يعين الله يادنيا تسوق ايامها الأحزان
يعين الله وانتي مثل قفل ضاع مفتاحه
يعين الله وجروحي لها في كل وقت شان
كذوب اللي يقول ان الزمن بيداوي جراحه
سقى الله يوم انا يمه غرير يزعج الجيران
سقى الله يوم انا طفل يصج البيت بصياحه
سقى الله يوم كان اقصى طموحي لعبة الدنان
نهاية يومي المغرب واخاف الليل واشباحه
سقى الله يوم انا ألبس بشت ابوي وثوبه القيطان
واقلد كل شئ فيه حكيه .. جده .. مزاحه
واشيل الـمسبحة مثله ليا هوجس وهو سرحان
بيشعر .. واحسب ان اللي عطاه الشعر مسباحه
سقى الله بيتنا ذاك البسيط مشقق الجدران
شجاع يهزم الغدراء بقنديله و مصباحه
تكحلنا القناعة لا طمع .. لا هم .. لا حرمان
واذا جاء الليل تكفينا ثلاث اخوان طرّاحه
جميع الذكريات اللي غدت في قفرة النسيان
يحاكي حلوها عبرة ..بـموق العين سبّاحه
خذتني غربة عنوانها .. غربة بلا عنوان
ابي عقب التعب راحه..لقى فيني التعب راحه
رجعت اليوم مثل اللي رجع عقب القنص خسران
غدا طيره وجاء يسحب سلوقيه وملواحه
تقولين المطر ماهوب يـمه دايمٍ هتان
اجل معذور قلبٍ في همومه ضاعت أفراحه
,,
|
 |
رد مع اقتباس
