طريقة تحضير المثلوثه ........... لمحبيها :)
المثلوثه
انشالله انكم تسونهااااا تعزموني علايهااا
نترككم مع
طريق التحضيرررر
السلام عليكم ورحمة الله وبركاته
اليوم راح اقدم لكم طريقة عمل المثلوثه .. اكله لذيذه جدا كانت اتسويها جدتي وورثتها لأمي .. وهذي الأكله عبارة عن ثلاث طبقات وهيه : طبقة الجريش .. طبقة خبز الرقاق المشرب بالمرق .. طبقة الأرز
والحين راح نتكلم عن طريقة عمل كل طبقه على حده ..
ونبدأ بالطبقه الأولى وهي ..
الجريش :
المقادير :
1 كوب جريش
2 كوب من الماء
2 كوب من اللبن ويفضل يكون حامض
ثلاث بصلات انقطعهم مربعات
1/3 كوب زبده او زيت
ملح .. كمون .. ماجي
الطريقه :
نوضع البصل مع الزيت في قدر على النار ونحمسها لين تذبل بعدين نضيف اللبن والماء والملح والكمون والماجي ونحركهم مع بعض لين يختلط الماء باللبن وعند الغليان نوضع الجريش ونستمر بالتحريك الى ان ينتفش حبات الجريش ثم نغطي القدر ونوضعه على نار هادئه لمدة اربع ساعات .. انا كنت اشوف امي كانت اتحط القدر في التنور تغلقه بور قصدير واتخليه بالتنور على الفحم الى ان يستوي طبعا لمدة اربع ساعات وعند الاستواء نفتح القدر ونضربه بالملعقه وانخليه على ناحيه
الآن راح اتكلم عن طريقة عمل الطبقه الثانيه وهي الخبز الرقاق :
المقادير :
2 اكواب من الدقيق
ملح .. وماء
الطريقه :
نعجن جميع المقادير مع بعض الى ان نحصل على عجينه رخوه لفردها على الصاج .. ويفضل انه نوضع الصاج على الغاز بدلا من الفحم لأنه الفحم بيحرق الخبز فانا فضلت الغاز .. بعدين ناخذ مقدار صغير من العجينه ويوضع فوق الصاج وبعدين نفرد العجينه بقطعة حديد او باليد .. انظر الصوره :
بداية وضع العجينه
نوضع العجينه بهذي الطريقه
نفرد العجينه باليد او بقطعه من الخشب الى ان نفرشه على الصاج بالكامل وبعدين ننتظر لين يحمر الخبز وبعدين نشيلها
هذا شكلها النهائي
الحين جاء دور نتكلم عن طريقة عمل المرق الي بنسقي فيه الخبز الرقاق :
المقادير :
دجاجه مقطعه الى اربع اجزاء
ماء
دهن بقر
صلصه
ليمون اسود مكور
بصل مقطع مربعات
بطاطس مقطعه مربعات
طماطم مقطعه مربعات
جزر مقطع مربعات
كوسا مقطعه مربعات
ملح .. كمون .. بهارات
الطريقه :
نحمس البصل مع الدهن البقري ولين يحمر البصل نوضع الدجاجه والماء والملح والكمون والبهارات ونتركه لين ان ينضج
بعدين نرفع الدجاجه من المرق ونقسم المرق الي قسمين قسم نطبخ فيه الخضار وقسم نطبخ فيه الأرز
اول شي بنضيف جمع الخضار الي قطعناها بالمرق وانخليها لين تستوي
والقسم الثاني من المرق نوضع فيه الأرز ويجب ان نراعي
مقادير الأرز مع المرق يعني اذا اضفنا كوب ارز لازم انضيف كوبين مرق وهكذا ونتركهم الى ان ينضجوا
والحين عند التقديم
بنحط الطبقه الأولى وهي الجريش في طبق التقديم
وبعدين الخبز بعد ماسقيناه بالمرق بنضيفه على الجريش طبقه ثانيه وبنحط فوقه الخضار الي طبخناها
وبعدين طبقه أخيره وهي الأرز بنضيفها فوق
وبعدين بنضيف الدجاجه بعد ماحمرناها بالفرن
وبنحط فوقه للتزيين صنوبر وجوز محمصينهم وبنرش قليل من الزبيب
وصحه وعافيه على قلوبكم
|
 |
رد مع اقتباس
المشاركة الأصلية كتبت بواسطة أمن وهدوء
.
