استاذى / عجاج الليل ,, تؤمن بالله بأننى ضحكت من هذا الخبر ,, وخاصه ترتيبها 87
من الواجب ما تنذكر نهائيآ ,, لانها لو وضعوها فهي فشيله لنا ,,
استاذي ابشرك مافي شي جديد هذا حال الخطوط ماعمري سافرت مايصيرلي موقف الرحلة تتأخر سوء معاملة شي مايصدق والمسؤلين في سبات عميق والملحم يصك 280الف الراتب وتبغاه يشوف التقصير الله لنا وحسبي الله على كل مسؤل (؟)
فوالله سافرت من الرياض لجازان وكنت حاجز ذهابآوايابآ ,, الذهاب يوم السبت والإياب يوم الجمعه ,, فكان الإياب انتظار ,, المهم خلصت شغلي ولابد ان اكون فى الرياض يوم الجمعه بعد صلاة العشاء لان عندي موعد وشغل استفيد اكثر من 70 الف ,, جئت يوم الجمعه بعد الصلاه ,, والرحله حوالى 2 سجلنى فى الانتظار الموظف وقالى ان شاء الله تكون اول واحد ,, الرحله قد اعلنت ندائها الثاني , جئت وقلت ياخى لازم امشى فى هذى الرحله ,, قال مافى للاسف الان فطياره فل ,, وقال فيه درجه اولى قلت هاتها تصدق بكم فوالله الذى لا اله الا هو بقيمه 1280 / يعنى دفعت حق اربع ركاب سياحيين ,,
المهم لحقت على الرحله فى اخر لحظه ,, اقلعت وبعدما فتحت الحزام قلت ابغا اشوف الدرجه السياحيه هل هى فل ام لا ,, اقسم بالله وجدت اكثر من 8 مقاعد فاضيه ,,
هنا عرفت بأنهم نصابين ويستغلون المواطن ,,
فكيف تريد ان تظهر هذه الخطوط من ظمن دول العالم ,,
وعلاوه على كذا لو تريد ان تحجز لابد عليك ان تقوم بالحجز قبل السفر بشهر او شهرين ,, وخاصه فى الصيفيه ,, الرحلات للمناظق الجنوبيه كأبها وجازان هذى متوقفه نهائيآ ولايمكن ان تجد رحله الا بعد عيد رمضان بـ 15 يوم ,,
فالخطوط السعوديه فاشله لدرجه كبيره ,,
============================================
قرأت فى احدي المواقع قصه جميله ومرحه وفى نفس الوقت تنقل الواقع والفرق بين الخطوط السعوديه والإمارتيه ,, اترككم معها ,,
قصة حقيقية تشابه الحلم يرويها شهريار قصدي سعد بن سعد
يوم من الايام بغيت اروح لتورنتو من الرياض طمرت لحبايب قلبي الخطوط السعودية ياجماعة ابي رحلة قالوا ابشر بسعدك فيه عن طريق لندن وتنطق في المطار 8 ساعات وفيه عن طريق باريس وتنثبر الله لايهينك 5 ساعات وفيه عن طريق الشرق اختر اي بلد وكذلك بتنطق كم ساعة ، ومن هناك تكمل مشوارك عن طريق الخطوط الكندية او خطوط الدولة اللي انت رحت لها يعني بدل ماتستغرق رحلتك 12 ساعة تبي تصفط لك 24 ساعة ماتوصل تورنتو الا أنت عيونك محولة وجهازك العصبي ضارب شوط ولك يوم كامل مطامر ماذقت فيه الراحة - أمحق ناقل وطني
أوحيتني يامعالي المهندس خالد
حكيت رأسي وعزيت نفسي بخطوطي السعودية وطلعت على شارع العليا العام والا ذيك اللوحة اللي تقول الاماراتية وش ذا الاماراتية بعد ، لفيت دخلت قلت سلام يالربع ارحموا عزيز قوم ذل ورميت شماغي على مدير المكتب وفز قال أي ويل كوول بوليس قلت ابليس والله توني جاين منه وفهمت أنه يقول أبشر بسعدك جابوا لي ماء بارد وشفطته وجابوا قهوة تركية كلها حثل وأيضاً شربتها أخاف أردها وأخالف سلومهم ويزعل مدير المكتب قلت يالربع مشكلتي عظيمة قالوا غرد وش عندك قلت ابي تورنتو قالوا متى قلت بعد بكرة قالوا هات دراهمك وتعال للمطار في يوم السفر !!
أوحيتني يامعالي المهندس خالد
توكلت على الله وجيتهم في ذيك الليلة المباركة ،، سلام يالربع أنا اللي جيتكم ذيك اليوم ،،، أخترشوا الرجاجيل وخذوا شناطي وعفشي وفي 10 دقايق و32 ثانية دخلوني الصالة معي بطاقة صعود الطائرة ،، ركبت الطائرة الساعة 7 مساء على وين ياشباب قالوا دبي _ ياجماعة ابي تورنتو ماابي دبي وش ذا الخطأ حتى أسم الديرة مافيه ولاحرف من دبي __ قال أها بس سكر خشتك وعن البربرة __ صمتنا ساعة ونص الا احنا بدبي نزلت والا ذيك اللوحة اللي كبر راس واحد من العيال مكتوب عليها أسمي قلت بس هذولا حقين الخطوط السعودية دروا أني راكب مع ذولا وبيبلشوني وش بيفكنا من ذا الحوسة جهزت عذري أبقول هم اللي مركبيني غصب ،، جيت لحامل اللوحة قال أنت سعد قلت نعم أنا غبر وش عندك قال ويلكم سير انا من فندق ملينيوم ،، على طول ذكرت كمبيوتري القديم يوم قالوا ملينيوم قلت ياخوي ماابي كمبيوتر انا كمبيوتر في رياض مافي معلوم ،، قال حنا فندق يابن الحلال هات شناطك !! لاحول وش يبون ذولا بتروح دراهمنا في دبي استسلمت ورحت معه وصلنا الريشبشن قال ويلكم سير قلت نو كمبيوتر عطاني كرت و3 اوراق قلت وش هالكرت قال حق غرفتك بتنام عندنا الى بكرة الظهر والثلاث اوراق حق 3 وجبات تطفحها في الفندق قبل تمشي ،، الله الله الله ومن بيدفع كل ذا وختمتها بيو أر دونكي (اللغة تنقذك في مثل هالمواقف) طالعني وطير عيونه مدري وش قال لكن نادى اخ اماراتي وكلمه والاماراتي قال لي يابن الحلال هذا على حساب الاماراتية انت ماراح تدفع لا للنوم ولا للاكل (حسبي الله عليك يابوالجدايل روعتنا ماعاد نقتنع ان الخطوط تعطي وجبات كاملة)
أوحيتني يامعالي المهندس خالد
شكرتهم وحسيت اني بحلم نمت واصبحت وتمشيت وافطرت وتغديت ويوم جا الظهر والا ذاك الاسمر اللي ينتظرني بالرسبشن خير قال يالله رحلتك بتطير - يالله أن تكثر خيرهم مرسلين سواقهم- شوي والا انا بمطار دبي طق طق طق والا مدخلينا ذيك الصالة الكبيرة اللي فيها كنبات صفتها مثل صفة كراسي الطيارة بس هاذي على مستوى وتلفزيونات وفوط وريح زين المهم قعدوني وربطوني بحزام مثل اللي في الطيارة ناديت على وحدة ادوختني من كثر ماتمر من عندي قلت بليز وير بوابة تورنتو ضحكت وقالت لها كلمة ماعرفتها شوي والا صالتنا تحترك وترتفع مقدمتها قلت بس والله أنه توابع العيص الله يستر ،، يوم ركدنا ناديتهم قلت جيبوا لي مترجم من السفارة (يسمع بالاستعانة بالسفارة عند أي مشكلة) انا لازم ادري وش القصة ،، جابوا لي واحد سعودي اشوفه مع عائلته قدام جاني قال وش فيك قلت ياخوي افزع الرجاجيل دخلوني ذا الملاهي وأنا ماجيت العب وراي رحلة لتورنتو (ذليتهم بتورنتو) وبتطير رحلتي وأنا مصكوك علي هنا ،، ضحك الأخ بقوة وقال تكفى لايسمعك أحد أنت الحين على متن رحلة الاماراتية اللي رايحة تورنتو قلت ياولد الأجواد بلى مسخرة وش الطيارة اللي ذا كبرها قال هاذي الايرباص الجديدة ،، قلت وين التفاتيش وين موظف الجوزات اللي يتميلح عليك وغصب تبتسم له ووين بوفيه ابوالجدايل اللي عصيره بعشرة وصاموليته بعشرين ،، قال هاذي دبي يابوي ،، المهم أعقل وأهجد ولاتفشلنا إن بغيت شيء نادني ولاتقول لأحد أنك سعودي ،، لاحول ولا قوة الا بالله يالله أن تهنيهم بديرتهم وبشركاتهم وبطياراتهم عز الله أنهم بنعمة الله يوفقهم
أوحيتني يامعالي المهندس خالد
وطول الرحلة خانقتني العبرة وذابحتني هالابتسامات اللي تكبب علي من كل جهة وكل ماحركت يدي الا ذيك المستورة كان اي هيلب يو سير ،، وصلنا تورنتو ودي أنهم باتلين للأسكيمو ماودي أنزل لكن الحمدلله حاجز معهم رجعة ورجعت وسوو معي نفس اللي سووه في الرحلة السابقة وهالمرة جلست بدبي 24 ساعة ورجعت للرياض ولزمت على الطيار يرقدون عندنا الليلة والامر هين ماهيب طايرة دبي وأعتذر وقال ان الطيارة تكلفهم بالوقفة بالمطار وعذرتهم ،،،، وقبل أطلع من عنده سألته سؤال قلت : هل طيارتكم تبنشر بكثرة ياكابتن قال لا نادراً ماتبنشر قلت طيب وش أزين كفرات برجستون والا ميشلان خابر لي ناس الله يعافينا ويعافيهم طياراتهم دايم مبنشرة ومبهذلتهم وأبنصحهم يركبون مثل كفراتكم
المهم رحت للبيت على طول ونمت ماودي أصحى من حلمي الرومانسي ،،، هذا ماحدث والحمدلله رحلة احلامي هاذي ماعاد ودي اركب اي طيران اخاف يتغير علي اللي شفته ،،، وبالنسبة لخطوطنا الله يعافيها ويشافيها ويجعل ماأصابها في ميزان حسناتنا حنا
أوحيتني يامعالي المهندس خالد
وللجميع تحيتي وتقديري
[/URL]
رد مع اقتباس
المشاركة الأصلية كتبت بواسطة الأغر
|| 
