أنا عندي موضوع ومنذوو مبطي حاب أكتب فيه .. وموضوعي هو عن نوعيات الشباب والبنات في المنتديات بالانترنت المنتشره هاليومين ..المهم ولا لك بالطويلة..
نبدا بالفئه الأولى .. وهي الرومنسية..
أو المتمرنسين(هي صعبة ولكن وش أسوي هذا اللي طلع مني..)ومعناها اللي يسوون حالهم رومنسيين ويحبوون وتايهين في الحب.. وهذول تجي عند الواحد فيهم إذا ما صنفر وجهه عند أكبر حلاق بالديره وصور خشته وهو مسبل عيونه وساهي والا ما سكن له قلم وكنه يفكر يقال في لحظة الهام (أمحق من مشاعر..) أو إذا كان الشكل ما يؤهل انه ينحط راح واختار له صورة مطرب حلو وانيق ولا ممثل وسيم يعني تحصيل حاصل وجود صورة ولا ما ينفع ودايما اساميهم تجيك طقه وحده..
والبنات نفس الشئ؟؟تروح تختار صورة شاكيرا ولا برتني ولا حداا هالمبرقعات وطقتها تحت اسمها المتعوب عليه.. وهو كما ذكرت لكم أعلاه (متأثره بالاسلوب المتبع في أسئلة التعجيز العامة اقصد الثانوية العامة)
كيف تعرف هالنوعيه.. فضلا اتبع الخطوات التاليه.. زمزح..هذول تلاقيهم مطيحين في قسم الشعر والخواطر يكتب هنا وينقد هناك ومره آآه ومره اييه ومره طاخ ومره طيخ يعني اذا ما طلع مطقوق في الأخير ولا ما ينفع لا وازيدكم بعد مره صار انه خمس من أعضاء نفس المنتدى حبيباتهم متوفيات مدري بس شكلها كانت موضة السنه عشان يكسرون الخاطر ويبين صدق الشعور والعاطفه...امممحق..
وتلاقي واحد يتفلسف لا ومع وجه يشجع وين أحمد شوقي وشعراء المهجر عنهم قسم ان يحكمون عليهم بالاعدام وتعزير بعد وهم كل هالزحمه عشان يقولون مثقف الأخ ما درو ان الحكي ببلااش لا وبعد انه شاعري ورمانسي ويا كثر ما يهتم بالخط والتلوين والزركشه ولما تجي عند الهرج الوكااد تلاقيهم100% عكس الحكي اللي هم يكتبونه والقصايد والخواطر يا قلبي لا تحزن مسروووووقه للأسف شغل لطش وتشليح يعني بالمكسيكي لو يسمون القسم من شعر وخواطر الى لطش وتشليح يكون اصرف (والله من حر ما اونس..)
ثانياً / قسم الدين والدنيا..
ويختص هذا القسم بالمواضيع الدينيه وهنا اذا الواحد حب يصلح أخلاقه دخل وسجل توقيعه تحت حدا هالمواضيع الدينيه وليته فاهم للأسف؟؟!!يكتب جزاك الله خير (يقال انه فاهم الحين..) واكثرية اللي يكتبون بهالقسم للاسف باقول فيهم ما قاله الله تعالى( كمثل الحمار يحمل أسفارا) عن جد الواحد لا سالته عن امور دينه برطم وصار بكبره علامة تعجب واستفهام ولا شفت حدا الأعضاء مسنتر هناك اعرف ان ورااه بلوووه كبيرة او يكفر عن ذنب( الحمد لله الذي عافانا..)
ثالثاً / قسم الحوار والسياسة..
هنا يا كثر اللي يتفلسف على غير سنع يعني تلاقيه يجادل عالصغيرة وعالكبيرة ويقدس كلمة (لا)ومخاوي مبدأ(خالف تعرف) ويقلبون الساحة فوق تحت الى ان يروح الموضوع للمحذوفات لأنهم وبكل فخر تجاوزو حدود الأدب في الحوار البناء؟؟؟ امحق من ثقافة وديموقراطية والله ان الثقافة مجنبه وهم مشملين؟؟
رابعاً / قسم الرياضة والرياضيين..
هالقسم تكميلي.. تبلش عمرك لا قامت الحرب بين النصراوية والهلاليه.. صحيح ان أهل الرياضة ماتو؟؟؟(ما سمعت بالمثل اللي يقول اللي اختشو ماتوااااا)
خامساً / قسم الصرقعه والضحك...
هذا ما يدخله الا واحد مهوي ومنسم ومعطي الدنيا طنااش وشلووون تعرفهم؟؟؟
أساميهم على هالنمونه .. المنسدح.... المنكفخ....المنسم...المهسترررر.. وهكذا..
والبنات.. المصرقعه..المهبوله.. المفهيه..وهذه الفئه تتعامل بمبدا خذ وهات..وهي أحسن فئه على المستوى العالمي والدولي(ما كنها متشابهه؟؟)
هالفئه تدخل لهدف الوناسة وتختلف كثيراً عن الفئات السابقة...
هذا وبعد هذا الشرح المطول كلبوكم قولوا يالله لا تبلانا.. اللهم لا تؤاخذنا بما فعل السفهاء منا.. يارب لا تسلط علينا بذنوبنا من لا يخافك فينا ولا يرحمنا واتمنى ما اكون ظلمت أي شخص لان هذا من خبرتي السارية المفعول..
|
 |
رد مع اقتباس
