بسم الله الرحمن الرحيم
السلام عليكم ورحمة الله وبركاته
قبل ان ابدأ احب وللامانه ان اشكر اخي الكريم والمميز ابو رياض لمساعدته لي فوالله ان كلامه كان بمثابة اساسيات افتتحت بها طريقي للاصلاح,, شكرا من اعماقي وانتظر فزعاتك يالذيب,,
ذهبت انا والزوج الى اهله اللي هم ابوه وامه وجلسنا وعلى طول انفلت الاب يبكي((القحم)) وكان حاس بالندم لانه طاوع الزوجه على ولده وقبل حتى مانبدأ في الكلام بعد ماسلم الزوج عليهم قال الاب سامحني ياولدي
وقعد يبكي وحط اللوم عالعجوز اللي بكل صراحه للان وهي واقفه مع زوجة ولدها وبنت اختها في نفس الوقت ,, خرج الاب وبقيت ام الزوج وحلف وقسم بانه ماضربها وانه ماكان سكران وانه كل هذا كان كيد من زوجته
واعترف انه غلط في حق زوجته وعياله ولكن اللي سوته زوجته اكبر من غلطه وواضح انه مغبون من ذهاب زوجته الى قسم الشرطه وبصراحه حتى انا حسيت انه زوجته بالغت في الموضوع وفضحت الرجال عند الضابط
وقدام اولاده وهذا الشي لين قلب امه شوي ,, ووالله ان امه حلفت لي انه بار فيهم ولاعمره اذاهم ولكن اللي سواه في عياله خلاها تسوي كذا على حد قوله وبحكم سيطرتها على البيت وعلى القحم الضعيف
وقاعده تبرر لي بانها ما غلطت لانه مافي طريقه ثانيه لمنعه وردعه الا هذي الطريقه,, سالتها في ذمتها انها شافته يضربها ولا اي شي يدل على انه كلام زوجته صحيح اجابتني بانها ماشافت شي وان زوجته وعياله مايكذبون,,
الحين وقبل ساعه عاهدني الزوج بانه ماعاد راح يسافر ابدا ولا راح يمد يده على زوجته مهما كان وكتب تعهد بخط يده وواضح الندم في تصرفاته ولكني متاكد بانه مغبون من اللي سوته زوجته لان معاملته ارتفعت
لهيئة التحقيق والادعاء العام يعني بصراحه ((خمد)) الله يعينه حد المسكر في ظهره اكيد بس مادري وش بيصير له في قضية زوجته واهله علما باني اخذتهم للقسم وتنازلو جميعا عنه بشرط عدم سفره مره اخرى
الحين الزوج مسكني قبل شوي ودخلنا بيته واصلحنا بينهم بعد حوار صدع راسي وقعدت معاه وقعد يبكي ويقول انا خلاص بتعدل وغلطت واخذت اكثر من جزائي بس هي قهرتني وانا بنسى كل اللي صار بس كيف انسى دخلت بنتي الكبيره
وولدي للقسم وسماع كل انواع الكلام البذيء عني ورؤيتهم لي وانا في اخس احوالي وهذا الشي بيتعبني نفسيا,,انتهى كلامه.. بصراحه من جد الحركه هذي تقهر مهما كان من المفروض مايتدخلون الاطفال كيف بينظرون لابوهم
اللي سمعوا عنه اخس الكلمات واسوأ الصفات ورأوه في احقر مكان,, ماعرفت ارد عليه الا انه ينام ويريح وبعد الفطور لنا جلسه وخرجت من عنده ودخلت على زوجته وبعد تهزيء صراحه قهرتني بحركتها ليش تدخل عيالها داخل
عند الضابط وتسمعهم كل الكلام اللي انقال فكانت في البدايه ندمانه وبعدين رجعت عن ندمها بحجة انها كانت مشوشه وماهي عارفه تتصرف وبانها خايفه منه ولكني طمنتها بانه بيتغير وهذي المشكله انا متاكد انها سبب تغيره
لكن في قرارة نفسي لست متاكد هل للاسوأ او للاحسن ’’ الاسبوع هذا يبان كل شي,, الحين الامور هديت بكثير عن اول وبصراحه انا معه اكثر من اني مع زوجته لانه محتاج توجيه هذا اولا وثانيا احساسه بالغلط برغم المبالغه
في تاديبه وثالثا قهره على عياله واللي صار وكيف بتكون نظرتهم له.. اسال الله ان يهديه وان ينسيه كل مامضى وان يهدي سرهم ويهدي نفوسهم والله انهم يحبون بعض بس بعد اللي صار مدري كيف الحب بيكون انشالله يستمر..
وفي الاخير احب اشكر اللي دمج المواضيع مع بعض عجبتني الفكره واحب اشكر كل اللي حاب يساعد برأي او بفكره او بنصيحه..
واسال الله ان يحرم وجيهكم عن النار..
وبانتظار اخبار جديده وجميله منهم الليله ولكن الاهم من هذا يجب ان ينسى الزوج دخول اطفاله الى القسم لكي يستطيع السيطره على اعصابه وعلى سفينته لانه هو بعد الله وليهم في هذي الحياه وقائدهم
وايضا لكي نستطيع مد المساعده لهم فكل الامور ترتكز عليه الان وانا مهتم به اكثر من الزوجه واكثر من الاهل لانهم كلهم منتظرين ردة فعله وخايفين ,, هذا اللي شفته في عيونهم وحسيته من كلامهم .
واسف جدا على شطحتي بهذا الموضوع لكن وجدت فائده في طرحه ومتاكد باني ساجد فوائد اكثر ومتاكد بان الله معي في طريقي لاصلاح هذه العائله الجميله واسال الله ان يجعل عملي هذا خالصا لوجهه الكريم...
بحفظ الله ورعايته...