وامسيت مثل اللي على الجمر قبّاض

[محمدالقاضي]

[ للغربة كؤوسها التى لابد للمرء من تجرعها شاء ذلك أم أبى]

البارق اللي في سما نجد قد ناض=نقّض جروح الوقت لمّاع ضوّه
في خافق ٍ من جور الايام مغتاض= لاشب برق ٍ... يبتدي الجرح توّه
نوره يذكرني ديار ٍ لنا اعراض= ياجعل يسقيها مع البعد نوّه
وتعود من بعد المحل نبت ورياض=أنشدك يابراق تفعل مروّه
الله من هم ٍ سرى الليل ربّاض= كنّه جبال طويق حضرة سموّه
جاير زماني للغرابيل فرّاض=شابت حظوظي في عهود الفتوّه
كم ياخلي ٍ يقضي الليل غمّاض=فيهم خويّ ٍ خان عهد الاخوّه
وحصان فكري يطوي البيد ركّاض=ويعود بافكاره لهيبة خلوّه
الله يسامح قاطع الوصل باعراض=اللي دفعني قاصد ٍ وسْط هُوّه
وامسيت مثل اللي على الجمر قبّاض=كفّه نفضها.. بس كفه مشوّه
ياليت قلبي أرض..وانت الذي ناض=وتسقي يباسه من مقاسيم نوّه

ابوسعد

نصّ رائع وجميل
فيه سرد للمعاناة ...وترجمة لمكنونات النفس الباحثة عن الراحة الربانيّة
اعتماد الشاعر وترديده للفظ الجلالة يحسسنا بلمسات دينيّة للنصّ
كلمات استحضرها الشاعر خدمت النص ..
تطعيم القصيدة بكلمات فصحى دليل على ثقافة الشاعر ..!!
الخيال ملئ القصيدة وساعدها على الوصول لنفس القارئ ..!!

نصّ جميل أخي صدى الذكريات أهنئك عليه وفالك البيرق ..!!

( <<<< متأثر بشاعر المليون )