تاعد مواعيد والجاهل مكذبها = واللي عرف حدها من همها سـالي
اليا أقبلت يوم ما تصفي مشاربها = تقفي وتقبل ومادامت على حالي
في كل يوم تورينا عجايبها = واليوم الأول تراه احسن من التالي
ايام في غلبها وايام نغلبها = وايام فيها سوى والدهر ميالي
جربت الأيام مثلي من يجربها = تجريب عاقل ذاق المر والحالي
نضحك مع الناس والدنيا نلاعبها = ونمشي مع الفي طوع حيث مامالي
كم من علوم وكم اداب نكسبها = والشعر موزون مثقال بمثقالي
اعرف حروف الهجا بالرمز واكتبها = عاقل ومجنون حاوي كل الأشكالي
لكن حظي ردي والروح متعبها = مافادني حسن تأديبي مع امثالي
قوم لياجيتها صكت حواجبها = وابدت لي البغض في مقفاي واقبالي
وقوم ليا جيتها رفت شواربها = بالضحك وقلوبها فيها الردى كالي
والروح وش عذرها في ترك واجبها = راح الحسب والنسب في جمع الأموالي
المال يحيي رجال لاحياة ابها = كالسيل يحيي الهشيم الدمدم البالي
عفت المنازل وروحي يوم اجنبها = منها غنيمه ومنها البعد اولالي
لاخير في ديرة يشقا العزيز إبها = يمشي مع الناس في هم وإذلال
عز الفتى راس ماله من مكاسـبها = يامرتضي الهون لاعز ولا مالي
دللت بالروح لين ارخصت جانبها = وانا عتيبي عريب الجد والخالي
كب المنازل وقل للبين يندبها = تشـكي عليها بدمع العين همّالي
لاتعمرالدار والقاله تخربها = بيع الردي بالخساره واشترالغالي
ماضاقت الأرض وانسدت مذاهبها = فيهاالسعه والمراجل والتفهلالي
دار بدار وجيران نقاربها = وأرض بإرض وإطلال بإطلالي
الناس اجـانيب لين انك تصاحبها = اتكون منهم كما قالوا بالأمثالي
الأرض لله نمشي في مناكبها = والله قدّر لنا ارزاق واجالي
حث المطايا وشرقها وغربها = واقطع بها كل فج دارس خالي
واطعن نحور الفيافي مع ترايبها = وابعد عن الهم تمسي خالي البالي
لو مت في ديرة قفر جوانبها = فيها لوطي السباع القبس مدهالي
اخير من ديرة يجفـاك صـاحبها = كم ذا الجفا والتجافي والتحلالي
دوس المخاطر ولا تخشى عواقبها = والموت واحد ولا عند الخطر جالي
ان المنايا اذا مدت مخالبها = تدرك لوكنت في جو السماء العالي
رب السماوات يامحصي كواكبها = يامجري السفن في لجات الأهوالي
ضاقت بنا الأرض وأشتدت شبايبها = والغيث محبوس يامعبود ياوالي
يالله من مزنة هبت هبايبها = رعادها جات له بالبحر زلزالي
ريح العوالي من المنشا يجاذبها = جذب الدلي مع جبا مطوية الجالي
ديمومة سبلت وارخت ذوايبها = وانهل منها غزير الوبل همّالي
تسقي ديار شديد الوبل حاربها = ماعاد فيها لبعض الناس مدهالي
ياجاهل اسمع تماثيل مرتبها = فيها معاني جميع القيل والقالي
مثل المحابيب زادت في قوالبها = في صرفها زايده عن قرش واريالي
يارب توبه وروحي لا تعذبها = يوم القيامه اذا ما ثقلت اعمالي
وازكى صلاة على المختار نوهبها = شفيعنا يوم حشر فيه الأهوالي
رد مع اقتباس