الله يعين أقبل علي هاجس الصيف = وشلون أبسلى وأنت بكره مسافر
يا شينها سفره نوت تزعج الكيف = واللي نجا من جورها ألف ظافر
ليتك قبل سفرتك خليت لي طيف = طيف يسليني ولا وجه سافر
ضاق الفضاء ما ضمني بر أو سيف = وأصبحت من كل الوناسات نافر
قصة غلانا مابها كذب أو زيف = وما بيننا فوق العتب والتنافر
قصة تجلت فوق كل التواصيف = أعيذها من كل حاسد وكافر
هذي رساله دون حبر ومضاريف = آهات قلب منيته ما تسافر