...(الفصل السادس )...
مر اسبوع بصعوبه على ساره من تهربها في الجامعه من طريق سلمى وفي البيت من عبدالله وكانت تنطر في اي وقت مكالمه من خالها صار لها فوق الاسبوعين ماسمعت صوته وكانت تتنطر متى يكلم وتحققت احلامها في رمشة عين, كانت قاعده في قسم نور تلعب بلاي ستيشن مع عبادي..دخل عليهم حمد وقالها ان عمها يبيها في الميلس وسألت اذا احد احد عنده لانها مومتفيقه تلبس النقاب وقال مافيه حد ...
ساره انزلت لعمها ولبست لها شيله بنيه فيها ورود ورديه وسماويه انفس الوان الجلابيه المووجه بنفس الوان ,دقت الباب قبل لاتدخل وقال لها ادخلي ..ساره تجمدت ريولها من المفاجأه اللي جوفها قدامها ومقدرت تمسك عمرها من الوناسه..ركظت صوبه ورمت نفسها على صدره وهي تصارخ من الفرح :خالي سالم فديت عيونك والله ..
سالم نفس الشي الفرحه مكانت سايعته ولوى عليها وباس راسها :بنت الغاليه فديت عمرج انا..
ساره :والله مشتاقه تلك موت شهالمفاجأه الحلوه ...بعدين ليش ماقلتلي انك بتيي ..
سالم وهو يضحك :بل ..بل شوي.. شوي اولا شكرا وبعدين ياحبيبتي انا ماييت الا متأخر ومكنت ابي اتعب حد معاي ..وبعدين ليكون انتي اللي بتيين حقي في المطار ..
ساره رفعت راسها اطالع خالها وهي تضحك بخفه :اكيد كنت بستقبلك ..
سالم جر خشمها :قصورج بنت منصور اتيين لي في المطار كنت حشيت اريولج حش ..
ساره وهي تضحك :بدوي معليك شرهه ..وحتى وانت عايش في باريس بتظل بدوي ..
سالم بعنجهيه :بكل فخر وحتي النخاع بدوي ..
ابوعبدالله :ونعم وسبع انعام ...وقف واستأذن من سالم الحين بنت اختك عندك والقهوه والفواله موجوده عن اذنكم خليكم احط راسي شوي قبل صلاة العصر ..وسمحوا له يرتاح خصوصا انه تعبان في الايام الاخيره لانه قاعديداوم دوام كامل عشان عبدالله يستلم ادارة الشركه لانه بيتقاعد ويخلي عبدالله يتولا الشركه من بعده وماكان باقي الا كم يوم ويستلم الاداره كامله ..
ساره :هاه خالي بشر ان شالله نويت تستقر هني..
سالم بعد ماقعد وساره تقهويه :ان شالله ..
ساره :صج خالي ...
سالم :ايه صج ..وبعد بسكن قريب منكم ..
ساره بستغراب :شلون ؟
سالم :شريت بيت قريب من هني ..واحد من ربعي سمسار وجاف البيت وقال لي عنه وانا طرشت له حواله عشان يشتريه لي والبيت مأثث خالص يعني ايي وسكن ..
ساره :زين وايد ياخالي ..عشان اسكن معاك واكون قريبه من بنات عمي ..
سالم يطالعها ويبتسم :تدرين اني مفكر نفس الشي واني شاري البيت عشانج عشان اخذج معاي..
ساره انقزت من الفرحه وحظنت خالها من الوناسه وقعدت تسولف معاه لين اذن العصر واستاذن يروح يصلي وطلعت هي بعدعشان تصلي ..
بعد ماردوا الرياييل من المسيد وتقهووا قهوة العصر سالم فاتح ابوخالد في موضع ساره انها تسكن معاه ..وقبل لايتكلم يدها دخل عليهم عبدالله اللي توه راد من الدوام .سلم على سالم بس ماكان يعرفه وكان مستغرب منهو هاذا وشيبي من يدي ..قعد عبدالله جنب يده ومقابل سالم ..
سالم :شردك يابوخالد على موضوع ساره ترى انا كنت مكلم البنت وهي موافقه ..
عبدالله بحيره فرت مخه وحس ان دم وقف من مخه اي موضوع الاخ يتكلم عنه ..بعصبيه واضحه :اي موضوع .؟
ابوه التفت عليه بحزن :الله يسلمك سالم خال ساره ياي يبي ياخذها معاه ..
سالم :الله يهداك يابوعبدالله انا ماقلت جذي البيت قريب منكم يعني وقت ماتبيكم بتيكم ..بعدين انتوا للحين مارديتوا علي ..
عبدالله حس براحه غريبه ,ابوخالد :سالم انت ريال ماعليك كلام بس البنت احس لها تقعد اهني ..
سالم :ليش ؟
ابوخالد :البنت ولد عمها متكلم عليها وبيملجون قريب ويعرسون واحنا نبيها قريب عشان بنات عمها ومرة عمها يجهزونها ..
سالم بستغراب :بس هي مقالت لي هالكلام ..!
عبدالله :احنا لين الحين مافاتحنها ..
ابوخالد :ماظن راح اتحصل احسن من ولد عمها ..والاشرايك ياسالم ؟
سالم بفرح :ماظن راح اتحصل احسن منك ياعبدالله ..ريال شهاده ومركز والكل يتكلم عن نجاحك في السوق ..
عبدالله :مشكور ..وقعد يتكلم معاه عن السوق واخباره وابوعبدالله شاركهم برأيه بس ابوخالد انسحب من حلقة الاعمال وراح يسلم على واحد من يرانهم توه راد من العمره..
ساره وبنات عمها في المطبخ كانوا يسون طبق حلى حق القهوه لان ام عبدالله بيونها حريم ,عبدالله دخل الصاله وماحصل حد فسخ غترته وقحفيته وخلخل اصابعه في شعره ونفضه وكان مثل الحرير بين اصابعه سمع اصوات ضحك من المطبخ الداخلي ..وراح للمطبخ عشان يجوف من اللي فيه وبل المره يشرب ماي ...
عبدالله دخل وحصل الثلاثي يسولفون ويضحكون ساره اول مادخل حطت الشيله على راسها وسكتوا وهو راح لثلاجه وخذ دبة الماي :ساره عطيني قلاص ..
ساره عطته القلاص وصب فيه وشرب وبعد مانزل القلاص طالعها وقال :ساره ممكن اسألج سؤال وتردين بصراحه ؟
ساره بخوف :أسأل ..
عبدالله بعصبيه :احنا قصرنا معاج بشي ولاضريناج ..؟
ساره بستغراب :لا ..بالعكس انتوا جميلكم على راسي مراح انساه ابد ..
عبدالله وهو يصارخ :اجل ليش تبين تطلعين من البيت ؟
ساره بقهر في داخلهاشدخله :اللي يسمعك الحين مسويه منكر انا ماسويت شي غلط بلعكس انا ابي اخفف الحمل على عمي يكفي طول هالسنين متحملني ومتحمل كلام يدي اللي يغث كل ساعه انا ابي اريحه من الاحراج اللي يسببه له كل شوي ويعور قلبه وصدقني انا مافكرت نفسي انا فكرت فيه ...
عبدالله بعصبيه :صدقتج الحين ؟
ساره بقهر :عنك ماصدقت هامني انت اصلا ً..
عبدالله انقهر من ردها ومسكها من عند زندها وقربها منه وكانت تحس بأنفاسه على ويهها :يكون في علمج ان اللي في راسج ماراح يصير ..ولاراح تتطلعين من اهني ..وفك يدها وطلع وقبل لايطلع التفت لها :وعلى فكره ترى ملجتنا الاسبوع الياي مع حصه وسيف ..
ساره انهارت على الكرسي من بعد الصدمه من كلامه :شقاعد يقول هاذا انهبل لوشيصير مستحيل اوافق عليه ..
هند بحزن من ساره :هدي اعصابج انتي الحين ولاعليج ..
حصه :ساره حبيبتي ..لاتحرقين اعصابج ..
ساره ماردت عليهم وقعدت تفكر في كلامه لويموت ماراح اتزوجه انا اتزوج واحد ميت احساس لا وفوق هذا يكرهني اجل ليش يبي يتزوجني يزيد اهمومي اهموم ..
ساره :ساعدوني مستحيل ان هاذا الشي يصير انا مراح اقدر..
حصه بنهزام :تعرفين ان احنا مستحيل انساعدج ولاانتي تقدرين ..اذا صار هاذا الشي ..
ساره :شتقولين يعني بالغصب ..
هند :ساره اهدي تعرفين احنا بنات مالنا راي اذا وافقوا الاهل مستحيل يكون لنا راي..
ساره :ليش عشان ماعندي اهل بيزوجوني بالغصب ..
حصه :الله يسامحج احنا وين رحنا ..
هند :ايكون في معلومج احنا لين الحين هلج ..
ساره حست انهاجرحتهم من غير قصد :أنااسفه مو قصدي ..بس مستحيل انهالشي يصير انا ماقدر اعيش مع انسان مو مرتاح لي واحساسه ميت.
هند :بخبث يعني انت مفكره فيه ؟
ساره باحراج :شمفكره انتي الثانيه لازم القى حل اهالمشكله..
عبدالله بعد ماطلع من عندهم بلغ يده وابوه بقراره ان ملجته تكون مع سيف يده فرح وايد وقرر انه يكلم ساره ويقنعها بالطيب والاالغصب ..
بعد صلاة العشاء ساره كانت في غرفتها وتوها مخلصه صلاتها هي هندوحصه ,حصه :ساره فكرتي في الموضوع ؟
ساره :اي موضوع ؟
حصه :موضوع خطبتج من عبدالله ..
ساره :تبين الصراحه لوكانت في ظروف غير جذي ورأي ماخذينه من قبل لايتكلم كنت وافقت بس الحين لو تنطبق السما على الارض ماتزوجته ..
هند:شبتسوين ..انتي مافي يدج حيله ..وهالشي مثل ماهوبيصير لج بيصير لي ..يعني كلنا قدرنا واحد مهما تطورت الحياه ..
ساره :مستحيل اقبل هالمنطق الغريب ...
حصه :انزين فكري بالموضوع بناحيه أيجابيه يعني بتكونين قريبه منا ولاراح نفترق بعدين عبدالله ماهو شين وحش وشيبه عشان تنقرفين منه بالعكس شباب ومنصب وثروه في المستقبل ودكتور بعد شتبين ..
ساره بسخريه :ابي ريل يحس فيني ..مو كل دقيقه يفك حرته فيني ..
هند :يمكن بعد الزواج يتغير ...ويحبج ..
ساره :شيحبني انتي الثانيه ...كلنا نعرف ان عبدالله مستحيل يفكر في حد بعد نوف ..
حصه :ساره انا اجوف ان تفكرين عدل قبل لاتعطين رايج حق احد لاتنسين ان موقفج غير ..
ساره :شقصدج ؟
حصه :قصدي اذا رفضتي بتجددين مأساه ابوج يعني بتعصين العيله وتبتدي المشاكل الاوليه تظهر لساحه ..
هند :شتقولين حصوص ..!
ساره :حصه انتي صاجه في هالشي بس ماقدر ...
حصه :انتي بنفسج قلتي لو ان الظروف غير كنتي وافقتي ..تخيلي ان الوقت غير وانسي اللي حصل ..
ساره بحيره : مادري حصه مادري ...
دخلت عليهم ام عبدالله وقالت لساره ان يدها يبيها في غرفته ,ساره في داخلها كانت حاسه شيبي ونزلت له ودقت الباب عليه :دخلي ..
ساره :سلام عليكم يبه ..
ابوخالد :وعليكم السلام ..
ساره :خير يبه بغيتني في شي ؟
ابوخالد :صكي الباب وتعالي جنبي ..
سكرت الباب وقعدت جنبه على السرير وهي ترتجف لانه اول مره يناديها ويكلمها كانت منزله راسها وتلعب في طرف شيلتها ..
ابوخالد :ساره انتي استويتي حرمه ماشاءالله عليج ..وعبدالله ولد عمج طلبج مني وانا وفقت وانا الحين ابي رأيج ..ولاتنسين ان رأيج بيأثر على العيله فلازم تحسبين حسابها ..
ساره :بس يدي ..انا مافكر في الزواج الحين ابي اكمل دراستي (قالت اول شي طرى على بالها)..
يدها :ماظن عبدالله بيرفض هالشي بالعكس هو انسان متعلم وده مرته اتكون مثله ...بعدين لاتخلين عنادج ياخذج لانه مانفع ابوج منقبلج وخسر عيلته واناخسرته ...وعاش ومات وهومحروم من سند العيله وعشان ماتخسرين عيلتج لاازم توافقين ..ويمكن اذا وافقتي بتحسسيني ان منصور نفذلي اللي ابيه ولو مره وحده ويخلي اسامح نفسي على رفضي لأمج ...
ساره من سمعت كلام يدها صخت ولاعرفت شتقول اول مره يصارحها انه ندمان على اللي صار وده يديد معاها صفحه جديده بزواجها من عبدالله ..احتارت بين رفضها وقبولها اذا رفضت بتخسر اهلها واذا وافقت بتخسر نفسها ورجحت الكفه الاوليه لانه لاخلي من العيله والا نفسها بتقدر عليها ..
ساره بنهزام :يبه الشور شورك ..
يدها بفرح :لايا بنتي هاذا شورج انتي ...وقوليلي رايج ..
ساره :موافقه...
يدها باس راسها ولوي عليها بفرح :وهاذا راي فيج بنت منصور اصيله .. وانترست عيونه من الفرح ساره فرحت من تغير مشاعر يدها صوبها ورمت راسها على صدره ومسح على راسها وقعدت تسولف معاه شوي وراحت لغرفتها تبلغ شلتها بقرارها اللي كانت رافضته ..
ساره طلعت غرفتها وانسدحت على فراشها معقوله انا قبل ساعه كنت رافضه الموضوع نهائي والحين وافقت برمشة عين بكلمه حلوه من يدي مادري شلي خلاني انضرب في مخي ووافق ياربي ارحمني برحمتك...... معقوله لهدرجه انافاقده الحب والحنان اول ماكلمني يدي سيده وافقت من هالبارد أفففففففففففففففففففففف شاسوي الحين .....
أتراجع ولاأكمل بالقرار اللي أتخذته ...................المفروض اني احترم كلمتي انا خلاص وافقت وسلمت رقبتي للجزار عبود ...والله يرحمني برحمته..أهو الوحيد اللي بيعيني على هالدنيا الشقيه....
هند ماقدرت تقاوم فضولها وراحت لساره تبي تعرف شصار معاها ,اول مادخلت حصلتها منسدحه وتلعب بخصله من شعرها وتفكر..
هند :الحلو شيفكر فيه ؟
ساره ببتسامه باهته :افكر في المصيبه الجايه...
هند قعدت على السرير عند ريولها وحطت ايدها عليها بخوف :اي مصيبه؟
ساره: وافقت..
هند :على ايش؟
ساره:على عبدالله ...
هند اقعدت دقايق لين تستوعب الموقف ...:عبدالله أخوي..
ساره:لاراعي الدكان...
هندوالفرحه مب سايعتها :من صدقج؟
ساره اقعدت وهزت راسها اهند بالموفقه ....هند من الوناسه انقزت عليها ولمتها وقعدت تضحك :الحمد الله ربي استجاب دعواتي...يعني ماراح تطلعين مكان ثاني ...
ساره:للأسف بقعد وبقابل ويهج..
هند ادزها:مالت عليج ... يصح لج اتقابلين هالقمر ...
ساره : أي قمر ....أي لوعة جبد ..تذكريني بأبلة الرياضيات يوم كنت صف رابع ..
هند:شايفتني ماسكه مسطره...
ساره :وانتي الصاجه ويهج مسطره..
هند:انا مسطره ياللوح...وقامت عليه وسدحتها وعظتها في خدها..
ساره بصوت مخنوق من الضحك :يالحماره عورتيني..
هند :أحسن عشان ماتعودينها ماره ثانيه..
ساره :اسفه ...خلاص ما أعودها..
هند:انزين متي الملجه ؟
ساره بعد ماتدمرت ملامح ويهها: مع حصه ..
هند :ابيه مافي وقت .. تفصلين فستان..
ساره :عادي ...بالبس فستان اللي مفصلته للملجه ...
هند :حرام مايصير ..
ساره :ليش ؟... بالعكس انا معجبني .. لاتنسين ترى الملجه عائليه يعني مايحتاج هياط زياده...
هند:أففففففففففففف منه عبود ليش مأخر شوي عشان أفاشر قدام البنات بأكثر من فستان..
ساره تضحك :هاذا اللي هامج ...
هند :ماعلينا ...المهم انج مارح تروحين بعيد يكفي مدام سيف..
ابيه....مادرت بالخبراليديد امشي انبشرها...
وطلعوا لحصه يبلغونها واستانست ...على العشاء الكل عرف بالخبر وستانس بهالفرح اليديد عليهم من بعد الهموم والابعاد ...
عبدالله عرف من امه بقرار ساره حس بحمل يديد على ظهره بس في نفس حس انه كسب هالجوله من التحدي اللي تشكله ساره ويقدر يلجم جموحها اللي يحسسه بالضعف والخوف والفرح والكره بس مستحيل يكون حب...بس شعور حلو ...انك تكسب ...بس لا تنسى ان هالقرار مو قرارك انفرض عليك.... لازم اخذ لي موقف من هالمسخره اللي تصير ...
عبدالله البرود هو الحل الجديد مع هالموقف ..مراح يساعدني الا اني اوقف كل نبض غريب عليك ياهالقلب اللي متعبني ...
وتمضي الايام ....والاستعدات تكمل كل يوم ...وتبتدي مرحله يديده في حياة اكثر من شخص وكل واحد له موقف ...
فهل يستطعون الالتزام بهالكلمته؟
************************