أنا راسي .........ما بين هواك
ألّفت عشرين ألف بيت
سبعين قصيدة مؤسسة
شان أقدر الفت إنتباها ومرة أقدر أحسسه
يا حلوة يا بت ....... هندسة
يا حلوة يا زينة البنات
يا نجمة الليل والمسا
أنا رغم أشكال الشتات
حاضن عواطفك وحارسه
أنا في هواك بقيت فتاة
ودخلت عشرين مدرسة
.............
خطواتي دايما بالغلط
وأموري دي معكسة
يوم داك مسا ساهر في الهدوم وكويتها
وجيت عشان البسا
لقيتها الصباح حقة أخوي
وهدومي قاعدة مكرفسة
وهذه تكملة المعلقة السودانية العظيمة
قال لا الهدوم ما مشكلة
بشوف لي أي مصيبة ألبسا
لكن هواك أعمل له إيه
دشدش عظامي وهرسه
دار لي فرصة أكون قريب
طبلة قليبك أفلسا
عشان تشوفي هواكي كيف بهدل عواطفي ودعفسا
كلماتي ليك اتبشدنت
ما زي زمان متهندزة
حتى الشعر الكان زمان كلماته حلوة ومملسة
هسه اتلخم بقا كيف كدا
ما فيهو كلمة مهندسة
وإنتي السبب
إنتي السبب في كل دا
يا أحلى أسباب الأسى
أنا يا أخت بريدك . . أعمل إيه
وريني يا بنت هندسة
أمشي وأقورك في الزلط
يا ناس بريد بت هندسة
يا ناس بريد بت هندسة
كم مرة أقول أقوم براي أقعد معاها واحدسا
لكني ما بقدر عديل ما بقدر أنظم أونسا
خليك من اشرح ليها حالي وحبي ليك والدبرسة
ويا هناية داير اقليك كلام . . أصله السكوت فيهو وسوسة
أنا يا ملاك أنا بعشقك وما اظن بلاك أرجا المسا
دايرك تكوني لي حبيبة وأبقى ليك حبيب كسا
اكسيك هواي وتلبسيني نعيم هواك وأجمل كسا
ويا رب كل عاشق نبيل تديهو زي بت هندسة
وترعاها من عين الحسود ومن توب جمالك لبسا
ويا رب تحفظا لي براي يا رب تحفظها تحرسا
ويا رب تحفظها تحرسا
يا رب تحفظها تحرسا
..................
والله ضحكت من قلب
الله يسعدك يا أبو حسين
|
 |
رد مع اقتباس