على طاري السيارات

والله اليوم طلعت من البيت بعد العصر لقيت سيارتي الداتسن مصدومة في الباب صدمة قوية
مين صدمها الله اعلم

وقبلها كسر قزاز الفورد الأمامي

وقبل فترة كسر القزاز حق باب السائق للفان ولقيت الاسلاك حق السويش مفصلة وربك ستر ماسرقوها.

وفي إجازة رمضان اللي فات جانا ضيف من المدينة المنورة وكانت سيارتة كورولا آخر موديل ومن اول ليلة كسروا المثلث اللي في القزاز الخلفي وشلحوا المسجيل وامخبعه ناسي جواله على المرتبة ومع التعب والارهاق من السفر نام ولا تذكر جواله ولهطوه الله لا بارك فيهم


الحاصل ان السرقات في الرياض كلن تعرض لها
وغير كذا بيوت
قسم بالله سافرت الديرة عام 1424هـ للعيد ورجعت بعد العيد لقيت باب الشقة مفتوح وعفش البيت كله مسروق حتى الفرشات والملابس شلحوها.
رحت وسويت بلاغ ونصحوني اروح حراج بن قاسم يمكن اصادف التلفزيونات ولا المكيفات ولا الثلاجة او اي قطعة من العفش واخذت لي اسبوع تقريبا ونا كل يوم العصر في الحراج وكل شوي اصدم واحد ونا اتلفت يمين وشمال حتى عزيت.


الملفت للنظر ان اغلب اللي يقومون بالسرقات اعمارهم لاتتجاوز العشرين.





شكرا فراس .