يالـمـعـرفـه يــامــا سـعـيــت =
ادّورك وانــــــت شــــــرود =
امشي واصوت بالحياة ... يامن لقيت الذاهبه =
دخــلــت ادور كــــل بــيــت =
وظــهـــرت ادوج بـالـنّــفــود =
واسأل مراكيب الزّمان ... الشارقه والغاربه =
ولـســاري النّـجـمـه ســريــت =
لــعــل نـجـمـاتـي تــجـــودْ =
يا شاهدةْ سرّ الزمان .. عطيني سرّ الغايبـه =
سـافــرت لـلـبـعـد ومـشـيــت =
اتــبــع فـوانـيــس الــوجــود =
وازور واحات القلم . عند العجم والعاربـه =
عـــوّدت لـلـحــرف وقــريــت =
أبــــي مــــن الـكـلـمـه ردود =
لقيت كتّاب الفـلاه .تطـرد نيـاقٍ هاربـه =
يالمـعـرفـه دونــــك غــديــت =
واحـــد مـــن فـوقــه حـــدود =
والمدّعين المعرفه ... أجهل من اللي طالبـه =
أبـعـد مـــن أيـامــي مـشـيـت =
والـحـمـل بـالـكـاهِـل يــــزودْ =
رِجلٍ تورّدني خطر ... ورِجلٍ تأخر هايبه =
لله تــوجّــهــت ودْعـــيـــت =
الـخـالــق الــفــرد الــــودود =
يدّلني درْب الرشـاد..درْب العبـاد التايبـه =