سلام علاكم
موضوعي اليوم ريحته " كشنه " تشق الخشم .. وتهيّض التسبد .. وتقرقع بالبطن !
يارب سترك من مصايب الأكل اللي ذبحتنا وخلتنا تقولون " فقمات " تمشي على الأرض .. !
إلا هو صحيح .. أن المجتمع الخليجي هو الوحيد اللي رجاجيلهم لهم " كروش " وحريمهم " مايعيشون إلا بشغّالات " .. تراي أسأل .. لاأحد يدفني أو يمد يده علي ويقول أنت تتهمنا يامُدمن !
البارح أنكبت على جوالي رسايل كوم .. رساله ورى اختها .. اللي تقول " يامُدمن قاطع رز ابو كاس .. ولاتشتري زكاتك منهم .. قاتلهم الله أنّا يؤفكون " .. ثم تجي أختها لازتها على طول تقول " يامُدمن حرام عليك .. لاتشتري رز أبو كاس .. قاطعه ولاعاد تاكل إلا أندومي " !
خويي راشد .. توّه طاقن له جوّال .. وماصدّق خبر إلا ويرسل رساله ( قاطع رز أبو كاس - قطع الله أذنه اليمنى - تراه راعي رسمي لإعلان طاش ) ... طيب أنت ياراشد كل يوم مرتزّن قدّام الشاشه بعد المغربيه تطالع فيها .. وتكرّها ضحك وهبال على خرابيطهم .. وين مقاطعك عنهم ياهالخبل الارفد !
أنا فتحت " فمي " نصف متر .. وقلت ياولد .. وش هالكلام .. هو صحيح " رز ابو كاس " سوّاها .. واعلن بطاش !
ثم عاد عوّد راشد مرتن ثانيه ورد يقول ( ياخوي مدمن تراي غلطان .. الراعي الرسمي صار : حفايظ بايسُن وزبايل فيمتو )
وشوي إلا وتصب مرتن ثانيه كومت رسايل .. من نفس المرسلين .. وبنفس الأرقام .. ولكن العِباره تختلف .. ومليانه اعتذار .. طيب وش تعتذرون عليه أصلاً .. أنا أصلاً ما أزكّي ... الوالد الله يخليه يزكي عني وعن الجماعه وعن الأسره الكريمه .. بعدين أنا وش دخلني .. لاني مالك الرز ولا حتى البطيخ ولاحتى سكورتي واقف على باب الشركه !
السؤال اللي يمصع بنفسه .. وينكم ياللي تطربقون بهالرسايل زي المخافيع عن قوله تعالى (( يا ايها الذين امنوا إن جاءكم فاسق بنبا فتبينوا ان تصيبوا قوما بجهالة فتصبحوا على ما فعلتم نادمين )) ؟
بعدين أنت ياراعي ( رز ابو كاس ) .. خل ماجاك هالمرّه يكون لك درس .. ولاعاد تعلن عند هالقنوات الفاسده ... اللي كلّها صليخ مليخ .. خاف ربّك .. وانضبط وانا اخوك !
سلام
منقول عن
:: مدمن شاهي ::
|
 |
رد مع اقتباس
مشاركة: رز أبو كاس راح فيها
