الخروف واقف مع صاحبه وأنت رايح تشوفه وتنطط فيه وحوله دوشة واطفال يشدوا فيه يمين وشمال طبعا هو زهق كل دا توتر.
عاوز تعرف عمره ؟؟
الخروف عند عمر سنة بيغير السنتين الأماميتين السفليتين علشان مفيش فوق زيهم وعند عمر سنتين بيغير السنتين اللي بعدهم السفليتين برضه بس علشان مفيش فوق أسنان
البقرة عند عمر 6 شهور بيطلع لها الضرس الرابع وعند عمر سنة بيطلع لها الضرس الخامس وعند عمر سنتين بتغير السنتين الأماميتين السفليتين علشان مفيش فوق زيهم
بعد ما نطط الخروف علشان تشوف تنفسه عامل إزاي !
وبرضه ممكن تشتريه مريض بمرض تنفسي ودفعت فلوسه هتنقله
النقل:
معظم الناس بيستخدموا عربة ربع نقل على الأقل في مصر
طبعا دا توتر ما بعده توتر الخروف ولا البقرة واقفة الهواء بيضرب فيها طول الطريق وصوت الكلاكسات والسيارات تقرب منها جدا وكل شوية السواق الشاطر يفرمل بقوة وهما مستحملين الهم دا كله
تيجي أنت وتكمل عليهم وتكون شاري مثلا كام خروف مع كام بقرة لك وللأهل طبعا واقفين في العربة بأي نظام مش مهم ويخبطوا في بعض وياسلام لو حد عنده قرون علشان الأطفال يلعبوا بيه شوية يروح ناطح واحد جنبه أثناء النقل من النرفزة ... وتبقي مبسوط أنك اشتريت خروف من أسوان وأنت مثلا ساكن في السلوم ....
المفروض الحيوان ينقل في مكان مغلق لكنه بيوفر الهواء المستمر في مجموعات متشابهة يعني بقر فقط أو خراف ويكون معها شخص ياخد باله منها طول الطريق وتقف بحيث تكون الرؤوس في اتجاه واحد والذيول في الاتجاه المقابل وتكون الرحلة قصيرة قدر المستطاع علشان نقلل ممن كمية الفقد في الوزن والقرون ممكن تسبب مشاكل في اللحم بعد الذبح
الحمل:
سواء في السوق أو لما يوصل كل الناس بتعمل أيه مع الخروف بتشده من رجله ... في حد بيعمل غير كده لأ.. كأنه واحد صاحبه هياخده على جنب ويكلمه ..ربنا خلقه يمشي على أربع إزاي هيمشي على 3 أو 2
الصح: الخروف يتشال بحيث الذراع اليسرى حول القبة واليمنى حول الظهر و تمسك اليد اليمنى بمنطقة البطن والركبة للدعم
النظافة:
أيوة، معظم الخراف في الوقت دا بتكون قصة صوفها لكن لو في أي شيء عالق فيها يفضل إنك تشيله ولو بقرة ممكن تمشطتها بفرشاة زي فرشاة البلاط... فاكرين لما كنت بقول الرعاية للأطفال مش هى التربية مش كون ابني نظيف يبقى أنا مربياه كويس؟
نكمل... ليه النظافة مهمة علشان لما يذبح القاذورات لا تلامس اللحم وتلوثه وأحنا ناكله
الأكل والشرب:
في ناس بتقعد تأكل في الخروف من أول مايجي لحد وقت الذبح ودا غلط كبير جدا
الخروف يأكل مرتين في اليوم لو هيقعد عندك أكتر من 12 ساعة وقبل الذبح ب12 ساعة يصوم عن الأكل والشرب
مهم جدا وقت الأكل والشرب نوفر ماء كثير جدا علشان يساعد على خروج أكبر كمية من البكتيريا ويسهل عملية السلخ وخروج الدم واللحمة يكون لونها أحمر فاتح جميل
الأكل مهم علشان التوتر اللي حصل طول الطريق يقدر يعوضه ولو حصل فقد في الوزن يعوضه ودا أكيد وبيزود نسبة التصافي يعني اللحمة الناتجة بعد الذبح
الراحة:
مهمة جدا جدا جدا الخروف لو اتخانق طول الطريق مع حيوانات أخرى محتاج من2-3 أيام علشان يرجع زي ماكان
عدم الراحة ممكن تؤدي إلى رائحة كريهة وتغير في لون اللحم في المناطق الغنية باللحم زي منطقة الفخد
حاجة أخيرة لما يكون الخروف أو البقرة مخبوطة وعمل بقعة تحت الجلد استنوا شوية عليه علشان بتأثر على مذاق اللحم واللون ونسبة التصافي
رأيي الأفضل يتم شراء الخروف قبلها على الأقل ب3 أيام.. وبلاش يلعب معاه الأطفال هو لم يخلق للركوب ولكن للأكل وهناك فرق
