تصويري للعيد في جدة
بصراحة هذي اقدم مدينة ملاهي فجدة وحبيت اني اعرفكم عليها
وهذي المدينة كانت زمان هي الكل في الكل وتقع فوسط منطقة حي البلد
وهي عبارة عن مراجيح يدوية ولا يوجد فيها اي شي من الملاهي الحديثة
ولا تقام فيها اي العاب غير ايام العيد فقط صباحا حتى تحرقنا الشمس
ومساء حتى ساعات متأخرة من الليل وهي بجوار مدارس الفلاح التي تخرج منها الرعيل الاول من ابناء جدة واصبحو فيما بعد طحاطيح جده
لانو ماكان يقدر يدرس فهذي المدارس الا ابناء عوايل مرتاحة ماديا
المهم ومع مرور السنين صارت ملاهي العيدروس تحمل نكهة مميزة
وغالب اهل جدة يجيبو اولادهم فيها ويقولولهم انها من زمن الاجداد مستمرة فبالرغم من انها متواضعة الا انها تكتظ بمعنى الكلمة بالناس
والعوايل بكل طبقاتها .. تشوف العوايل الغنية يجيبو اولادهم ويحكولهم عن اسماء الحواير < الحواري > ويصوروهم بكاميرات فيديو وناس غير سعوديين كثير راقتلهم الاجواء وكل شي فيها واشياء ماتخطرلك على بال
دبابات ويأجروها وجمال وموجودة وخيول وفيها والعاب الكترونية لابد منها ونفافيخ وفرافير وبلياردو ومحلات العاب وكمان اسكريم وبطاطس حتى في الصباح وسندوتشات اشكال وانواع وويغمش ومصريات يبيعو للحريم حاجات يجيبوها معاهم من مصر تاكل مخهم ومقرفونات فيها انواع التسجيل لاغاني العيد وناس تقول عبارات للاطفال وقت اللعب
منها :
يحلاوة العيد هذا اللي يرجحبهم يقولها والاطفال يردو عليه يحلاوة
يقوم يقول من مال جديد يحلاوة شغل الفنان يحلاوة اشكال والوان يحلاوة
بنت المجنونة يحلاوة تاكل ليمونة يحلاوة وبنت السورية يحلاوة تاكل لبنية يحلاوة وبنت اليمنية يحلاوة تاكل مقلية يحلاوة وبنت المصرية يحلاوة تاكل
طعمية يحلاوةوكلام كثير
والمشكلة العالم هذي كلها تتجمع في الحارة الضيقة هذي ومستمتعين
والجو كلموني بتشديد النون
اخليكم مع الصور وهذا بعد صلاة العيد مباشرة ولو في الليل ماكنت راح اقدر اصور شي
هذي الدبابات الايجار وفي انواع ثانية
يقشر بطاطسه
يجهز للكبده
صورة لمدرسة الفلاح
يغمش
بياع الورد الاحمر < الجوري > ولابس احمر فوق الدراجه
وهذا مراسل الام بي سي جاي ينقل الحدث بالصوت والصورة
وهذولا مصوريين القناة صورتهم
أخيرا اتمنى اكون نقلت ولو فكرة بسيطة عن المكان المؤقت هذا اللي مانشوفه الا في العيدين بس وبعدها ترجع الشوارع وكأنو شي ماكان
|
 |
رد مع اقتباس
