مدري صباح الخير والا مساء الخير

[أبوواسم]

حبيبتي.. وشلون اصبّحـك بالخيـر
وأنتي صباح الخيـر والخيـر كلّـه
صبح الندى والعشب والغصن والطير
وصبح الغيوم اللـي علينـا مطلّـه
أنتي صباحات السعد .. والتباشيـر
علـى وجيـهٍ بالرضـا مسفهلّـه
دامك صباحي وين مأروح و أسيـر
والله مأدوّر فـوق راسـي مظلّـه
جيتي و صارت لك ضلوعي جماهير
ويتـل منّهـا شوقـي اللـي يتلّـه
ومدام جيتيني فأنـا حالـي بخيـر
لو كان جرحي ما أسترتـه الأجلّـه
جيّتك هذي غير وأنتـي بعـد غيـر
جيّتك مثـل الوسـم لاجـا فحلّـه
تزهر بهـا قيعـان قلـبٍ مداهيـر
وتـرد معهـا روح خـلٍ لخـلّـه
يامرحبا يأغلـى وأعـز المساييـر
وأغلى المشاعر ( بيت اهلها تدلّه )
عـروق قلبـي لـك دلالٍ مباهيـر
صفيتهـا دلّـه .. ودلّـه .. ودلّـه
تربعـي بيـن الحشـا والازاريـر
وأخذي على ترويقة البـال .. فلّـه
والا أصبري .. بأطيّر القلب تطييـر
وأنتي تعالي وأجلسـي فـي محلّـه
سقت الغلا لك ... والنوايا مغاتيـر
ولاهمّنـي حقـد القلـوب المغلّـه
مدري صباح الخير والا مساء الخير
بس المهم أن وجهك الخيـر كلّـه