يا مدور الهين

يـا مـدور الهـيـن تــرا الكـايـد أحـلـى ....... واســأل مــدور كـايـدات الطـروقـي
الـزيـن غـالـي لـكـن الأزيــن أغـلــى ....... ولكـل شـراي(ن) بضاعـه وسـوقـي
المـاء أعالـي والسمـاء فـوقـه اعـلـى ....... ولافاق علـم(ن) جـاه علـم(ن) يفوقـي
الصعب هـلاّ قلـت يـا صعـب سـهـلا ....... دامك تبينـي انـت يـا صعـب شوقــــي
أحــب عــزف المـهـرة الـــي تـغـلـى ....... واحب اروض كل طرف(ن) يموقـــي
احـب اسافـر مــع سـحـاب(ن) تـعـلا ....... واحــب فــوق الغـيـم لـمـع البـروقـي
واحــب اسـامـر بــدري الــي تجـلـى ....... وارسم شعاع الشمس عند الشروقي
يــا مــن عـلـى ثـايـر فــؤادي تـولـى ....... خلـك عـلـى قـلـب الكـرامـه شفـوقـي
أكـرم عزيـز(ن) بالعمـر مـا اسـتـذلا ....... يسـوق عـمـره للمشـاريـف سـوقــي
اختـرتـك مــن الـنـاس للقـلـب خـــلا ....... يـا حيـثـك مــرادي وكيـفـي وذوقــــي
مـارحـت ادور كــل زول(ن) تحـلـى ....... لـولاك تسـوى مـا عطيتـك خفـوقـــي

كلمات : دايم السيف
سمو الأمير / خالــد الفيصـــل