاء لا تعلق البنت زود اذا شفت ماشي فايده.. حاول تنهي كل شي خلال هاليومين..

خالد تم ساكت.. مب عارف شو يسوي.. شو يرد عليه..

علي: يلا عيل برخصتك انا مشغول ويا الأهل شوي..

وبند عنه من غير لا يعطيه مجال انه يرد.. أول مره اكتشف يا خالد انك ضعيف لهالدرجه.. واحس بالندم اني وافقت عليك .. ودش البيت.. شاف هند وهي نازله ويا غزلان وهم يضحكون.. استغرب.. تم واقف مكانه يطالعهم.. والكل كان صاد صوب الدري.. وهادف من زود الخوف.. نش من مكانه وسار صوب علي..: اسكت علي انا خايف والله

علي: هههه.. انا اكثر عنك..

غزلان صدت صوب هادف من شافته نش: شو خايف اني اهزبك.. هههههه.. (صدت صوب امها وابوها وسارت صوبهم وباست راسهم).. ابوي .. امي.. بغيت اقول لكم.. الي تشوفونه في مصلحتي سووه وانا راضيه..

بوسعيد استانس من سمع هالرمسه من غزلان.. حس بفخر انها بنته.. والله وعرفت اتربي يا خليفه.. مسكها من ايدها وسحبها صوبه وحضنها.. وفي هالوقت غزلان كان ودها انها تنفجر من الصياح بس هي كانت قابضه عمرها عشان ما تزعل امها وابوها اكثر من جيه.. ونشت من حضنه.. وتمت تتطالعه: ابوي انا كنت ياسه فوق عالدري وسمعتك يوم ترمس علي وهند عني.. والكلام الي قلته هو الي خلاني اقتنع واتغير.. انا اسفه اذا في لحظه فكرت في خالد قبل لا افكر فيكم..

هادف وعلي كانو مستانسين من الخاطر من الكلام الي يسمعونه من غزلان.. ونفس الشي هند وام سعيد.. وعلي ما حس بعمره غير يقبض ايد هادف.. ويصارخ.. ونفس الشي هادف.. استوا شرات اليهال.. تموا ماسكين ايد بعض ويناقزون ويصارخون.. :هي هي .. هي هي.. عاشت غزلان..

الكل صد صوبهم واولهم غزلان وماتو من الضحك على شكلهم.. وغزلان استانست من الخاطر وقتها.. حست ان الي سوته هو الصح.. نشت من مكانها وصعدت الدري وراحت غرفتها من بعد ما استأذنت منهم عشان تسير تسبح.. وسارت هند وراها ..

هند: انتي راضيه عن قرارج

غزلان: هاي اول مره احس عمري سويت شي.. وانا 100% مقتنعه منه ومرتاحه له

هند وهي تحضن غزلان من جتفها واتبوس خدها: هاي غزلان الي اعرفها..

غزلان: فديتج.. يلا انا بسير اسبح.. وبنزل ابا غدا الي احبه

هند: افا عليج انتي امري بس.. من عيوني..

غزلان: ههههه.. كشخه عيل بدلع عدل هاليومين

هند: من حقج تتدلعين.. ربي يوفقج ويرزقج بالي احسن..

غزلان: هههههههه.. فديتج

ودشت غزلان الغرفه وقفلت الباب وطلعت لها ملابسها الي بتلبسهم وشافت لبس الخطوبه الي لبسته.. حست عمرها شوي وبتصيح (لا .. لا يا غزلان.. لازم ما تصيحين.. تذكري ان هلج بيتضايجون.. لا تسمحين لنفسج انج تدمعين عشان انسان هله باعوج لشي انتي مالج ذنب فيه).. وصكت باب الكبت.. وشافت التليفون الي كان على التسريحه كان مغلق.. فتحت التليفون وصل لها مسج من حصه.. (وينج يالدبه تأخرنا).. ابتسمت لها.. وشافت المسج الثاني ياي من خالد.. ترددت انها تفتحه بس فتحته بدافع الفضول.. (لك وعد مني وأنا إنسان وافي.. تبقى لي اعز الناس.. إن جيت وإن رحت)..

وتوها بتصك المسج شافت اتصال من خالد.. كان يرن تليفونها وهي متردده ياترى ارد ولا ما ارد.. تمت ايديها ترتجف.. مب عارفه.. وقلبها يدق.. بس في النهايه فرت التليفون.. بس بسرعه غيرت رايها وشلت التليفون وظهرت من الغرفه ونادت على علي الي كان في غرفته وظهر بسرعه

علي: هلا غزلان ناديتيني؟.

غزلان: علي.. شل تليفوني.. ويوم يتصل ربيعك.. رد عليه وقوله صاحبه التليفون ما تبا اتكلمك.. واتقول الي ما يرضى بهلي انا ما ارضى به

استانس علي شل التليفون وابتسم لها وهي ارتاحت واااااايد من بعد الي سوته.. ودشت غرفتها.. وسارت سبحت.. وفي هالوقت كان خالد يحرق تليفون غزلان من كثر الإتصالات.. ورد عليه علي.. استغرب خالد.. ليش علي يرد عليه؟

خالد: علي.. تليفون غزلان شو يسوي عندك

علي: ماشي يتحوط..

خالد اتنرفز من رمسه علي ومن اسلوبه وياه.. : ارمسك بجد وانت ترد عليه بهالإسلوب..

علي: اوه السموحه.. نسيت انك خالد .. السموحه منك.. وانا يادوووووب ولد خاله خريج السجون هادف.. كيف ارمسك جيه .. صدق اني غبي..

..

خالد تنرفز زود.. : علي .. ليش اتكلمني جيه؟؟.. من شوي رمستك ماكان جي اسلوبك

علي:لأني ما فكرت فيها صح وخذت الموضوع عساس انك ربيعي بس احين رتبت كل شي في راسي.. و.. صاحبه الرقم اتقول لك.. انها ما تبا اتكلمك .. وان الي ما يرضى بأهلها هي بعد ما ترضى فيه..

خالد عصب.. حس بإهانه.. : لا والله.. شو تتحسب عمرها.. بعق عمري عليها وبترجاها اتم ..

علي: لا تترجى ولا شي.. روح الله يوفقك

خالد: معلوم الله بيوفقني.. لكن ويا غيرها.. مب ويا اخت مجرم..

علي: لو سمحت عن الغلط فاهم.. ترا الي ترمس عنهم هلي انا بعد.. يشرفني وجودهم..

خالد: وانا ما يشرفني

علي: نفاد.. مب محتاجين لك عشان يشرفك ولا ما يشرفك..

وبند في ويهه وغلق التليفون.. وفره على اليدار.. انكسر التليفون وطاح عالأرض.. تم علي معصب وفي نفس الوقت مرتاح ان كل شي انحل.. واما خالد فكان معصب حده.. شو يتحسبون اعمارهم.. والله اني كنت مخدوع فيهم.. كانو بيقصون علي بس الله فضحهم.. ونش من مكانه وسار صوب ابوه.. الي كان يالس في الميلس ويا يده..

خالد: ابويه.. بغيت اقول لك.. اني فسخت خطوبتي ويا البنت.. وشريت رضاك

بوخالد وهو مستانس: هاي شيمتي في ولدي..

اليد: متأكد من قرارك؟؟

خالد: هي نعم.. مادري كيف كنت بنزل من مستواي لناس من هالنوع

بوخالد: صدقني من باجر بيوزك الي احسن عنها.. افا عليك انت بس.. ولا تفتكر..

خالد: تسلم ابوي.. بس انا مابا اعرس..

ظهر من الميلس وظهر برع وركب الموتر وطلع صوب ربيعه عبدالله في الشقه ييلس عنده من بعد ما عرف ان ربيعه ماخذ اجازه.. وقعد وياه وقاله عن الي صار.. عبدالله انسان عاقل.. ودومه يوزن الأمور صح.. وشاف ان الي سواه علي هو الصح.. وكلامه صح.. بس ماحب يقول شي جدام خالد عن يزعل منه ويتضاربون

===========

هند من فرحتها تمت تشتغل في المطبخ واتسوي الغدا الي تحبه غزلان.. ومن بعد ما ظهرت غزلان من الغرفه شلت شنطه صغيره وحطت فيها هدايا اهل خالد ولبس خطوبتها والدبله وكل شي .. ونزلته عند امها..

غزلان: امي.. هاي اغراضهم.. خل علي يرده لهم..

ام سعيد: غزلان.. انتي بنتي وانا احس بج.. واحس بقلبج.. ادري بج اتسوي ها كله عشانا وعشان كرامتنا.. انا مستانسه عشان هالشي.. بس متضايقه لأني احس بقلبج كيف يتعذب من داخله..

غزلان وهي تبتسم لأمها وتبوس راسها: افا عليج.. انا ما سويت هالشي إلا لأني مقتنعه منه.. ومستحيل أبدي أي انسان في هالكون عليكم انتوا .. وصدقيني بتعود وبنساه.. الا هي اسبوعين مادري 10 ايام مضت وياه.. يعني عادي بنساه بسهوله..

ام سعيد ابتسمت لها وفي هالوقت نزل علي .. وقالت له غزلان عن سالفه الشنطه والي فيه.. عاد علي ماصدق يسمع هالرمسه.. بغاها من الله ان يشوف غزلان مرتاحه من بعد ما شاف حالتها الليله الي طافت.. بسرعه شل الشنطه وحطها في موتره.. وغزلان تبتسم.. لكنها متجاهله قلبها الي ينزف في داخلها ويتقطع حتى لو حاولت تبين عكس هالشي الا ان الكل فاهم احاسيسها..

ومر الوقت وردت وداد من الدوام الي من شافت غزلان ربعت في حضنها وتمت اتبوسها.. وغزلان تضحك: بس بس.. كل ها عشاني.. كل ها حب

وداد: انتي ما تعرفين حالتج امس شقايل كانت وشو سوت فينا.. ما نصدق انشوفج مستانسه ما تبينا انسوي جيه فيج..

غزلان: فديتكم .. بس اقول.. جنج طولتي وانا يوعانه..يلا بدلي ترا بخلص عنج الغدا وما بترياج

وداد: اوه سوري نسيت..

وظهرت وداد بسرعه وسارت غرفتها وبدلت ثيابها ونزلت وتغدت وياهم .. وقعدوا من بعد الغدا يسولفون ويضحكون.. وكان الجو في بيت بوسعيد رهييييييب.. البسمه مرسومه عشفاتهم.. وما تفارقهم.. علي كان مستانس واااااايد من التطور الي صار.. شو كانت حالتهم امس وين صارت.. لعلها دوم يارب..

============

هند: اوه غزووول نسيت اخبرج .. حصو قالت بتييج .. يوم قلت لها انج تعبانه تمت اتحاتيج وقالت بتمر عليج

غزلان: فديتها.. زين قلتي لي.. خل اسير ارتب غرفتي واتجهز..

نشت غزلان وسارت غرفتها وتمت اتربها وفتحت الدريشه لأنها حست ان غرفتها تحتاج لتجديد.. وتحتاج للنور يضوي فيها.. ومن فتحت الستاره شافت بيت قوم حصه مجابلها .. تمت واقفه ثواني تتأمله.. وتشوفه.. فتحت الدريشه شوي.. كان الهوى حلو.. وعدلت شيلتها عن يكون حد يشوفها وهي تفتح الدريشه.. وفي هالوقت توه ابراهيم ظاهر من الفيلا بيركب موتره .. ومن شافته غزلان انصدمت.. تذكرت كلامه يوم قال انه بييها يوم وبتندم.. تمت تتأمله ومن غير لا تحس بعينها وهي تدمع.. وابراهيم كان يحط اغراض في سيارته.. ومن بعد ما خلص كل شي.. صد صوب الباب الزجاجي مال ميلسهم وليش انه عاكس فكان شرات المنظره عشان يرتب فيها سفرته.. وهو يطالع في الجامه شافها.. انصدم.. تم يدقق في الجامه شاف ان الجامه هي جامه غرفه غزلان.. معقوله وداد الي قاعده توايج.. لف براسه ورفعه وشافها وشافته في نفس الوقت.. من انتبهت غزلان لإبراهيم يطالعها في عينها..بسرعه صكت الجامه وابراهيم ركب الموتر وظهر.. وتمت حاطه ظهرها وساندته على اليدار.. وتتنفس بسرعه .. وتحس بقلبها شرات الطبول وهو يدق.. وتمت على هالحال حول الخمس دقايق ومن بعدها تنفست نفس عميق وكملت شغلها في الترتيب..

========

حصه طبعا استأذنت من امها وعالساعه 5.00 ظهرت من بيتهم وسارت صوب بيت غزلان وسلمت على اهل غزلان وقالو لها اتسير غرفتها فوق.. ودقت عليها الباب .. وغزلان ماكانت تدري انها حصه..

غزلان: هاااااا.. انا مشغوله..

حصه : شو ها.. يعني ما بتفتحين الباب ارجع البيت احسن

غزلان من سمعت صوت حصه بسرعه ربعت وفتحت الباب وفرت عمرها في حضنها: فديييييييتج والله تولهت عليج يالدبه

حصه: انا بعد.. يالسخيفه مره ثانيه لا تسوين جيه فيني وماتيين وياي المدرسه اذا غبتي انا بعد بغيب.. موشي من غيرج

غزلان: فديتج كنت تعبانه.. دشي..

حصه: من شو تعبانه امس شفتج صاحيه ما بلاج شي..

غزلان: ماعليه يلسي وبقولج كل الي صار..بس بالأول عطيني تقرير شو صار في المدرسه اليوم

حصه طبعا اول شي رمست عنه سالفه شله نوال والي سووه فيها.. والي لقوه من المديره.. غزلان ماتت ضحك: احسن .. يستاهلون.. احين انا بودي جارد..

حصه: شفتي عاد.. بس عمتي عرفت كيف اتأدبهم..

غزلان: هههههه.. ياريتني كنت هناك فاتني والله .. كنت بضحك عليهم صدق

حصه: يلا خبرتج انتي خبريتي احين؟؟

غزلان وهي تتنهد: ااااااه.. شو اخبرج وشو اقول لج..

حصه: لا السالفه كبيره.. يلا قولي مافيني صبر..

غزلان: سمعي.. سلمج الله.. (وقالت لها السالفه.. وحصه فاجه عيونها مب مصدقه.. وماحسبت بعمرها غزلان الا وهي تصيح وحضنتها حصه).. احبه حصوووه.. كيف بنساه؟؟

حصه: فديتج والله.. بس حبيبتي ماعندج سالفه اتحبينه.. شو تحبين فيه .. وعععع من شفته قلت ما بيي من ورا راسه غير المشاكل.. حتى عادل قال لي.. انه ما ارتاح له موووول

غزلان: كل شي نصيب.. ومحمد ولد خالتي بعد نفس الشي كان معارض ..

حصه: الشي الي ايي فيه لا.. صدقيني ما يكتمل.. هالشي معروف

غزلان: يالله شو بقول غير الله يعين..

حصه: غزلان.. انتي ثانويه عامه.. ولا تخلين هالسالفه اتهز فيج شعره فاهمه.. انسي.. والحمد لله ان السالفه عدت على خطوبه وبس.. ونفاد.. ترا شي الي احسن عنه واااايد .. ومليون واحد يتمنى ظفر من ظفورج..

غزلان تمت تمسح دموعها.. : حصو.. لا تودريني .. والله ما تصور عمري من غيرج

حصه: لا تقولين هالكلام.. لو روحي فارقت الدنيا مستحيل تفارقج.. انتي انسيه .. وخلج وياي.. ترا الإسبوع الياي ملجتي..

غزلان: احلفي.. اللللللله وناسه

حصه: اسكتي مرتبكه

غزلان: لا ترتبكين ولا شي.. ترا عادل ريال زين.. والكل يشهد له..

حصه: الحمد لله.. احمد ربي مليوووون مره عليه.. اتصدقين احس ان الله وفقني من بعد رضا امي وابوي علي.. ونفس الشي بيصير فيج.. دام انج ابديتي رضا هلج عليه.. ربي بيوفقج وبتشوفين

غزلان: ان شاء الله..

وتموا يسولفون لين ما تأخر الوقت وردت حصه البيت ونزلت غزلان عند اهلها وقعدت وياهم تسولف.. وتقضي وقتها.. وسمعوا صوت جرس البيت.. وكانت الساعه 10.45 .. الكل استغرب.. منو يايهم هالوقت.. تموا ساكتين يتريون الخدامه تفتح الباب..

وفجأه حد فتح باب الصاله.. ودشت الخدامه وياها الشخص الي ياي .. الكل شهق.. ونش من مكانه مب مصدقين الي ياينهم.. واولهم غزلان.. الي بغا قلبها يوقف من الصدمه.. وتمت اتحج عيونها وترد تفتحهم تبا تتأكد ان الي تشوفه صح.. لين ما تأكدت.. ونشت من مكانها..

<<<< عقب ما عشت انا بحبه وعاش بداخل أعماقي.. تركني وابتعد عني ونسى حبي مع وعودي.. وصرت أبكي وبكت فيني جميع أورود أحداقي.. وبكيت ومن يدي طاحت وجفت باقي اورودي.. >>>>
=============
نشت غزلان من مكانها وربعت صوب الباب وهي تصرخ ومستانسه.. وفرت عمرها في حضنه.. والكل نش متفجأ من هالييه المفاجأة.. صدق استانسوا لردة سعيد بالسلامه..
غزلان: حبيبي والله حبيبي.. تولهت عليييييييييك .. ليش ما قلت انك بتيي نفرش لك الدرب كله ورد..
سعيد وهو مستانس لشوفه الكل.. وردة فعل غزلان فرحته زود: فديت روحج.. مابغيت اتعبكم.. هههه
وبسرعه ربع صوب امه وابوي وباس راسهم وحضنهم.. وسلم على هند ووداد .. وعلي وهادف.. وكان مستانس وااااايد لشوفه علي ونفس الشي بادله علي..
سعيد: اخيرا شفناك ياولد الخاله..
هند: ماعليه سعود.. انا زعلانه منك
سعيد وهو يصد صوبها.. ويمشي صوبها: افا اختي حبيبتي تزعل مني.. لييييش؟
هند: اونك ماتعرف.. ليش ما قلت لي ذاك اليوم؟
سعيد: كنت بقول لج.. بس عقب غيرت رايي قلت اخليها مفاجأة أحلى..
غزلان وهي تحضن كتف اخوها واتحط راسها عليه.. : هي والله أحلى مفاجأة.. (وبنبره حزن).. ياني كنت محتاجه لك يمي في هالوقت بالذات..
سعيد حس من نبره صوتها .. ومن ويوه الباقي الي انجلبت والي تم يطالع الثاني.. حس ان في شي صاير.. : ليش شو صاير؟؟ انطقوا.. ليش جيه ساكتين.. ليش تتطالعوني جذي.. لا تستكتون.. طيحتوا قلبي..
غزلان وهي تحضن سعيد واتصيح .. سعيد ما تحمل زود.. مسك غزلان وداها وياه صوب غرفته عشان يقدر يكلمها على راحته ويعرف منها الموضوع.. لأن سعيد حتى ما عنده خبر عن سالفه هادف يوم دش السجن.. عشان جيه استغرب يوم شاف هادف عندهم في البيت ويالس وياهم مع ان في العاده هالوقت كان يبات برع البيت ..
سعيد وهو ايلس غزلان على السرير وقعد هو مجابلها على الكرسي: ممكن تهدين احين وتقولين لي شو الي صاير؟؟
غزلان وهي تمشي دموعها.. وتشهق.. : فسخت خطوبتي من خالد..
سعيد وهو منصدم فج عيونه وتيبس مكانه.. شوووو.. شو تقولين انتي.. من صدق ترمسين؟؟
غزلان: هيه يا سعيد من صدق ارمس..
سعيد: مينونه انتي.. توكم الا انخطبتوا..
غزلان: بس هله مب راضين علي.. لأنهم عرفوا بالي سواه هادف..
سعيد: هاااادف!!!!؟؟ .. شو مسوي؟؟ .. وشو دخله في السالفه
غزلان رفعت راسها تذكرت ان سعيد ما يعرف.. : اوه صج.. انت ماتعرف عن موضوع هادف.. سلمك الله..
وقالت له السالفه من البدايه للنهايه.. وقالت له وجهة نظر اهل خالد في هالسالفه.. ورده فعلهم..
سعيد: نفاااااد ينفده هو وهله.. مع اني ما شفته بس من بعد الي سمعته ماابا اشوفه لأني لو شفته ما بعدي السالفه على خير.. شو يتحرى بنات الناس لعبه.. خلاص حتى لو عرف.. مب معناته يفسخ الخطوبه عشان هالشي التافه.. يعلقج وعقب عادي عنده يروح.. خله يولي والله بتلقين الي يسواه ويسوى طوايفه.. وهو الي بيندم صدقيني.. بس انتي لا تصيحين ولا ما بعطيج الي يبته لج..
غزلان: احلف.. شو يايب لي؟
سعيد: بل بل بل.. ولا جنها توها تصيح.. من سمعت طاري الهدايا تخبلت..
غزلان وهي تبتسم له.. وسعيد بادلها الإبتسامه.. ومسك ايدها: يلا نشي خل ننزل.. اتقولين مسوين فلم هندي في الغرفه يلا تولهت على سوالفج يالحماره والله
غزلان: حتى انا والله.. البيت من غيرك موووول مب شي..
سعيد وهو يرفع خشمه: ادري..
غزلان :ههههههه.. خقاااااااق ياربي
سعيد وغزلان نزلوا والضحكه ماليه ويهم.. والكل تطمن.. لأنهم يعرفون سعيد واسلوبه كيف.. وهالشي الي خلاهم يخلونه بروحه ويا غزلان..
سعيد: اكيد متعشين.. في شي في المطبخ.. لأن حدي يوعان؟
هند: افا عليك انت بس.. دقايق والعشا عندك..
وداد: لا.. انا بسير انتي قعدي..
هند:لا انا..
وداد: قلت لج انا
سعيد: وبعدين يعني ما بتعشى اليوم ولا شو؟
غزلان: لا انتي ولا هي.. انا الطباخه الماهره بسير اسوي أحلى عشى لأحلى أخو..
هادف: أكيد بيض طماط..
غزلان: هي هي هي.. مقبوله منك.. انا بسير بسوي العشا.. ويوم بييبه وعيبك ياويلك اذا قلت تبا .. مابسوي لك..
علي: عيل انا من الحين بحجز نصيبي.. انا بعد أبا
غزلان: خلاص .. حاجه تانيه يا حضرات..
هند: لأ.. خوشي جوه.. وماتعمليش هيصه بيصه.. خليكي مؤدبه..
غزلان: حاضر يا ماما..
الكل تم يضحك على وداد وهي ترمس مصري..
هند: الا سعيد ما قلت كم بتم هني؟
سعيد: ليش مليتو مني.. تبوني اروح؟؟
هند: لااااااااااا.. حرام عليك
وداد: لا تقول هالرمسه اصلا نحن نتمنى وجودك من زمان من بينا..
علي: أوب .. هادف الكل نساني.. يعني وجودي ما فاد شي..
وداد صدت صوب علي وحسته متضايق.. : لا والله علي.. انت افضالك على راسنا من فوق.. رغم مشاكلك الا انت كنت اول واحد عون لنا في مشاكلنا.. واول من سعى لحلها..
علي: لا تقولين هالرمسه وداد .. انا ماسويت الا الشي الي حسيته من واجبي اني اسويه..
سعيد وهو يضرب على ظهر علي عالخفيف.. : تسلم والله .. فيك الخير يا ولد الخاله..
ومر من الوقت تقريبا 45 دقيقه.. وكانت غزلان مندمجه في شغل المطبخ.. وهي اتقطع السلط.. تذكرت خالد يوم قالها انه يموت في شي اسمه سلط.. ما حست إلا بالدموع تذرف منها.. ومسحت دموعها بسرعه ودرت الصحن ونادت على الخدامه اتييب لها الملح ..
وكملت شغلها وحطته في صينيه عوده.. وشلته وظهرت من المطبخ.. كانت مسويه سندويجات دياي ويا مايونيز.. وخيار حامض...
غزلان: وجاااان يوصل العشا..
سعيد: بسرعه هاتيه.. لأن عصافير بطني تنازع الموت..
علي: هيه حتى انا..
هادف وهو يوايج على الصينيه ويشوف شو الي مستونه.. : الللله..
غزلان بسرعه وهي تقاطعه: بعيد بعيد.. مب لك .. بس حق علي وسعيد..
هادف: افاااااا اهون عليج.. اخوج الصغير اخر عنقود البيت..
غزلان: لا تحااااااااول
هادف: اميي.. ترضين على عنقودج؟؟
ام سعيد: يلا عاد فديتج غزلان ارحمي اخوج..
غزلان وهي تعقد حياتها .. افففففف: خلاص ان شاء الله.. اصلا انا مسويه حسابه بس بغيت اعذبه شوي..
وسارت المطبخ ويابت له الصحن الي مسوتنه لهادف وعطته.. وتموا ويا بعض يقضون وقتهم بالسوالف.. وسعيد ما يسكت عن سوالف استراليا وشو سوى فيها..
=======
في بيت حصه
طبعا حصه كعادتها لازم تعطي تقرير كامل لعادل عن الي سوته خلال اليوم.. واستانس عادل يوم سمع عن سالفه غزلان.. : خلاص عيل .. يعني اخوج يروم يخطبها..
حصه: هيه.. بس غزلانوو هاي ما تيبس راسها.. وبعدين انا خايفه عن ابراهيم الي يكون ميبس راسه احين..
عادل: لا ماعليج.. الحب وعمايلوو.. صدقيني لأنه يحبها بينسى كل شي وما بيصدق
حصه: اتمنى... أنزين عيل بخليك احين لأن ابراهيم رد من برع وابا اكلمه في السالفه اشوف شو بيقول
عادل: خلاص.. حطي بالج على روحج..
حصه: مع السلامه .. سلم على عموو وأميره
وبندت عن عادل وحطت التليفون على الكومدين وظهرت من الغرفه صوب غرفه اخوها.. دقت عليه الباب وقالها تدخل.. فتحت الباب ودخلت
حصه: مرحبااااااا
إبراهيم: مرحبتيييييين.. شو مسهرنج لهالوقت.. هيه خلاص عرفت حبيب القلب
حصه: ههههه .. لا شي ثاني كنت اترياك اترد من برع
إبراهيم: شووو.. تترييني انا ليش؟؟
حصه: بعد تولهت عليك وابا اسولف وياك حرام؟
إبراهيم: لا مب حرام.. بس شكله في شي في خاطرج.. طلعيه بسرعه يلا بسرعه
حصه: ياربي فاهمني هالأخو..
إبراهيم: معلوووومتراج خبز ايدي.. واعرفج عدل
حصه: انزين اسمع ياخوووويه.. اليوم سرت بيت غزلان
إبراهيم من سمع طاري غزلان انجلب ويهه ...وتذكر يوم شافها من الدريشه.. تم ساكت ويسمع حصه
حصه:جان اتقول لي سالفه صارت لها امس وعشان هالسالفه مارامت اتداوم وياي اليوم...
إبراهيم: شو السالفه!!!!
حصه تمت ترمس وقالت لإبراهيم السالفه من أولها لآخرها...انصدم ابراهيم من السالفه الي سمعها مب قادر يصدق الي يسمعه...معقوله كل هذا صار في غزلان.. حز في خاطره لأنه عمره ما تمنى لغزلان الضرر والحزن..
حصه: وهاي السالفه كلها...وحليلها تتعذب والله بس ما تبين هالشي جدام أهلها عشان ما يضاجون
إبراهيم: الله يعينها
حصه: بس....ما بتقول شي ثاني؟
إبراهيم:شي ثاني مثل شو مثلا يا آنسه حصه؟؟
حصه: انت عارف انا شو قصدي..
إبراهيم: لا يا حصه انا ما افكر فيها... هي طول عمرها ما افتكرت فيني كيف انا بفكر فيها من بعد هذا كله ماروم
حصه: بس..
إبراهيم وهو يقاطعها:لا بس ولا شي سدي السالفه...
سكتت حصه لأنها شافت الضيج في عيون اخوها وماتقدر تلومه لأنها عارفه ان الحق وياه
حصه:هيه صدق باجر منو بيوديني
إبراهيم: سيري مع الباص
حصه: لا والله .. وانت والدريول
إبراهيم: الدريول مشغول ويا ابوي..... انا الي ببتلش فيج
حصه: اصلا تتمنى ان حصوص تركب الموتر حذالك يشرفك حضورها
إبراهيم: هههههه.. مالت عليج يلا برع ابا ارقد
حصه:بعد.. يطردني؟؟؟ماعليه برهوم انا اراويك
تم يأشر عليها يلا برع... ويضحك .. وهي ميته غيض ظهرت بعد ما صكت الباب ابتسمت ونفس الوقت حز في خاطرها علاقة اخوها مع غزلان كيف بتصير؟؟؟
تنهدت وسارت صوب غرفتها ودخلت ورقدت..

سلطان من سمع ان سعيد ياينهم مع التعب الي فيه ما قدر يصبر نفسه انه ما يزورهم.. وياهم البيت والكل تفاجأ من هالزياره المفاجأة.. بس طبعا استانسوا يوم شافوه انه متعافي وصحته أحسن من قبل..
سعيد: هلا والله بوالشباب.. اشحااااااالك؟؟
سلطان: مرحبااااااااااا .. بخير.. ربي يعافيك.. وينك ياريال ليش ما قلت لنا انك بتيي؟
سعيد: شو اسوي قلت اسويها مفاجأة هالمره.. الحمد لله على السلامه.. ما تستاهل والله
سلطان: الله يسلمك.. بس صدق مفاجأة هالرده.. شو السالفه؟؟
سعيد: ماشي... قلت اشوفكم حرام.. تولهت عليكم
سلطان: وحليلك يا سعيد ضعفان.. لا مب حرام حشى.. تعال تعال.. خل ايلس وياك اشوف اخبارك
سعيد: أخباري خلصت الساعه 10 .. ماشي اعاده
سلطان: يلا عاد.. أونه
سعيد: كيفك والله انت الغلطان ليش ما قلت لي انك بتيي عشان اسجل اخباري.. احين ماشي تسجيل عشان اعيده
سلطان: ماتيوز من سوالفك
وتم الكل يكمل سوالف لين الساعه صارت 1.30 سلطان طبعا ما قدر يتم زود ورد البيت ومن بعدها
الكل سار رقد.. إلا سعيد وعلي الي كانت السوالف ماخذتهم..
سعيد: والله ياني كنت متوله اشوفك ياعلي..
علي: وانا بعد نفس الشي..دوم كنت اشوف صورك عند خواتك .. واقول متى اقابله ويه بويه
سعيد: عاد انت على الأقل عندك صور تتطالع فيها.. مب انا ماشي موووول
علي: ههههه.. يلا شفت شيفتي احين ارتحت..
سعيد: هيه والله ارتحت... اليوم اكثر يوم احس فيه بالراحه خصوصا بعد ماعرفت بالي صار لغزلان..
علي: والله ماتستاهل.. ماكنت ادري ان هالمشاكل كانت بتصير ولا ماكنت بخلي هالخطوبه اتم.. ماعلينا المهم.. انت لين متى ان شاء الله هني؟
سعيد: والله اسبوعين بس.. وبرجع..
علي: اها.. شو عندك اجازه؟
سعيد:لا طالبين مني بحث اسويه في بعض الإدارات هني.. وهالشي الي خلاني ايي..
علي: زين الحمد لله ان هالبحث ياك عشان اتيينا..
سعيد: هي والله .. على الأقل كنت وياكم في في هاللحظات الي محتاجيني فيها..
علي: انزين.. اظني انك تعبان من السفر.. ومب راقد.. فأحين لازم تروح ترقد وترتاح وباجر ان شاء الله بنكمل سوالفنا..
سعيد: هي واله.. اسميني مسطل. ودي أخمد من الخاطر..
علي: عيل نش وانا بنش وراك بسير أرقد لأن باجر لازم اراجع الوزاره اشوف سالفه تعييني ومتى اداوم.. وارمسهم عن سالفه العمره
سعيد: يلا ربي يوفقك.. نش ابوي وراك نشه الصبح انا باجر اجاااااااازه برقد
علي: ماعليه عيب.. انا اراويك.. اتريا علي؟
سعيد: اوكي.. نتريا..
==========
وسار علي وسعيد كل واحد فيهم حجرته يرقد..
======
في بيت بوعلي..
كان محمد أخوه يالس يتابع فلم على قناة 2.. ومندمج في الفلم.. فحطو دعايه .. وفي هالدعايه انذكر فيه اسم البنت على اسم منى.. تم يطالع البنت الي في الدعايه.. ويتذكر منى..
اااااه صدق هالبنت جذبتني بصوره مب طبيعيه.. اسلوبها.. مشيتها ابتسامتها.. رقتها.. كل شي فيها.. اسميني متوله على شوفتها بس كيف ممكن اشوفها؟؟ .. مادري.. ليتج ضعتي في بيتنا مب في بيت سلطان.. وشل تليفونه واتصل في علي لأن صار له يومين ماسمع حسه..
علي توه كان غافل ومن سمع رنة التليفون نش.. وشاف الساعه 2.20 نص الليل والرقم رقم محمد اخوه.. خاف عن يكون شي صاب ابوه ولا امه.. رد على الرقم على طول..
علي:الوو
محمد: بسم الله اشفيك .....!!
علي: مادري عنك متصل تالي الليل خرعتني؟
محمد: هههه.. كنت راقد.. نش نش.. ماشي رقاد
علي: حرام عليك وراي اشغال باجر
محمد: حتى انا .. شو تحيدني بطالي.. ماشي نش ابا اسولف وياك شوي ملان..
علي: نشينا..يلا سولف خل اسمع؟
محمد: اشحالك؟؟ واشحال خالو والبنات كلهم؟
علي: والله يوم تبا تنشد عن حالهم تدل بيتهم ليش ما اتيي يالخاين هاااااااااا؟؟
محمد: لاحوووول.. كليتني..
علي: والله انك حركات.. وعلى فكره ترا سعيد رد من السفر؟
محمد وهو متفاجأ: احلف؟؟,,, متى؟
علي: اليوم يانا فجأة من غير لا يقول لنا
محمد: وحلييييله.. دام جيه لازم اييكم اسلم عليه
علي: وخل اخبرك شي ثاني ..
محمد: شو بعد.. ياكثر سوالفك اليوم يا علووو؟؟
علي: هههه .. شو نسوي.. تراك قلت تبا اتسولف.. اسمع سلمك الله غزلان وخالد انفصلوا عن بعض..
محمد نش اتيبس مكانه.. مب مصدق الي يسمعه: شووووووو
علي: اشفيك بسم الله
محمد: من صدق ترمس ولا تسولف ؟؟
علي: لا والله صدق.. فسخوا الخطوبه
محمد: ولييييش؟؟ .. مو انا قلت لك من البدايه هالريال مب مرتاح له.. ولا تستعيلون عالبنت انتوا مادري بلاكم.. انزين كمل
علي: انزين احين ماشي فايده نرمس عن قبل.. السالفه يا محمد (وقال له السالفه كلها).. فهمت احين شو الموضوع..
محمد: والله انا مارمست ولا عارضت الا من خوفي على غزلان شرات اختي.. بس انتوا.. ماشاء الله عليكم..
علي: يالله عسى أن تكرهوا شيئا وهو خيرا لكم..
محمد: صح والنعم بالله.. بس..
علي: لا تبسبس لي احين.. خلاص الموضوع انتهى وغزلان مقتنعه بقرارها..
محمد: والله تكدرت من السالفه
علي: شو اسوي بك بغيت سوالف ترا قلت لك سالفتين
محمد: الله يقطع سوالفك دامها جيه؟؟ .. يلا اجلب ويهك.. وسير ارقد ابويه
علي: احسن بعد.. يلا مع السلامه
محمد: وداعة الله
وبند علي عن اخوه وحط راسه ورقد.. ومحمد حس ان راسه صدع من السالفه الي سمعها.. ومب مستوعب الي صاير.. نش من مكانه وسار حجرته وحط راسه يلس يفكر شوي بالي صار في غزلان ورقد..
في نفس البيت لكن في غرفه ثانيه..
بالتحديد في المكتب..
أمنه وريلها جاسم كانوا يتعبثون في الأوراق ويدورون على أوراق البيت والمستندات الخاصه فيه..
جاسم: بس تعبت من متى وانا ادور مالقيت شي
آمنه وهي تتطالع صوب الباب وتهمس له: نش يلا ماشي وقت.. باقي هالأدراج ما دورنا فيها نش يلا..
جاسم: اففففف.. متأكده انها هني
آمنه: هيه متأكده انا شفت عمي يدخل الأوراق هني ..
جاسم: يمكن عنده في غرفته..
آمنه: لا هني في المكتب.. يلا دور..
وتموا يتعبثون.. وفي هالوقت حصلوا في ملف لونه أخضر.. فتحت آمنه الملف وشافت فيه كل الأوراق الي كانت تدور عليهم.. : جسووووم.. حصلتهم..
جاسم بسرعه يربع صوبها: وين خل اشوف؟؟
آمنه: ماشي وقت خل نظهر قبل لا يحس أحد فينا.. وفي الغرفه اقعد اتطالعهم..
وبسرعه ظهرت آمنه من المكتب ويا جاسم وراحوا الغرفه وتموا يطالعون الأوراق والفرحه مب شالتنهم.. مستانسين حدهم..
جاسم: وأخيرا أمووووون..
آمنه: هي والله وأخيرا..
جاسم: بيفضى لي هالبيت كله لي انا وياج..
آمنه: ان شاء الله.. بس انت استغل تاريخ التوكيل الي وياك وبسرعه سو الإجراءات..
جاسم: خل اكسر عين محمد شوي.. الي مادري على شو شايف عمره .. والكل يتمدح فيه في البيت.. الحمد لله يوم انه يشتغل في الجيش.. ولا كنت بتوهق وياه في الشركه.. وزين بعد يوم قرر يتنازل لي عن التوكيل..
آمنه: ماعلينا من هذا كله المهم التنفيذ..
جاسم: خلاص عيل.. خليني ارقد احين دام ان باجر وراي شغل..
آمنه: فديييييت روحك انا نام حبيبي نام..

ومرت الأيام طبيعيه .. جاسم طبعا سار بموجب التوكيل العام الي عنده باع البيت على عمره.. وصار ملك لجاسم ومن غير لا يدري حد من هله طبعا بالموضوع.. وعلي تعين في مستشفى راشد وبدأ يداوم تدريب في قسم الباطنيه فيه.. وقالهم انه في ثاني اسبوع من رمضان راح يسافر العمره .. وما ننسى الشنطه ردها علي لخالد الي من شاف الشنطه وقتها تأكد ان كل شي بينه وبين غزلان انتهى وللأبد.. فحس كأنه مكسور من داخله ويبا يعوض هالكسر بأي شي.. طلب من أمه تدور له أي وحده ثانيه عشان ياخذها وتقدر اتنسيه غزلان .. ومن درت غزلان وهي حالتها مب حاله بس طبعا كعادتها ما بينت لحد هالشي.. بس يوم تتفرغ بروحها تقضي يومها بالصياح.. وحصه في هالأيام كانت مشغوله بتجهيز عمرها للملجه خصوصا انها راح تكون بيوم الخميس وماشي وقت.. وابراهيم من عرف ان غزلان ودرت خالد وهو مب عارف راسه من ريوله.. مب عارف بأي موقف يستقر.. يسامحها ويحاول وياها ولا خلاص.. ؟؟.. هالشي كان الهم الشاغل بالنسبه لإبراهيم..
أحمد.. هاذا في عالم ثاني.. كل أيامه في الكليه ويتذكر منى.. يتذكر آخر لحظه جمعته فيه وياها.. والإبتسامه الي ابتسمتها له.. ويتذكر شكلها وهي تمشي عنه وتروح من بعد ما طلب منها السماح.. يتذكر كيف كانت مهتمه في سلطان وتنشد عنه.. وتذكر يوم صرخ عليها والدموع امتلت في عينها.. لا هالبنت عجيبه.. قدرت تجذبني لها بشكل مب طبيعي.. بس يارب اتكون مبادله نفس الشعور لي..
سعيد.. كل يوم الصبح ينش يروح هالشركات ويدور المعلومات الي يحتاجها للبحث الي بيقوم به.. منى في هالأيام طبعا كانت باديه الدراسه المسائيه وتروح المدرسه وتدرس عشان تكمل تعليمها الثانوي.. وقفت طبعا من صف أول ثانوي..يعني باقي لها تدرس سنتين وتخلص الثانويه.. وكان سلطان مهئ لها المدرسين الي يعرفهم عشان يدرسون منى بعض المواد الي تستصعب فهمها في المدرسه.. وكانت مستانسه واااايد لهالشي..
========
يوم الأربعا..
في هاليوم كان الكل مقرر يجتمع في بيت اهل بوسعيد عالغدا.. لأنه بدايه الإجازه.. وأحمد كان بيرد من الكليه وراح اييهم من بعد ما يمر البيت يبدل ويروح لهم..
أول ما وصل البيت عندهم فمن شاف سعيد ماخلاه في حاله من كثر ما تم في حضنه وهو يسلم عليه.. : يالحمار والله تولهنا عليك صدق سنه كامله ما شفناك
سعيد: منو قالك ماتيي ويا الأهل ألمانيا يوم سافرو..
أحمد: وليش انت ما تنزلت اتيينا؟
سعيد: امي وابوي سايرين المانيا انا ايي اجابلك ليش؟
أحمد: مالت عليك وليش انا ما استاهل.. ماعليه انا اراويك خل نتغدى بنتقم منك في لعبة الهاند
سعيد: احم احم.. شكلي بنهزم اليوم..
علي: افاااا ولد الخاله.. تخلي أحمدو يهزمك؟؟
سعيد: شو اسوي ترا مالعبت من زماااااان عشان جيه
علي: انت خلك للبلي استشن مالك ..
أحمد: يهالوو..
سعيد: اقول أحمدووو.. اظني احسن لك انك تتغدى صح؟؟
أحمد: اوه غدى.. اممممم يوعان..
وبسرعه ربع صوب الطاوله وقعد.. ويلسوا يتغدون.. والسوالف ماخذتهم.. وكان من أحلى الأيام الي مرت على العايلتين .. من بعد هالفتره كلها من المشاكل والتعب.. الكل يجتمع ويا بعض.. وجود سعيد ساعد هالجو العائلي يزداد حلاة عن قبل.. ..
من بعد الغدا الكل قعد يسولف ويضحك.. وداد طبعا كانت عازمه منى واهلها عندهم .. بس اهل منى اعتذروا لإنشغالهم.. ومنى روحها الي بتييهم.. وداد ماقالت لحد عن زياره منى.. غير سلطان طبعا..
سعيد: أخبرك يالغشاش؟؟
علي: منو انا؟
سعيد: شوفو يعرف عمره بعد.. اتصل في محمد اخوك خل ايي.. بتحلو القعده والله.. الكل هني وفرصه..
أحمد: هي والله صدق.. انا بعد من زمان ما شفته..
سلطان: هيه والله القعده جيه صدق بتحلو..
علي: خلاص بكلمه وبشوف شو بيقول..
علي كلم محمد الي ماصدق استانس لهاللمه وبسرعه ركب الموتر وسار لهم.. واجتمع وياهم.. واحلوت القعدة اكثر واكثر.. يوم شاركهم محمد القعده.. البنات طبعا كلهم في المطبخ..يشتغلون ويسوون سويتات.. غزلان هالقعده ساعدتها انها تنسى شوي الهم الي هيه فيه.. وكانت تشتغل من خاطرها وياهم..
سلطان ومحمد وجاسم ريل فدوى اخت سلطان.. قاعدين يسولفون عن الدوام والشغل..والشباب .. أحمد وسعيد وعلي وناصر وهادف.. اللعب لاعب دوره وياهم.. بوسعيد وبوسلطان هاييل سوالفهم عن الشركه.. وعن ربعهم وعن ايام اول.. وام سعيد وام سلطان يلعبون ويا عيال فدوى ويسولفون.. عاد تدرون سوالف العيايز..
مر الوقت وصارت الساعه 5.45 العصر..
سمعوا صوت جرس البيت.. الكل استغرب منو بعد ياينهم زود؟؟ .. وداد طبعا كانت عارفه منو الي ياينهم..
وداد: شوفيكم.. محد غريب.. منى الي يايه دقيت لها عشان اتيينا..
سلطان: هي والله.. ما ننسى انها في يوم من الأيام كانت تعيش ويانا
سعيد مب عارف منو هاي.. : منى؟؟ .. ومنو منى؟؟
علي: اووووووه صح نحن نسينا نخبرك السالفه.. بخبرك عقب..
أحمد ومحمد كل واحد من سمعوا طاري منى وكل واحد فيهم سرحان في عالم منى..
وداد طبعا سارت عند الباب عشان ترافق منى لداخل البيت..
منى: استحي وداد وايد ناس عندكم مبين؟؟
وداد: لا وين.. محد غريب.. كلهم تعرفينهم؟
منى: لا بس استحي والله..
وداد: يلا عاد خل عنج.. ادخلي محد بياكلج..
منى دخلت البيت وكانت منزله راسها ميته حيا.. شافت في ويهها ام سلطان الي كانت تترياها جريب الباب.. بسرعه مشت صوبها وسلمت عليها وباست راسها..
ام سلطان: مانشوفج غير في السنه مره زين جيه؟
منى: شو اسوي امي.. والله الدراسه ماخذه وقتي
أم سلطان: خبريني.. شو مسويه.. ان شاء الله بخير.. ومرتاحه.. ومحد مضايقج
منى: لا الحمد لله مرتااااااحه
أم سلطان: الحمد لله..
دشت منى والقت السلام على الكل.. وأحمد من شافها ما قدر يمنع نفسه من انه ينش لها ويوقف والكل لاحظ هالتصرف من أحمد.. ويلست منى حذال ام سلطان.. والبنات ساروا المطبخ يكملون شغلهم.. وكانت مجابله أحمد في المكان الي قاعده فيه.. وأحمد من فرحته تم مرتبش صدق من الخاطر..وكل شوي تتلاقى نظراته ونظرات منى.. الي ما تم حد فيهم مالاحظ هالنظرات.. وأولهم محمد.. وهالشي الي صابه بضيج وإحباط.. محمد فيه وسامه .. لكن الي مخرب عليه جسمه.. دبوب شوي.. وضخم.. وكبير في العمر.. ومبين عليه الكبر.. كمل ال31 سنه تقريبا..
انا جيه .. مالي حظ في حياتي.. يوم حطيت غزلان في بالي طارت.. وأحين منى.. لا الا هالإنسانه.. عاجبتني بصوره مب طبيعيه.. كل شي فيها عايبني .. رقتها.. حنانها.. ضحكتها.. تصرفاتها.. مب طبيعيه ابدا..
=======
أحمد: نصور.. نش يالغشاش.. نش..
ناصر: شو ها.. انا ما غشيت..
أحمد: لا غشاش واكبر غشاش بعد.. عيل كل الأوراق عندك انت بالذات ليش؟
منى نشت وسارت صوب أحمد وناصر.. ومحمد كان في هالوقت منزل راسه مب منتبه .. انتبه لها يوم مرت جدامه وخطفت اتسير صوب الي يلعبون.. رفع راسه.. وتم يشم ريحه عطرها وهي تمر جدامه.. ويحس بالدم الي يسري في جسمه.. يحس بحراره مب طبيعيه.. رد نزل راسه..
منى: لا تقول عن نصوور غشاش ما ارضى عليه..
أحمد استغرب من سمع صوت منى.. تيبس وتم يطالعها مستغرب.. ناصر متشقق: عاشت منوو.. اتدافع عني
علي: استانس احين عندك محاميه دفاع
منى: اقول ناصر.. نش نش انا بلعب هالدور بدالك.. بشوف من الغشاش الحقيقي..
أحمد: لا والله شو قصدج..
منى: ماشي.. بتلعب ولا..
أحمد وهو ماسك الأوراق ويخبص فيهم ويمنزل راسه : هيه.. (رفع عينه وهو يطالعها في عينها بغرور).. وأتحداج..
منى (ترد له نفس النظره): اوكييي..
غزلان من شافت منى ماسكه الأوراق ربعت عندها.. : انا بعد بلعب..
هادف: افففففففف..
غزلان وهي تتطالعه هادف بغيض.. : جب مايخصك..
أحمد: بعدين.. انا احين اتحدى بعض الناس.. نشي من عندها مابا مساعدات لها..
منى وهي تتطالع الأوراق وترمس بغرور: ما احتاج مساعدات اصلا..
محمد في هالوقت كان يحس بالضيج في صدره.. نش من مكانه والكل تفاجأ من نشته.. لأنه كان مقرر يتم على العشا..
محمد: يلا يا جماعه انا بترخص..
علي: وييييين.. تراك بتم على العشى؟
محمد: لا ماعليه مره ثانيه بس تذكرت شغله لازم اسويها..
سعيد: يلا عاد.. أجل أشغالك ليوم ثاني..
محمد: لا ماعليه..
وسلم عليهم كلهم.. ومشى بسرعه وظهر.. الكل لاحظ الضيج الي في عيونه.. خصوصا علي.. وماهان عليه يخلي اخوه بهالحاله.. استأذن ولحق أخوه وركب وياه الموتر وراحوا..

ياترى شو بيقول محمد لعلي؟؟
ومنو بيفوز بالتحدي.. أحمد ولا منى؟؟ وياترى في حب انولد من بينهم؟؟
وملجه حصه وعادل باجر.. شو بيصير فيها؟؟
جاسم ومرته.. شو الخطوه الي ناوين عليها من بعد ما شلوا البيت؟؟
وإبراهيم وغزلان.. في شي بيصير من بينهم؟؟

للحب عنوان

الجزء الحادي والعشرون

===========

ملخص الجزء السابق: (( ردة سعيد من السفر وهالشي الي هون على العايله الي صابهم طول هالفتره.. انفصال غزلان عن خالد نهائيا.. قرار خالد الزواج من أي وحده.. طلعة سلطان بالسلامه من المستشفى.. وعرف إبراهيم عن موضوع غزلان.. وحب محمد وأحمد الي بدا صوب منى..وتعيين علي في المستشفى وبدأ دوامه.. تحويل جاسم بيت ابوه بإسمه بموجب التوكيل الي وياه))

=====================

><<>>< والله أحبك موت .. لو يموت الصدق في أحضان السكوت.. والزعل يسكن بيوت.. والفراق يصير عادي.. والكذب في كل وادي .. ويصبح الأبيض رمادي... والفرح يلبس سواد.. ويعلن الحب الحداد.. ما يغير في فؤادي قلتها بمليون صوت .. والله أحبك><<>><

==========================

في الموتر عند محمد..

محمد: انزل شو يابك هني؟؟

علي: اقول.. امش اظهر.. ولا تضيع وقتك لأني مب نازل..

محمد وهو يضحك.. : خبل..

علي: ماعليه .. المهم يلا عشيني على حسابك يلا..

محمد: لا بعد يتأمر.. والله وكبرت يا علوو

علي: اخبرك محمد.. ممكن ايلس وياك قعده صريحه شوي.. ؟؟

محمد مستغرب من اسلوب علي وياه.. وصد صوبه.. وهز راسه بمعنى موافق..

علي: محمد انت ليش ظهرت من بيتهم.. مع انك كنت ياي على اساس انك اتم للعشى؟

محمد اطالع علي بنظره .. ورد صد يطالع الدرب وهو يسوق وحاط ايده مساندنه على الجامه (فاتح الجامه طبعا).. وايده تحت ذقنه..

علي: شو بلاك ساكت حمووووود.. ارمس..

محمد وهو معصب.. يصد صوب علي.. ويتجاوز الي جدامه.. حس علي ان محمد فيه شي ومعصب من الخاطر.. : لا تقولي حمود.. انا اسمي محمد..

علي استغرب.. مع انه دوم يناديه حمود.. ليش عصب بهالطريقه.. مع انه مب بالعاده يحرج عليه.. شو الي صاير ومخلي محمد بهالعصبيه..تم ساكت.. وصد صوب الجامه الي حذاله وتم يطالع الدرب وهو سرحان.. ويفكر ياترى شو فيه اخوه ..

وفي هالصمت الي كان مخيم من بينهم ما مرت ربع ساعه الا وجان يرمس محمد..: هالدنيا كل شي فيها بالجلب.. عمري ما ترقعت فيها.. ولا ظني بترقع فيها باقي عمري.. وين ما اباها تمشي تعاندني وتمشي عكسي..

علي تم يطالع محمد بإستغراب.. يحاول يفهم منه شي واحد.. مب قادر يجمع شي من كلامه ويربطه بشي.. حس انه راسه مفتر وضايع.. تم يطالع محمد وساكت..

محمد: اخوك جاسم كله يتحراني طمعان ببيزات ابوي.. ومن يوم ما سوى ابوي التوكيل بإسمي وهو جالب الدنيا على راسه وكارهني.. ما تحملت وعطيته التوكيل.. عشان افتك من شره.. والله مابا من هالدنيا غير اني اعيش وانا مرتاح البال.. راحه البال عندي عن ألف شي.. علي؟؟

علي: هلا..

محمد: تدري ليش انا ماعرست للحين؟؟

علي: هيه انت قلت لي انك تترياني ارد البلاد؟

محمد: مب بس جيه... يعني مثلا كان بإمكاني اخطب واتريا ردتك واعرس..

علي: ها عيل شو السبب..

محمد: لأن بكل إختصار مافي وحده ترضى فيني

..علي وهو معصب ومتنرفز.. : لا والله.. ليش ما ترضى فيك..؟؟ اصلا خسرانه الي ماترضى فيك.. وبعدين..

ويقاطعه محمد.. : بس بس لا تكمل.. علي انت مب عارف شي.. خلها على الله

علي: شو الي صاير ممكن اعرف..

محمد: علي.. دخيلك.. الي فيني كافيني.. يلا ما تبا تتعشى الليله ولا شو.. وصلنا المطعم..

علي: اممممممم.. لا مابا اتعشى..

محمد: كيفك انت الخسران..

توه محمد بيظهر من الباركينج.. جان علي ايود ايده.. : لا هونت.. يوعان يوعان..

محمد وهو ميت ضحك عليه.. : انزل عيل..

نزلوا سوى.. ودخلوا المطعم.. ومن بعد ما طلبو.. : محمد.. يلا اباك اتقول لي السالفه.. انا من وين بعرف غيرك.. ماكنت من بينكم.. طول هالسنين وانا بعيد عنكم..

محمد: اه يا علي.. لا تذكرني.. اكتئب زود وزود..

علي: قول ياخوي .. افا عليك بس..

محمد بدت ترجع ذاكرته لخمس سنين ورى.. تم يرمس بصوت مبحوح وقلب نازف من الماضي..

======

محمد: أحبج يا بنت الناس.. فهميني..

هنادي: لاحوووول.. وبعدين يعني.. افهم ياخي .. مب قادره ابادلك هالشعور خلاص..

محمد: ليش.. ؟؟.. شو الي قاصرني .. شو الي فيني ما ينحب؟؟.. مب ريال ؟؟ .. ولا تشوفين شي ثاني..

هنادي: شووووو.. وتسأل بعد شو الي فيك ما ينحب.. هيء.. اقول.. (وهي اتحط صبعها على راسها .. وهي رافعته وتتطالعه من تحت عيونها).. شغل مخك شوي.. ولك ويه تسأل بعد.. اقول شكلك يوم تنش من الرقاد ما تشوف شكلك في المنظره.. اييب لك وحده تشوف عمرك فيها..

محمد انصدم من هالرمسه.. حس بطعنه في صدره.. كيف تقول له هالكلام.. وهو يعلي صوته ويصارخ: هناااااادي.. جب ولا كلمه فاهمه.. انا الغلطان اني حبيت وحده شراتج.. كان لازم اعرف انج من نفس طينه امنه اختج.. بس تذكري.. ما بتلقين انسان يحبج شراتي.. ومثل ما جرحتيني بتنجرحين..

هنادي وهي معطته ظهرها وتضحك بسخريه: رووووووح.. هاللي ناقص بعد آخذ نبيل شعيل الإمارات.. وييييه ما اتخيل انا هنادي.. الي كل من شافني يذكر الله بجمالي تتوقع بطالعك.. ساحبني ويايبني ابا ارمسج في موضوع وآخرتها طلع موضوعك تافه..

محمد: هي والله تافه يوم اني فكرت في وحده مثلج زوجه لي..

هنادي وهي تمشي عنه.. وترمس بصوت عالي: هههههه.. زين يوم عرفت.. زوجه لك اونه.. ويه .. بسم الله علي.. جان ابا انتحر كنت بوافق..

وراحت عنه هنادي وتركت في قلب محمد جرح كبير.. وعميق.. نزيفه دااائم وكل ما له يتجدد.. قتلت كل حب في قلبه صوبها... أو حتى أي حب ممكن يعطيه لأي وحده.. صار الحب عنده شرات الهم.. يخاف منه ويشرد منه.. وكأنه حاجز من بينه وبين الي يحبها.. يحاول ما يحب لكن القلب لين.. وبعده ينبض والدم يجري فيه.. لابد انه يحب.. يدور على من يحبه ويرضى به.. من بعد هنادي.. محمد حاول يتناساها.. خطب كذى وحده من الأهل او حتى من برع الأهل.. وكانو يتحججون.. الي تبا تدرس.. والي تبا واحد ثاني.. والي ما تباه لأنه متين.. وهالشي الي كان شرات الهم عند محمد.. وخلته يفقد الأمل.. ومن بعد هالأشيا الي صارت له.. قرر انه ما يتزوج.. واهمل نفسه وجسمه زود.. وهالشي الي تعبه زود.. وردة علي .. ردت في محمد روحه الأوليه .. وساعدته يوقف على ريوله مره ثانيه..

===========

محمد: احين ممكن انك ما تلومني..

علي: والله انها حقيره.. من صغري ما حبها.. وأحين اكرهها زود.. أصلا هي الخسرانه.. وصدقني اذا ما يتك وهي تطلب منك ترد لها..

محمد: الله يوفقها عرست من سنه..

علي: اي الله يوفقها.. انت ماعليك.. انا برمس هند وبخليها اتدور لك احسن بنت..

محمد: لا يا علي.. لا تفشل هند .. يكفي .. خلاص.. انا محد طايق يطالعني.. انا مب حلم البنات ..

علي: محمد.. دخيلك مابا اسمع هالرمسه.. بسبت كم وحده ما قدروك عدل.. وماعرفوا شو من كنز تركو انت ترد بهالطريقه.. اسمح لي اقول لك غلطااااااااان

محمد: علي.. بس يكفي.

علي: انزين ممكن سؤال؟

محمد: شو؟

علي: شو ياب هالموضوع بالذات على بالك اليوم؟؟..

محمد حس ان علي ينغزه بشي.. وانه شاك بشي.. وبحكم الضيج الي فيه ما يقدر يخبي عن أخوه مشاعره.. وده يطلع الي في خاطره .. وخصوصا ان علي اقرب الناس له.. يقدر يشاوره لو بغى.. : منى يا علي..ومن قبلها غزلان..

تم علي فاج عيونه مبهت يطالع محمد.. تذكر كيف محمد كان معارض على موضوع غزلان.. ومحرج.. وتذكر بعض نظرات محمد الي لاحظها اليوم لمنى.. نزل راسه سكت لوهله يفكر.. : اي وحده فيهم في بالك؟

محمد رفع راسه يطالع علي في عيونه ومستغرب من كلامه: شو اي وحده فيهم؟؟.. شو تقول انت؟؟.. انا ماحاط في بالي.. لأني عارف ردهم..

علي: انت رد على سؤالي..

محمد: انا اسف يا علي.. هالسؤال الوحيد الي مابرد عليك فيه.. وبليز غير الموضوع لأن راسي عورني.. وبطني بعد عورني من اليوع.. لأن العشى وصل..

علي سكت.. ماحب يضغط على محمد زود.. بيخليه على راحته متى ما بغى يعترف ويرمس..

=============

في بيت بوسعيد..

سعيد: اف بس مليت ؟.... هاي رابع مره والإخت تفوز علينا.. أحمدوو.. اعلن استسلامي..

أحمد وهو محرج ويطالع منى بغيض: لا السالفه فيها شي.. اكيد فيها شي..

غزلان كانت تلعب هالدور وياهم ومكونه فريق ويا منى.. : ههههه.. حرام والله نحن ما يخصنا هالكلام لكم انتو مب نحن..

سعيد وهو يفر الأوراق على الأرض بالقو.. : تعالي انتي.. (يأشر لغزلان)..

غزلان وهي تبلع ريجها..: امي.. رحت فيها..

أحمد كان في هالوقت يطالع منى بكل غرور.. وهي تبادله نفس النظره.. بس في داخل قلبهم.. نبضات تنادي بإسم الثاني.. وروح ودها تعيش بجسد الثاني.. آه من الحب كيف يعذب..

منى: شوفيك بسم الله..

أحمد: بنلعب اخر دور.. واذا انا فزت اتسوين الي انا اباه.. واذا انتي فزتي.. اتسوين الي اباه انا..

منى: لا والله.. تتذاكى علي اونك.. في كلا الحالتين بسوي الشي الي تباه.. روح ابوي.. قص على حد ثاني.. اصلا تأخر الوقت.. ولازم ارد البيت خواني روحهم..

أحمد وهو يطالعها كأنه يقول لها بنظراته لا.. منى ابتسمت له ابتسامه خفيفه ونشت من مكانها.. وسلمت على الكل واحد واحد .. وظهرت من البيت.. وأحمد لحقها.. : منو بيوصلج؟؟

منى: ها.. عارف بيي احين..

أحمد: تسمحين لي اوصلج؟؟

منى وهي فاجه عيونها.. وعاقده حياتها معصبه: خير..

أحمد افتشل من طلبه ماعرف كيف طلعت منه.. بسرعه لف عنها ودش البيت من فشيلته.. وابتسمت منى من حركته وعفويته.. وظهرت لقت عارف يترياها برع..وردت البيت وياه..

============

في هالليله علي كانت عنده منوابه في قسم الحوادث.. رد البيت يادوب بدل ثيابه وسار المستشفى يداوم هناك.. اول ما وصل قالو له ان في حاله طارئه.. بسرعه ظهر من الغرفه عشان يشوف الحاله.. شاف حرمه اتصيح وتصارخ بشكل كبير.. احتار.. شو الي صاير.. وشاف الممرضين شالين وياهم حد على السرير وبسرعه يودونه في غرفه العنايه.. ونادى الدكتور المختص على علي عشان يدخل وياه يساعده.. علي دخل بسرعه.. وشاف المنظر الي جدامه تروع.. معقوله هاي بنت ليش صاير فيها هذا كله؟؟.. شو الي صاير.. مب مبين شي في ويه هالبنت من كثر الدم الي عليه.. والتشوه الي صاير لها.. وحالتها مبين عليها صعبه وايد.. والي كانت برع كانت امها.. وهم يصيحون بصوت عالي وصوتهم واصل داخل عندهم.. وعلي محتار.. وكل شوي يقول له الدكتور شي وينفذه بسرعه.. واتصلوا على الإستشاري عشان ايي وينفذ العمليه الطارئه الي تحتاجها البنت نتيجه النزيف الحاد الي فيها.. وفي هالوقت طلبوا لها كيس دم عشان يوصولنه لها.. بس للأسف المستشفى ما كانت عندهم نفس فصيله دمها لأنها من النوع السالب.. ولين ما يوصل الدم من بنك الدم بياخذ وقت.. وام البنت فحصوها بس طلع دمها موجب.. يعني البنت طالعه على ابوها وابوها ماكان موجود.. احتارو.. وعلي من سمع السالفه.. وعرف فصيله دمه تبرع بدمه.. لأنه من نفس النوع والفصيله.. وبسرعه رقدوا علي وصلو الدم منه لعند البنت هذي.. البنت هاي بعدها كانت في حاله الإغماء وغايبه عن الوعي.. علي طول الوقت صاد صوبها وهو منسدح على السرير حذالها ويطالعها.. ومحتار شو الي وصلها لهالحال.. وفي هالوقت المتأخر من الليل.. ماكان عارف شو يسوي.. ولا شو يقول غير انه ساكت يطالع المنظر ومن وصل الإستشاري باشروا بعمل العمليه لها.. وبعد 4 ساعات خلصت العمليه.. وطبعا علي فجوا عنه لأنه وقتها وصل لهم اكياس الدم من بنك الدم.. وعلي نتيجه الدم الي فقده كان دايخ ومركبين له مغذي ونايم في السرير الي حذال البنت..

==============

ومر اليوم كله على هالحال.. وطبعا اهل سعيد ما يدرون بالي صار لعلي.. وغزلان من نشت الصبح يوم الخميس وهي مرتبشه لأن في هاليوم ملجه حصه,.. وتتذكر كيف كانت تتفق ويا حصه على الملجه.. وعلى ملجتها.. وتدمع عينها .. لكنها تقوي قلبها وتحاول تنسى هالحال.. وتكون اقوى من هذا كله ... لانه مافي حد يستاهل هذا كله..

هند: ها غزووول .. شو بتلبسين اليوم؟؟

غزلان:مادري والله محتاره.. مالي خاطر البس فستان..

هند: خبله انتي.. بالعكس احلى..

غزلان: امم.. شو رايج في هالفستان البني؟؟

هند: حلو.. بس في فستان في غرفه وداد لونه عنابي رووووعه .. شو رايج تلبسينه؟

غزلان:مابا.. ابا اغير اللون.. العنابي والوردي من نفس الدرجات

هند: هيه اذا جي اوكي

سعيد دخل الغرفه بعد ما دق الباب: اخبركم .. مب جنه علي لازم يرد البيت.. لأن الدوام يخلص؟

هند وهي تتطالع الساعه وتتفاجأ: هي والله.. شو الي أخره هالكثر..

سعيد: مادري بدق عليه وبشوف.. ؟؟

دق سعيد لعلي بس طبعا ما رد عليه لأنه غارق في نوم عميق: ما رد علي؟

هند: إحلف.. لا يكون فيه شي؟

غزلان: لا ويه بسم الله عليه؟.؟ لا تفاولين..

سعيد: مادري بس انا بعد مب مطمن.. بسيرالمستشفى بشوفه؟؟.. يمكن موتره خرباان ولا شي..

هند وهي مهتمه .. : هي يكون احسن..

سعيد: يلا انا ساير تبون شي؟

غزلان: لا سلامتك.. بس طبعا بعد الغدا وصلني الصالون..

سعيد: اففففف.. انزين.. عاد مشكله السبلان يوم يبون يحلون اعمارهم غصب..

غزلان: ههههه.. روح روح.. سبلان اونه.. ماشاف عمره

هند: احم احم..

غزلان: افففففف هالمشكله انه له توأم.. ولا جان قطعته.. انا اقصد احلى سبال..

هند وهي تفر المخده على راس غزلان: جب .. (وظهرت عنها وغزلان تمت تضحك.. وردت اتكمل شغلها للتجهيز للحفله)..

في المستشفى.. علي نش وهو بعده حاس براسه ثجيل من الخاطر.. نادى على الممرض عشان يشل عنه المغذي وينش.. نش من مكانه ومشى شوي.. سمع صوت حد يكح.. استغرب.. لف ورى شاف في ستاره يعني في حد وياه في الغرفه .. لأنه كان راقد ما يعرف انه بعده ويا البنت ذاتها في الغرفه.. تحرى نفسه في جناح الرياييل.. سار صوب الستاره.. وفتحها على الخفيف تفاجأ من المنظر الي جدامه.. لا مستحيل الي اشوفه جدامي.. والبنت من شافت علي تمت امبهته زود.. وهي كانت مركبه عليها الوايرات.. ومجبسين ايدها وريلها نتيجه الكسر الي صابها.. وشويه خياطه على ويهها نتيجه الجروح الي صابتها.. بس مع ذلك علي عرفها.. مستحيل ينسى شكلها.. وهي عرفته من شافته.. تمت تتطالعه بكره.. وبغض.. تتذكر الي سواه فيها.. وتحتقره.. وهو شافها ومتلوم في نفسه .. انه في يوم من الأيام خلا البنت تتعلق فيه ووعدها بالزواج وخلاها ترفض ولد خالتها عشانها بعد ما اوهمها بالحب.. واخر شي تركها وبكل سهوله.. ما قدرت انها تتطالع في عيونه تتذكر الي استوى فيها.. بسرعه غمضت عينها.. وعلي تم محتار شو يسوي.. فقرر يرمس..

علي: ســاره.. انا اسف.. اسف.. اسف.. انا ندمان وايد.. بعد ما تعاملت وتعمقت وياج عرفتج زود.. وعرفت انتي كيف ماهان علي اخدعج زود.. فإبتعدت.. كنت ياي بقصد الإنتقام بس بعد ما سمعت كلامج.. والشي الي خلاج اتكلميني تندمت يا ساره.. انا اسف.. ومن حقج ما تسامحيني..

وظهر علي قبل لا يسمح لها ترد وهي مب قادره اترد اصلا من التعب الي فيها.. ومن الصدمه الي فيها.. تمت صاكه عيونها بعدها ما تعرف ان علي روح عنها.. مب مصدقه الي تسمعه.. معقوله انا شفت علي.. وليش هني؟؟ .. ليش...؟؟ لا اكيد انا احلم واتخيل.. فتحت عينها وشافت محد واقف صوبها.. استغربت.. شو يابه هني.. معقوله كنت احلم.. هالكثر افكر فيه.. آه يا علي شو سويت بي.. عمري ما توقعت اتعلق بواحد شراتك.. طول عمري رمست وكلمت بس ما حبيت كثرك يا علي.. بس تعلمت منك وايد أشيا .. أهمها اني اسامح.. واني اكون طيبه.. وهالشي الي غير فيني اشيا وايده... صدت بويها صوب الثاني وتمت تدمع .. وهي تتذكر كيف كان واقف.. ويتردد في اذنها صوته.. آسف.. آسف.. آسف.. لا مستحيييييييييييييل مب علي..

============

علي من ظهر سار صوب الدكتور يطمن على حالها.. وطمنه وقاله انها كان عندها نزيف بسيط.. وزين لحقوا عليها بسرعه عشان يقدرون ينقذونها.. وسار صوب الغرفه عشان يطلع الكوت ماله.. وشاف سعيد يترياه.. استغرب؟؟

علي: سعيد.. شو يابك هني؟؟

سعيد وهو يضخك: اظني هالمكان اسمه مستشفى.. يعني ياي اشكي من مرض

علي: بسم الله عليك.. شوفيك؟؟مامن شر..

سعيد: مرض الملل في البيت من غيرك.. الكل متوله عليك ويحاتيك.. ممكن تشوف لي العلاج؟؟

علي ابتسم وفي خاطره استانس لأن في حد يفتكر فيه على الأقل وحس بالفراغ في غيابه: اممم.. اظني العلاج هو اني ارد البيت حالا بالا..

سعيد: نعم نعم.. صدق انك دكتور شاطر.. بس اخبرك.. مب جنه الا ويهك مصفر شوفيك؟؟

علي رد على ورى يطالع في المنظره الي وراه.. : هي والله.. بس سالفه طويله في الدرب بخبرك عنها..

سعيد: اها عيل تأخيرك ها له سبب.. عيل يلا امش..

علي: ثواني بس اشل شويه أوراق.. وياي..

سعيد: اترياك في الموتر..

وظهر سعيد ضوب الموتر وركب يتريا علي لين اييه ويرد وياه البيت.. وعلي ما تأخر عليه وايد.. وطول الدرب وعلي يقول السالفه لسعيد.. وسعيد من صدمته كل شوي يقوله عيد السالفه..

علي: لا حوووول.. هاي ثالث مره اعيد السالفه..

سعيد: سبحان الله.. شوف كيف كنت متندم وودك انك ترضيها بطريقه.. كنت السبب في ردتها للحياة من بعد رب العالمين طبعا..

علي: شفت الدنيا كيف صغيره.. يوم شفتها تتطالعني بذيج النظرات حسيت نفسي حقير وصغير جدامها.. انا كنت متوقع انها بتسوي شرات مريم وبتنتقم.. بس طلعت البنت زينه ..ماكان يخصها في المشاكل.. الي بغته انها توصل لي.. وتكسب حبي لا غير..

سعيد: ربي يسامح مريم بس الي زرعت فيكم هالأفكار..

علي وهو متفاجآ: الله يخس ابليسك سعوووووود..

سعيد: خييبه ليش عاد؟؟

علي: نسيتني اني ياي بموتري المستشفى.. ونسيته في الباركينات..

سعيد تم يطالعه وميت ضحك.. : ههههههههههه.. هالكثر شوفتي اتنسيك كل شي..

علي: ويا هالويه.. ردني بسرعه ..

سعيد: اووووكي..

وردوا صوب المستشفى عشان ياخذ علي موتره من الباركينات.. ويردون البيت سوى.. وتموا طول الدرب كل واحد فيهم يترايس ويا الثاني.. لين ما وصلوا البيت.. وكانت هند في هالوقت قاعده على اعصابها في الصاله تتريا انهم يدخلون البيت ومن سمعت صوت ضحكاتهم نشت من مكانها تربع صوب الباب..: علووو... ليش تأخرت..؟

علي انتبه لهالصوت.. ورفع راسه وشاف هند جدامه.. حس بوقته بفرحه ما توصف.. أول مره هند اتحاتيه بهالطريقه.. حس بحبها الي تحاول انها تخفيه.. : اسف عمتي..

هند: وانت سعود..ليش ادق لك ما ترد؟

سعيد: كيفي ابا احرق اعصابج شوي..

هند وهي ماسكه مقبض الباب..: لا والله.. عيل خلكم تحترقون في هالشمس برع.. ماشي ما تدخلون البيت..

وبندت الباب وقفلته في ويههم وما عطتهم مجال.. وتموا يضحكون..: سعيد.. نش خل انروح نتغدى انا وانت برع.. طردونا من البيت(بصوت عالي عشان هند تسمع.. وكانت ميته غيض)..

سعيد: يبالنا اتصدق.. خل انرد نترايس احلى..

علي: يلا قم..

وما وحالهم ينشون من مكانهم الا وهند فاتحه لهم الباب.. : دخلوا بسرعه جدامي.. ماشي حواطه..

صد علي صوب سعيد وغمز له بعينه.. : شفت..

سعيد: هي والله شفت..

هند: شو السالفه؟

علي: ماشي .. ولا ما تبينا ندخل..

هند: دخلوا..

وتوه دخلوا البيت الا وغزلان نازله من الدري ركض تنادي على سعيد: سعيييييييييد

سعيد: اقول انا طالع (ويعطيها ظهره وتوه بيظهر من البيت الا بحد يمسكه من ظهره ويسحبه)... الله يستر..

غزلان: وين ماشي شرده.. تعال هني.. يلا بسرعه اشوف.. ودني الصالون .. حرقت تليفوني راعيه الصالون.. تباني اسير عندها..

سعيد: لعله شعرج الي يحترق عشان اتوبين تروحين الصالونات..

غزلان وهي تقعد على الأرض وتقلد اليهال اونها اتصيييح: هيء هئ.. شوفي هنوووده.. شو يقول لي.. شعري الحلو يباه يحترق..

هند وهي تتطالع سعيد بنظره غضب.. من دون ما تنطق بأي كلمه..

سعيد: لا لا لا.. كله ولا هندو عاد.. نشي .. شعري انا الي ان شاء الله يحترق.. وربي يخلي لج شعرج.. نشي بسرعه..

غزلان غمزت لهند اونها نجحت.. ونشت بسرعه يابت عباتها وكيس الأغراض وسارت صوب الموتر ويا سعيد عشان يوديها صالون مورا.. وطول الدرب سعيد مرتبش بهالأغاني ويغني وياهم وغزلان مرتبشه أكثر.. وصلت الصالون ونزلت .. وعلى طول لأنها كانت متأخره بدو يسشورون شعرها لأنه طويل ويحتاج وقت لين ما يخلصون.. وسعيد رد البيت عشان يتغدى.. ويتريا غزلان اتخلص ويمر عليها ..

========

في هالوقت بيت حصه كان مثل خليه النحل.. الكل مرتبش ويشتغل ويرتب من كل صوب.. مستانسين واااايد.. وأكثرهم حصه .. إلي كانت عايشه بعالم ثاني..كانت مفصله فستانها عند يارا.. لونه وردي مايل للبنفسجي.. وكان شكله رهييييييب.. وتشكيلته بسيطه واااايد ماكانت مبالغه في الفستان.. كله من الشيفون والأورجانزا.. وطبعا راحت تتمكيج عند زارينا.. الي فعلا قدرت تلعب بويها واطلعها ملكه جمال.. كل من شافها ما صدق انها حصه.. شعرها سوت فيه تسريحه بسيطه وفيه نزلات من ورى.. على شكل فير.. وشويه ورود من نفس الفستان حطوها لها على شعرها.. وطبعا سوت لها الباقه الي بتمسكها من جنائن حفيت..وطالعه رهيبه على الساعه 7.30 كانت جاهزه وتتريا ابراهيم يوديها البيت هي واختها..

طبعا في بيت حصه كانو ناصبين خيمه جدام بيتهم من الليله الي طافت.. يعني كان ساد درب الشارع عليهم.. وماخذ مساحه من جدام بيت غزلان.. أحمد من شاف الخيمه ما اهتم .. ولا عبر ان اليوم هي حفله حصه.. كأنه يقول بهالطريقه ان حصه انمحت من باله ... وماعاد لها ذكرى.. واعتبر هالحب اعجاب.. لكن بعده محتار يا ترى منى هي الحب.. ام مجرد اعجاب يمتلك مشاعري..

غزلان بعد تجهزت ومر عليها سعيد عشان تروح البيت وتلبس وتروح عند حصه الي كانت حارقه تليفونها من الإتصالات تبا غزلان اتييها.. على الساعه 8.00 غزلان كانت في البيت.. من دخلت كانت متغشيه لأن سعيد وأحمد وسلطان.. وناصر كانو عندهم.. وسارت فوق بسرعه.. وسعيد الفضول ماكلنه الا ويبا يشوف غزلان كيف طالعه.. تم يلاحقها.. ومن وراه هادف وهند ووداد.. الي يشوفهم يقول لاحقين العروس.. وهي من دخلت الباب قفلته وراها على طول.. تموا يدقون الباب عليها وهي مب طايعه تفتح..

سعيد: مالت عليج.. اكيد سباله عشان جيه ما تبينا ننصدم في شكلج..

غزلان في هالوقت كانت عايشه في عالم ثاني.. مب حاسه بدقات الباب .. كله الي كانت تحس به.. فراق خالد.. كان ودها ان بهاليوم خالد الي يشوف كشختها.. تذكرت انها في يوم من الأيام كانت بتكون في مكان حصه.. يعني بتكون هي العروس.. لكن هالحلم ما راح يتحقق ويا خالد.. وياترى في حد بياخذ مكانه.. هند وداد حسوا ان في شي مضايج غزلان.. ولا مب من عادتها تقفل الباب بهالطريقه.. وما ترمس..

هند: انا حاسه ان غزلان متضايجه من شي..

سعيد: ما اعتقد.. بس يمكن اتصدقين.. لأن طول الوقت وهي سااااكته ما ترمس؟؟

وداد:فديتها اختي.. غزووول فتحي الباب عمري انتي..

غزلان وبصوت مبحوح: مابا.. خلوني بروحي..

الكل انصدم.. هادف جرب من الباب.. : غزلان انا اعرف الي تحسين به.. بس انا السبب في الي انتي فيه.. وعمري ما بسامح روحي..

وفي هالوقت توه كان بيبتعد هادف من عند الباب ما حس الا بالباب ينفتح.. وصد وراه شاف غزلان الي كانت طالعه آيه من الجمال.. وربعت وحضنت هادف وهي تصيح.. : بس بس.. خربتي مكياجج دافعه عليه بيزات..

غزلان وهي تبتسم: لا تقول جي يا هادف ترا بزعل منك.. عمرك ما كنت سبب حزني.. وجودك هو الخير في حياتي.

سعيد جرب من غزلان وسحبها.. وتم يطالع ويهها: لا لا.. المكياج أصلي شكله.. ماذاب بويهها.. لا حلو حلو..

غزلان وهي تضرب على جتف سعيد..: سخيف..

وداد: محد غيرج السخيف هني.. تتدلع لنا حضرتها ما تبانا انشوفها..

غزلان: شو رايكم حلوه؟؟

الكل: قمررررر

غزلان: لا لا لا.. استحي لا تقولون لي جيه..

وفي هالوقت رن تليفون غزلان.. الي من سمعت جنه حد ذكرها بشي..: امي.. حصو بتكرهني احين..

هند: هيه روحي لها لأنها حرقت تليفون البيت..

غزلان: يلا باي.. بلبس فستاني وبسير لها..

وبسرعه دخلت غزلان ويا هند الغرفه وتلبست.. واتجهزت.. ونزلت بسرعه وهي تربع.. والكل يضحك عليها..

ناصر: خيبه.. ذكرتني بسندريلا.. شكلها الساعه 12 بتتحول ضفدعه..

غزلان وهي واقفه عند المدخل وصاده صوبهم: انا اراويكم.. خل ارجع..

وظهرت من البيت.. وبسرعه راحت صوب بيتهم.. وكانت خايفه انها تدخل لأن كله رياييل صوب البوابه.. مب عارفه كيف تدخل.. ردت البيت ونادت على سعيد عشان يكون وياها.. وسعيد من شافه ابراهيم تم يسلم عليه وغزلان واقفه في حوي بيتهم تتريا سعيد اي ياخذها.. بس سعيد تعمد ينقعها شوي برع.. وتم يسلم على ابراهيم.. الي من شاف سعيد.. تذكر غزلان.. ونزل راسه.. وقلبه قام يدق بصوره مب طبيعيه..

سعيد: الا اخبرك.. الرضيعه بغت تدخل البيت.. بس استحت لأن في رياييل.. من وين تدخل..

ابراهيم: هيه.. ماعليه خلها اتيي من الباب الجانبي..

سعيد: خلاص ان شاء الله..

وراح سعيد ياب غزلان الي كانت ميته غيض منه وتتحرطم عليه.. : شكلك تباني انذبح اليوم على ايد حصوص..

سعيد: لا ويه.. بقص ايدها..

غزلان: مادانيك..

ابراهيم في هالوقت ما قدر يمنع نفسه انه يروح ويشوف غزلان ولو من بعيد.. دخل البيت وسار صوب المدخل الخلفي وقف شوي بعيد.. ودخلت غزلان.. وتمت تتطالع حوالينها ما لمحت حد.. بسرعه شلت الغشوه.. وتمت تتهوى شوي.. لأنه حاسه بتختنق من الحر.. وعدلت شوي شعرها.. ودخلت من البوابه الخلفيه للصاله عشان تروح عند حصه.. وإبراهيم كان يطالعها طول الوقت ومب مصدق عيونه.. ربي يحفظها..صدق هالبنت جمالها مب طبيعي.. كل مره اشوفها .. احس ان في شي من الجمال زاد لها.. آآآه ياقلبي.. كم اتحمل..

للحب عنوان

الجزء الثاني والعشرون..

===========

ملخص الجزء السابق: (( سرد محمد حكايته لعلي.. والألم الذي يمكنه.. وتيار الحب الذي بدأ يتسرب في قلب منى وأحمد.. مقابلة علي لساره في المستشفى إثر تعرضها لحادث.. وتمت ملجة حصه وعادل على خير))

=====================

*<->* عندما يرحل النور ويستسلم الليل للسكون.. أصرخ بصوت عالي.. إشتقت إليك.. فلا معنى لليل من دونك.. *<->*

======================

في بيت بوسعيد

=-=-=-=-=-=-=-=-=

كانت هند كعادتها سهرانه.. وياها سعيد وعلي ووداد الي ما تمت وايد لأن سلطان إتصل فيها وصعدت غرفتها عشان ترمس وياه.. وطبعا ما سلمت من تعليقات سعيد طول ماكانت ماشيه صوب غرفتها.. وهي مطنشته..

هند: احس بتعب..

سعيد في هالوقت صد بسرعه صوب هند.. ومسك ايدها.. وبخوف: شو منه؟؟

هند: اشفيك بسم الله..

سعيد: لا بس انتي اتقولين انج تعبانه .. وكله ولا تعبك الصراحه..

علي: صدق هند اشفيج؟؟

هند: مادري بس اليوم نسيت آكل دواي.. وتدري ارتبشنا في العرس وفي البيت شوي.. يمكن عشان جيه..

سعيد وهو معصب ومتنرفز: لا والله.. واتقولينها بكل برود.. شي عادي عندج تنسين دواج.. نشي جدامي اشوف كلي الدوا..

هند وهي تدلع: مابا..

سعيد: لا والله.. ماشي مابا.. نشي اقول لج؟؟

هند:مااااااااابا..

علي نش بسرعه وسار صوب الصيدليه الي في المطبخ التحضيري وبحكم انه طبيب فيعرف أدويتها .. وخذها وياب وياه كوب ماي.. : بلا دلع.. كلي الدوا..

سعيد: يلا خذي..

هند وهي تتطالع علي الي كان واقف جدامها ويطالعها وماد ايدها يترياها تاخذ عنه الدوا والماي.. ورفعت راسها وعينها إلتقت في عيون علي.. بغت تموت من الحيا..وهي تشوف الخوف والقلق في عيونه والحب الي يكنه لها.. بسرعه شلت الحبه وكلتها..

سعيد: يلا (مسكها من ايدها ).. نشي اشوف جدامي على الفراش ارقدي..

هند: مابا مافيني نوم؟

سعيد: نشي اقول لج.. ماشي دلع.. بنات اخر زمن.. انا اكبر عنج؟

هند: لا والله .. كيف اكبر عني نحن توم؟؟؟

سعيد: علي.. توني اكتشف ان الله رزقني بتوأم غبي.. مفروض تطلع علي ذكيه.. بس ماعليه انا خذت جرعه زايده من الذكاء عنها... شوفي يا ذكيه.. والله اظني امي قالت اني انا انولدت قبله ب18 دقيقه.. وهالشي يكفي اني اكون انا الي اكبر عنج.. (وهو يصرخ).. نشــي

هند وهي تنش بكسل.. : حكم القوي على الضعيف..

وصعدت الدري وهي مرتاحه في داخلها ان الكل يهتم فيها.. وخصوصا علي الي شافت الخوف في عيونه من عرف انها مريضه وتعبانه.. ودخلت غرفتها وحطت راسها ونامت.. اما علي وسعيد فتموا سهرانين على فلم حاطينه على ام بي سي 2..

You have got a mail

(لا تضحكون اذا اسم الفلم غلط.. بس انا اذكره جيه.. والله أعلم المهم اذا عرفتوه اوكي واذا لا تابعوه حلو وايد)

الفلم طبعا كان من النوع الرومانسي.. يحكي قصه حب بين اثنين يراسلون بعضهم عن طريق الإيميل .. وهم في يقابلون بعضهم البعض ولكن لا يعلم أحدهم عن الآخر انه هو من يراسله.. علي من النوع الي يحب هالأفلام ويندمج فيها.. أما سعيد ما يدش مزاجه غير افلام الرعب والأكشن.. فكان كل شوي يتثاوب.. وعلي يلاحظ عليه بس مطنش لأنه مهتم في الفلم..

سعيد: ياخي مليت الصراحه.. شو هالفلم الملل..

علي: روح لا.. انت صدق مب ويه رومانسيه الله يعين الي بتاخذها..

سعيد: ههههه.. بعيشها في رعب واكشن.. كل يوم بلعب كاراتيه.. وبحط اقنعه وبزيغها..

علي: خيييييبه.. ناوي عليها شو.. بتشرد البنت بهالطريقه

سعيد: منو قالها اتوافق علي..

علي: الي يسمعك يقول خاطب وخلاص.. ولا جنك ولا مفكر..

سعيد: صدقك.. الا اقول علي.. انت مب جنك كبرت وخلصت دراستك وماشاء الله توظفت.. شو تتريا عشان تكمل نص دينك؟

علي: اهااااا.. لا انا البنت الي اباها حاطنها في بالي.. بس اتريا اني احل موضوعي ويا هلي.. ويرد كل شي طبيعي من بينا.. وان شاء الله

سعيد: امممم (وبمكر وهو ينغز علي).. ممكن نعرف تعيـ.. اااقصد سعييييده الحظ..

علي استحى وقتها ونزل راسه.. وتذكر هند.. شو يقول ولا لا؟؟ .. يكتم في نفسه هالشي.. ولا يبوح فيه؟؟.. بس شي في قلبه يقوله بوح وطلع الي في خاطرك ..

علي: والله مادري شو اقول لك يا سعيد.. البنت تقريبا رافضه الإرتباط فيني يوم اني اعترفت لها اني اباها تكون حليلتي..

سعيد وبصدمه: شووووو.. منو هاي .. دلني بيتهم خل اقص راسها.. ليش يعني؟؟ .. ريال مثلك ألف ألف من يتمناه ويباه.. ترفضك؟؟.. مب ناقصك شي.. جمال.. (وهو زام خشمه فوق).. طبعا طالع علي.. ودراسه.. وشغل.. ومحترم.. وسمعه طيبه.. شو تبا زود؟؟؟؟؟والله ان بنات هالزمن ما ينعرف لهم..

علي: لا .. مب جيه..

سعيد: عيل شو؟؟اهلها رافضينك مثلا؟؟

علي: ما اتوقع اهلها بيرفضوني لأنهم يعرفوني زين مازين..

سعيد: عيل .. ممكن اتوضح لي شوي أكثر..

علي وهو يطالع الساعه .. وينزل راسه.. ويمسك الريموت ويلعب به..

سعيد: علي لا تستحي.. حنا شرات الإخوان وزود.. يعني مالك غيري.. يعني مابخليك بكل إختصار الليله الا وانت قايل لي عن هالغبيه.. عشان ارسل لبيتهم قنبله اتفجره..

علي: لا خيبه.. شو قنبلهز. بقول بقول.. بس ماباك تزعل ولا تفهمني غلط

سعيد: لو انا ماعرفك عدل جان بزعل وبفهمك غلط.. يلا انطق؟

علي: الصراحه.. (وتم ساكت.. )

سعيد: ليش ساكت.. حرقت لي اعصابي.. هالكثر اسمها يخرع..

علي: والله.. مفتشل منك..

سعيد: خيييييييبه.. لا السالفه جايده يبالها اقعد عدل(نش واعتدل في قعدته)..

علي: امممم.. والله يا سعيد (وهو منزل راسه ).. انا (ويبلع ريجه.. ).. الصراحه.. ودي.. (وسكت للحظه وسعيد مندمج يطالعه يترياه ينطق بإسمها),, في اختك هند اتكون من نصيبي..

في هاللحظه.. سعيد ساكت لوهله .. بس ابتسم من عقبها وحط ايده على ظهر علي الي كان منزل راسه وسرحان .. : افا يا علي.. وليش هالشي يفشل؟؟ .. وليش هند ما تباك.؟.؟؟ نحن يشرفنا انك اتكون من نصيب هند .. لأن انعرف محد بيسهر على راسحتها وبيفرحها كثرك..

رفع علي راسه وناظر عيون سعيد الي كان يبتسم له ورد له ذات الإبتسامه.. : تسلم والله يا سعيد.. بس هند مب رافضتني لأني انا علي.. رافضتني.. لأنها اتحس انها ما بتسعدني والسبه الي تعاني منه..

سعيد وهو عاقد حياته: لا والله.. ليش هالبنت تربط كل شي في حياتها بذاك الشي.. لازم اتعرف ان الله اذا اراد شي بيصير وربك هو الي يسر الأمور كلها.. هند مافيها شي ناقص عن باقي البنات.. وحالها حال أي بنت تقدر تعيش وتكون أسره.. وتستانس

علي: وانا هالي اقوله .. بس انت عارف بطبع اختك كيف..

سعيد: لاحووول.. انا برمسها ماعليك.. لأن الصراحه استخسر اني افقد واحد اثق فيه انه بيحط اختي في عيونه.. يعني بأمن على إختي..



علي وبإنفعال: لا ارجوك سعيد.. لا اتييب هالطاري لهند.. تعرف حساسيتها .. وكيف بتتضايج مني اذا عرفت اني قلت لك..

سعيد: علي.. انتوا عيال خاله.. مالكم غناة عن بعض.. يعني هي لو اتدور الدنيا كلها صدقني ما راح تلقى واحد يسوى ظفر من ظفورك..

علي: تسلم ياخوي..

سعيد: ماعليك.. انت بس حل مشاكلك.. وصدقني هند ان ماكانت لك.. ما بتكون لغيرك..

علي نزل راسه.. ونش عنه سعيد وصعد غرفته وهو ضايج في خاطره من اخته.. ليش فاقده الأمل بهالطريقة؟ .. ليش ما تعطي نفسها فرصه اتعيش حالها حال أي بنت في هالدنيا .. تعيش مستانسه في حياتها.. وخصوصا مع علي هالإنسان الي مستحيل يفرط في هند .. وحرام عليها لو تقعد اتقارنه بخالد وغيره.. علي ريال يعتمد عليه ان يبني أسره.. الله يهديج يا هند بس.. ويصلح بالج..

================

اليوم الثاني..

يوم الجمعه..

في بيت بوسلطان

=======================

الكل كان مجتمع في بيت بوسلطان على الغدى من بعد ما راحوا لصلاة الجمعة.. والكل كان قاعد يسولف ويضحك.. كان الجو في بيتهم جميل وايد.. والي محلي هالجو هاللمه الحلوه الي كانو فيها..

أحمد طبعا الساعه 4.00 كالعاده بيمر ربيعه عشان يروحون الكليه.. فكان متهايز ومستخسر انه يترك هالجو العائلي الحلو ويسير الكليه ويبتعد عنهم..

غزلان: ناااااااصر..

ناصر كان في هالوقت مندمج يلعب بلي استيشن ويا هادف ومندمج.. من سمع صريخ غزلان فز من مكانه وانفر عنه جهاز التحكم.. واستغل هادف في هالوقت هالشي وسجل عليه جول في اللعبه الي كانو يلعبونها..

هادف: هيييييييييييييييه.. وهدف من الهداف العالمي روبيرتو هااااااااااادف.. عاشو.. هووووووووو

ناصر: مايصير انتو الإثنين اكيد متفقين.. ماشي اكيد متفقين.. انتي ويا ويهج ما ذكرتيني الا يوم ألعب.. قاصدتها ادري..

غزلان في هالوقت ميته من الضحك عليهم .. وقاعدة تضحك على اشكالهم وهم يتناقرون..

هادف: اونه طاعو هذا.. متفقين.. روح روح.. اعترف انك انت فااااشل.. تعرف يعني شو فاشل يعني ما تعرف تلعب.. يلا خل انكمل واييب عليك 20 هدف.. يالفاااشل.. ترا انا اسمي هادف.. اسم على مسمى.. مشتق من كلمه هدف..

ناصر: يالغشاشين.. (كان معصب حده ليش انه خسر.. سار وبند اللعبه).. ماشي مابا العب..

هادف تم سادح على الأرض ويأشر على ناصر وميت ضحك عليه.. جنه ياهل.. : وييييييو يالفاشل..

غزلان: انزين نصووووور ويهد.. تعال اباك شوي..

ناصر: مالت على الساعه الي بغيتيني فيها.. تدرين مالت مالت مالت.. مب ياي..

هادف: اوبس.. على طاري الساعه.. كم الساعه..

غزلان طبعا معصبه اطالعت الساعه وعلى السريع ردت عليه.. : فايج انت بعد.. احين الساعه دقيقه و25 دقيقة..

ناصر تم يطالع غزلان يحاول يستوعب هي شو قايله.. شو هالساعه العجيبه الي تنحسب كله بالدقايق.. وهادف عاد مات من الضحك زود.. تم يدمع من الضحك.. وأحمد وعلي وسعيد كانو قاعدين يسولفون.. من سمعوا غزلان نقعوا من الضخك وتموا يضحكون بأعلى صوت.. وغزلان بعدها مب مستوعبه.. حاولت تسترجع الي قالته تذكرت انها نقعت في الرمسه.. وغطت ثمها وتمت تضحك من خاطرها..

ناصر: شو السالفه..

هادف: مب ناقص انك فاشل في اللعب ولا بعد استيعابك ضعيف.. ههههههههه.. بنت عمك نقعت نقعه عالميه.. ولا قنبلة هيروشيما مثلها..

غزلان وهي مغيضه: هي هي هي.. ما يضحك..

سعيد وهو يحاول يغايض بغزلان زود.. غمز لعلي: اخبرك علووو.. كم الساعه أحين..

علي فهم قصد سعيد وكمل وياه : الساعه دقيقه و25 دقيقه..

ورالكل رد ضحك مره ثانيه وقتها ناصر استوعب يوم رد سمعها من علي.. اما غزلان فكانت شراره الغضب ظاهره منها ومحرجه من خاطر.. : مالت عليكم كلكم.. ماكلمكم انزين..

الكل: انزين..

غزلان: ناااااااااااااااااااااااصر

ناصر: توها اتقول ما كلمكم وتنادي علي..

هادف:بتموت تراها اذا ما رمست ماتدري عنها كثري..

غزلان: انت بالذات اخر واحد يرمس..

ناصر: لحظه لحظه.. انتي من الصبح تنادين علي وتصارخين .. شو عندج ابا اعرف؟؟

غزلان: وين ملزمه العربي الي شليتها عني ذاك الإسبوع.. أبا احل شويه أسئلة منها..

ناصر وهو معصب.. وفر عليها قوطي البيبسي الفاضي: الله ياخ.. شو اسوي.. ادعلي عليج ولا اكفخج احين.. من الصبح اتزاعجين بس عشان الملزمه يالسخيفه.. يعني وين بتكون غير في غرفتي روحي وشليها.. سويتي كل هالحشره ونقعتي.. وخليتيني اخسر واخر شي كل الي تبينه ملزمه .. دببببببببه..

غزلان وهي مغيضه من خاطرها.. من عقب الضحك يهزئها ناصر.. تغصصت المسكينه.. لفت عنهم وسارت صوب غرفه ناصر وشلت من عنده الملزمه وظهرت من الغرفه وصكت الباب بقو.. صرخ عليها ناصر: كسرتي باب حجرتي يالدبه



============