العين قسامي ~

[بن ثابت]

يالعين قسامي من قايل يالعين قسامي


يالعين قسامي شالني للحوش عمامي


وسلمت وردوا السلامي وباتت نشـدة ع الاحـوال


ياما قلنا بالترحيبـة عن كل بلاوي و مصيبة


والخـاطر واللي زاري به وتقضاية عمـري جــوال


تقضاية عمري من جـده متقهر ما ريت مودة


وكي ريت بصيـرة في يده سيـدي قال هـذا نقال



قال هــذا نقـال مدلة ويخــــابر ع العالم كلـه


ويفكك من مية علة ويجيب رسايل ع الحال


ويجيب رسايل برنة قتله غير اقربني منـه


ما بين ايدينه مكنـه زرينا بارقام طوال



زرينا بارقام طويلة والخاطر متماصي حيله


متدربل دون ضنى جيله لكن جـد عليـه زوال



لكن جد زوال علينا وين ما بالصدفة رنينه


ما نحسابوه يحاكينا غالي بو ممشوط طوال


غالي قلي بكرة تجيني في قاريونس و تراعيني


في الاداب مكانة عيني نبي ننشد ع الاحوال


و دريت النشدة بالعاني وين خبر منها والاني


قتلها جمعة شوماني و بدوي و عايش الاجبال


و بدوي و نعز جبلنا و في شحات مكانة هلنا


وصوتك يا غالي ذبلنا ما نحمل منك مقال


ما نتحمل منها شيء و قلتلها بكرة سنجي


قالت يا فرحة عيني ناديني باسمي فريال


راجينا نين بكرة روح بخينا من عطر يفوح


ع الي قلت ندير مروح شوره عدينا ع الحال


شوره عدينا بالنية و خشينا شور الكلية


ولقيناها ترجى فيا قالت ليش غيابك طال


قلتلها في الجامعات أول مرة نرعي البنات


بكثرتهن دارن غيات و ما والي عن والي سال


ما والي عن والي سايل سلمت علي جوف الخايل


قتله وأنت لاي قبايل كي ننشد ردوا الاسوال


قلتلها سمي القبيلة والمشكى هالي تشكيله


و باتك وانسابه بـ ....... انا قاصد نبي الحلال


انا قاصد تبقي في الجون نزفك وانديروا واشون


كلامك قالت مو مضمون افهم منهم ما فيا انقال


يا غالي منريد عتاب انت عمرك ما شلت كتاب


ونا في كلية الاداب شهادة عندي ما تنطال


شهادة عندي بين ايدي ودي نحكيلك عن شيء


صراحة يالعزيز علي انا عندي مية موال


انا عندي موال طويل مواعيدي كثرن بالحيل


اسمع نحكيلك بالتفصيل أول ما نبدأ عن جمال


أول ما نبدأ عشت الحب معاه وهو يقرأ في الطب


حياته عايش متغرب شهادة يبي لجهال


والثاني درته جهاد اللي يقرأ في الاقتصاد


اللي يحددلي في الميعاد بنقال البصمة مازال


نقال البصمة في الإيد وسيارة موديل جديد


ومكتب تصدير وتوريد اللي مو ضايق عازة مال


و الثالث درنا قصي يحدد ميعاد و مايجي


اللي يواعد ويخط علي ونا عقلي عاميه هبال


و الرابع درنا سمير و ناصر يقرأ في التفسير


الي بطموحه شيء خطير مواعيده ديما ع البال


مواعيده ديما في بالي وما نحمل منهم لا والي


و أنت سادسهم يا غالي ديما دايرلي مشغال


ديما دايرلي يا حاسي مشغال مكسرلي رأسي


منه مطاول وسواسي تبو تصفاية غربال


تبو في الصوب تغربيله و نتزوج و ندير عويلة


و ما تنشدني لأي قبيلة و ما داعي للهالموال


مافي داعي له موالك يا غالي رديت سوالك


و ان كان تريدني نفضالك بكرة دزلنا عقال


دزلنا عقال توازي كنلي في السيروب مجازي


لكن نسكن في بنغازي من ضمن شروطي مازال


من ضمن شروطي صحباتي في زيارة نمشي يوماتي


و خالي و جدودي و عماتي و تقعد للعشرة حمال


تقعد في العشرة حاملني و يا خوفي منك تحرمني


و ان كان موافق فهمني رد و جاوبني في الحال


ياغالي خلك في حالك لا تفضالي لا نفضالك


من العازة عقلي شكالك رحبت و طقيت اقفال


رحبت وطقيت علينا و احنا ما درنالك شينة


كانت غايتنا في الزينة و نعيشوا الايام دلال


و نعيشوا الايام فراحة لكن يا غالي بصراحة


خلي كلتنا مطراحه والي عنده قسم ينال


الي عنده قسم سيجيه ايواطي عينه و يزهيه


انتي عندك خمسة ياهيه و نا ع التغريبة عوال


تتغرب تنسى غاليها عندي عين نشوخ عليها


و الله بغيرك يفديها وكنلي بالسير و بالحال


كني به حالي ما يطول و يعاود ماضينا الاول


و نكمل عمري متجول لاجرح و لا يجي سوال


لا سوال يجي يساولها و لا غالي يطول يشغلها


و نعيش حياتي نكملها في مراجاتي للغسال