خذني قلم وأكتبي اللي تريده=بالجيب وألا حطني بين أناملك
وأكتبي أسرار الغرام البعيده=وسجل بي أعظم مملكة عالم الفلك
الحبر دمي وأنتي أغلى قصيدة=فلينسجم حبر القلم مع تواصلك
ولتبتدي معك الحياة الجديدة=تلك الحياة اللي عن الناس تشغلك
أما شقى وألا حياة سعيدة=هذا هو اللي يتضح من تعاملك
قالت خطاك اللي حصل لا تعيده=دام إفتراضك واضحٍ ما نجاملك
قلت ارحميني وأنتي المستفيده=رحمة من الخالق وشيٍ من الملك
قالت حقيقة ما درست العقيدة=وأسرارها اللي بالحقايق تهولك
قلت الحديث المنتحي لا تزيده=ما جيت في فتوى المشايخ منازلك
أنا مرامي فيك وأنت رصيده=يخصني موضوع واحد ويشملك
قالت تجيد النطق والله تجيده=أنت تحاولني وأنا كيف أحاولك
لكن ترى قرب العذارى مكيدة=من عقب ما أنت بخير تكثر مشاغلك
قلت الصحيح إن التجارب مفيدة= خليني أدخل عالمك وأتوهلك
قالت ذنوب المجتمع بالجريدة=أقرأ الجرايد للحقايق توصلك
كم واحدٍ صارت حياته زهيدة=عقب السعادة راح في عالم الهلك
قلت البشر فيهم صفاتٍ حميدة=ما كل من حبك مرامه يذللك
قالت بعيد وشاردٍ ما تصيده=يا ويت تلقى وحدةٍ ما تجادلك
قلت الله أعلم في سراير عبيده=بعض النساء كالعنكبوته على السلك
قالت كلامك قيد الحال قيده=تراي والله عاجزة لا تحملك
يمكن تجيك من العذارى وحيدة=تموت ما تقدر تغلى وتزعلك
لو إن مثل البنت هذي فريدة=حيث إنها لو شافتك ما تغازلك
لكن أنا بنصحك ما كل صيده=في ملتقى كل الحبايب تجملك
الرابح اللي يمشي الدرب سيده=ترى اقترابك للغنادير يذهلك
خلك عزوبي لا تجي للمصيده=تكفيك عن شر العذارى مشاغلك




للشاعر/ جوهر الحربي

منقول مع خلص الود,,,