فوق الجروح اللي بقلبي من سنين
يكفـي دخيـل الله لا تجرحونـي
مادامكم ما انتم لجرحي مداوييـن
انسوا وجودي بينكـم واتركونـي
وش من عذابي والعناء مستفيدين
وش مصلحتكم يوم تبكي عيونـي
اللي بقلبي من شقا العمر كافيـن
واللي بعيني شفت زود الجنونـي
ماني بـناقص زود بله على الطين
با العكس انا محتاج قلبٍ حنونـي
يا اهل القلوب القاسيه ويش ناوين
اكثر من اللي صار صعبٍ يكونـي
انشدكم الرحمه وانشدكـم الليـن
لوجه رب البيت بـس اعتقونـي