قصة البطة الشجاعة والثعالب الاشرار
كان ياما كان
ولا يحلى الكلام الا بذكر النبى عليه الصلاة والسلام
كان فى بطة ذكية وشاطرة وشجاعة
ماشية بتلعب فى المزرعة
وفجأة 3 ثعالب أشرار خطفوها وحبسوها جوة القفص
بس عشان هما ثعالب أشرار مرضوش ياكلو مع بعض
وكل واحد كان عاوز يأكل البطة لوحده
وفضلو يتخانقوا
مين هياكل البطة فيهم؟؟؟؟؟
وبعدين اتفقوا مع بعض يعملو مسابقة
واللى يفوز هو اللى يأكل البطة
أول مرة قالو هنعمل مسابقة جرى
وقفوا كلهم على الخط وبدأت الصفارة
وجرى الثعالب الثلاثة
لكن الثعلب الأول عشان غشاش استخبى ورا شجرة واستناهم يجرو وبعدين عمل نفسه وصل قبلهم وهو اللى فاز
اكتشف التعلبين التانيين الخدعة وأصرو يلغو المسابقة ويعيدو من الأول
المرة دى عملو مسابقة نفخ البلالين
فضل الأول ينفخ ينفخ التانى ينفخ ينفخ والتالث ينفخ ينفخ
وكان التانى اشطر واحد فيهم فى النفخ بقت بلونته كبيييييييييرة وكان خلاص هيفوز بس عشان طماع فضل ينفخ اكتر واكتر واكتر وانفجرت بلونته وخسر المسابقة
واتخانقو تانى ولغو المسابقة
وقالو خلاص هنعمل اااااااااااخر مسابقة
اللى يفوز فيها بقى هو الكسبان اللى هياكل البطة لوحده
واتفقو كل واحد فيهم يملى الدلو بتاعه مية من البيرررررررر واللى يملى اكبر كمية مية ياكل البطة
نزل الثعلب الاول الدلو بتاعه جوة البير وفضل يشششششد ومعرفش يملى حاجة وجى الدور على الثعلب الثانى ونزل الدلو بتاعه وفضل يشد برضه معرفش والثعلب الثالث كان معاه مية جاهزة و نزل الدلو بتاعه جاهز بالمية ووقع الدلو بالحبل واكتشف اصحابه انه تعلب كذاااااااااب وخسرو كلهم المسابقة
وفى نفس الوقت ده كله كانت البطة الذكية الشجاعه القوية بتحفر الارض بمنقارها لحد ما عملت حفرة كبيييييييييرة تحت القفص وخرجت تجرى وقبل ما تجرى بصت للتعالب التلاته وقالت لهم انا اللى فزت انا اللى كسبت المسابقة
وفضلت تجرى لحد ما وصلت بيتها فى المزرعه وقعدت تحكى لاصحابها ازاى غلبت بذكائها وشجاعتها الثعالب الثلاثة اللى خسرو بسبب طمعهم وغشهم وكدبهم
|
 |
رد مع اقتباس