وإذا يعنى تضايقنا..؟
وإذا يعنى تضايقنا..؟
بنغيّر شى؟
وإذا مات الزهر في أجمل حدايقنا
بنغيّر شى؟
وإذا بهدومنا ضقنا
بنغيّر شى؟
كثير نمر بعض احيان بـ ضيقة بال
زعل صاحب
وحاجة مال
شتيمة شخص مايعرفك
عتب قارئ
ونزعل حيل نتضايق
وإذا يعنى تضايقنا
هى الضيقه بتكون الحل
إذا كانت شموس الوقت تحرقنا
هي الضيقة بتكون الظل
إذا غابوا جميع الناس وتفارقنا
هى الضيقة بتكون الحل
وإذا يعنى تضايقنا..
وكثير من التعب ذقنا
وسهرنا الليل
بيجى صبح ويفرقنا
ونبكى سيل
لين الدمع يغرقنا
ولابه شخص بالدنيا بليا هم
أحد ضايق
سبب فاتورة الجوال
وأحد ضايق
عشر سنين متزوج وربك مارزقه عيال
احد ضايق
لأن البيت به صجه وزحام أطفال
أحد ضايق
من السكّر
أحد ضايق
لأنه نايم مبكّر
أحد ضايق
لأنه حبها بـخبال
أحد ضايق
لأنه مامعاه ريال
هموم أكثر من اللازم وتخنقنا
سؤال الحال
وإذا يعنى تضايقنا..
من اللاشي
إلى اللاشي
على اللاشي
تخانقنا
وندخل فى نوايا الناس
أظن فلان يقصدنى
أظن السيده فلانه تسب الآنسة فلانة عشان العانس فلانة
أظن الناس هنا بالحيل تكرهنى
أظن السيدة فلانة تعالج من مرض نفسى
أظن فلان غبى ويشابه الكرسى
أظن فلان لها يكتب شعر حتى تغني به
أظن البنت بنت شيوخ
أظن البنت لعّابة
أظن البنت كذابة
أظن البنت حطت (ورد) وسط(الرد) سبب من شان تتعرّف
ترانا ناس فينا كذب
وغبى منهو يصدقنا
وإذا يعنى تضايقنا..
بنغير شي؟
وإذا يعنى تضايقنا..
إذا راحوا
وخلّونا
نسوا كل الكلام العذب
بكّونا
وعرفنا بـ يوم بأن كل الحكاية كذب
وملّونا
وإذا خيّم علينا الليل
ما أشرقنا
وإذا ضقنا
وصار الحرف حبال فى مشانقنا
بعد هذا
وإذا يعنى تضايقنا..
بنغير شي؟
وإذا يعنى تضايقنا..
إذا هذا الزمن لبّسك ثياب ف يوم مو قدّك
بتحط إيدك على خدّك
وتبكى حيل
إذا هذا البحر ضيّق ولايقدر على مدّك
بتحط ايدك على خدّك
وتبكى حيل
إذا كل الجمر هذا عجز يصنع عطر ندّك
بتحط إيدك على خدك
وتبكى حيل
إذا خدك طبع حزنه على يدك
وعرّقنا
أقول لك شي
وإذا يعنى تضايقنا..
وطفينا دروب النور
وعتّمنا
المدن والدور
ويتّمنا
شجر وزهور
وكتّمنا
رقيق شعور
وشتّمنا
علو السور
عشان أشياء هي الأتفه من الأتفه من الأشياء
رجل خاين
" ماهو دوم الرجال تخون.."
وماهو باين
وجود عيون
خيانة بنت
" ماهي كل
البنات تخون.."
لكن إنت
ترفرف من تنادى لك" حبيبى
العاشق
المجنون"
وبعد هذا
وإذا يعنى تضايقنا..
ومشوا عنّا كثير أصحاب
وتفارقنا
وشققنا الورق للريح
بعض فرقا
تكون الحل قبل نطيح
بعض فرقا
مثل جمره وحنّا الشيح
بعض فرقا
كثير أكرم من التجريح
بعض فرقا
تجى جيّة دعا وتسبيح
كثير أصحاب فارقنا ونسيناهم
كأن كانت علاقتنا علاقة وقت
مصالح وانتهت
يمكن
قرابة دم أو جيران
يمكن
تشابه هم
يمكن
واللي يهم
ماضقنا
وإذا يعنى تضايقنا..
وطيّرنا فراش النوم
ومسحنا كل ألوانه
وإذا سيطر على جوّك حزن ووجوم
وبديت تفسر الأشياء على كيفك
زعلك لـ
غيبة فلانه
وبنت كنت تعرفها قبل مدة وتفارقتوا وجتك تقول:
ولهانة
وبنت كل ماتحاول تصارحها بـ
أحبك حيل
تستأذن:
بروح أنام نعسانة
وبنت تعشق الدافي من الهرج
وتمرّك حيل بردانة
كثير أشياء غلط حولك
وجوه الناس
تعبانة
قلق مدرى طفش مدرى تعب مدرى قرف مدرى ترف
مدرى الناس زهقانة
كثير أشياء
تزهقنا
وإذا يعنى تضايقنا..
بيهمّ الناس
بيخلّي أحد بارد
يفيض إحساس
بتصنع هذي الضيقة علاقة حب مابين الحطب والفاس
وإذا يعني زعلنا بيوم
لأمر ما
وطار نعاس
وإذا فينا خنقنا أنفاس
وحلّقنا
يتغيّر شي إذا يعني تضايقنا؟؟
وإذا يعني تضايقنا
ماهو حتى المطر يهجر حديقتنا
وتنبت فينا ضيقتنا
وتغرقنا سيول الملح
والدمع هو صديقتنا
ولابه شخص فالدنيا تهمه ضحكتك غيرك
لذا إضحك
ولاترمي بذور الشر في خيرك
لذا إضحك
كثير أشياء من الأجمل تحاول دوم تسرقنا
لذا إضحك
وقول ب
وإذا يعني تضايقنا
وإذا يعني تضايقنا
بهدوء أكثر...
وإذا يعني تضايقتي
وجمعتي كل هـالعتمة
ولا اشرقتي
وقلتي في قرف مزمن :
أحس الوقت
مو وقتي
وأحس اني تعبتأكثر من الأكثرمن همومي
وقولي لطيحتك:
قومي
وقولي لكل هذي الأرض:
با علّي..
وانطري غيومي
تعبتي كثير تلومي النفس
ويخنقك البكا ساعات
ولا واحد بحزنك حس
بدفا العبرات
وإذا يلمح أحد تقصير كذا من غير مانقصد
هنا تنصب مشانقنا
بعد هذا
وإذا يعني.. تضايقنا؟؟وإذا يعني.. تضايقنا؟؟
بنغيــــر شي
منقول لروعتـــه
صامطية
|
 |
رد مع اقتباس
المشاركة الأصلية كتبت بواسطة الشفق
