البرتقالة
في العراق تروح دوله والعوض في البرتقاله
والعرب تهتف وتصرخ برتقاله برتقالي
الإذاعه والمجالس برتقاله برتقاله
والجريده والمجله كل شيٍ برتقالي
إيه يابغداد راح المجد واركان الأصاله
مابقى الا بيت حزن فوقه غرابٍ يلالي
كم فقيدٍ تشتكي من حرقة المأتم عياله
وكم طريدٍ مابقى له لا حلال ولاعيالي
وكم عزيزٍ ذل من ذل الخيانه والعماله
وكم هوى عزٍٍ على ارض القادسيه كان عالي
وكم سجين في هوان المعتقل ميل ضلاله
وكم عثت شهب العلوج بقدر عسرين المنالِ
وكم شكت بنت الشرف من إنتهاكات الحثاله
وعبثوا في عرضها اللي ماعرف غيرالحلالي
عن فلسطين وعن الأقصى وابن عمه وخاله
عن خبر كابل وعن كشمير وابطال الجبالي
عن قروزني عن كسوفو أصبح التفكير داله
عن سجون قوانتنامو لاجواب ولاسؤالِ
عن قضايانا نسينا يوم جات (البرتقاله)!
والدم المسلم يسيح وصار لونه (برتقالي)!
برتقاله عذبت حاله وهو ماهو لحاله
عذبت حال العرب كل العرب باول وتالي
ياعرب هذا الرضا والتفرجه أكبر دلاله
إن عصر العز راح وراحت عصور الرجالي
ياعرب هذا نداي لكل واحد في مجاله
بالمشارق والمغارب بالجنوب وبالشمالي
للولد والشيخ واصحاب الهدايه والضلاله
للقبايل والحمايل باليمين وبالشمالي
ياصل اهل الراي واهل المعرفه واهل الجهاله
للفقير وللغني واهل المزارع والجمالي
والندا يمتد لاصحاب الفخامه والجلاله
للأمير وللوزير وللسماحه والمعالي
إرجعوا لله والدين نتمسك في حباله
في كيان ( إياك نعبد) لانزوغ ولانبالي
وحدوا الكلمه على أمر الله ثم راي العداله
واتركوا درب العصايه والغوايه والضلالي
وقتها نرفع بيارق عزنا باعلى جباله
والمدايد من مدد رب الجلاله والجلالي
يا عرب جرح الأسى والغبن والحسرات ماله
غير شرع الله والقرآن لو طال المطالي
قلتها وانا الذي يشكي على مولاه حاله
لاني بكامل ولامعصوم .لله الكمالي
لكن اهدافي وهمي اكبر من البرتقاله
لا ولا صارت مزاجاتي وذوقي برتقالي
خالد الزهيري
|
 |
رد مع اقتباس