الليل موحش والزوايا كراكيب
والدار عتمه والكراسي مخيفه
بسمات وقتي بالشفايا معاطيب
والحزن خيله بالمحاني مريفه
والفكر سجاته توديه وتجيب
بين الرجاء والياس روح خريفه
وين انت ياسيد البنات الرعابيب
ياللي عن عيوني وحضني منيفه
ليه الهجر قولي وقطع المناديب
وانت الوليف اللي عشقني وليفه
ماكان بالحسبان وظمن التراتيب
ترضى على قلبي الجروح الكليفه
يامشعل ن ليل الغياب بلواهيب
نيران تاكل في ظلوعي النحيفه
ياهيه ياعذب اللمي والمشاريب
ارفق على من عاف بعدك رغيفه
إن كان عينك تهتني النوم واشيب
من صارت عيونه بعدكم كفيفه
ياغايتي من دنية الود والطيب
وين الأماني الطاهرات العفيفه
لاتعيشيني بعد الأيام ترهيب
غيابك اللي سل بالصدر سيفه
ولايخدعونك بالحسد والأكاذيب
وانت الذي تخبر بصدقي وزيفه
وتخبر بما تخفي زوايا وسراديب
قلب ن غديتي لب فكره وطيفه
واجمل واحلا فاتنه في محاريب
شخص ن ملكتي كل ذوقه وكيفه
تكفين هقوت عاشقك فيك لاتخيب
صوت الغياب ازعج هدوئي حفيفه
إن كان تبغها حقوق ومطاليب
حقي على روس الخلايق رفيفه
وإن كان عادات وسلوم ومواجيب
بعض العلوم الهرج فيها كسيفه
ياهيه اضنك تخبري زين مانيب
عاجز ادور ياملاكي وصيفه
قالو اعترافك بالخطا عز موعيب
العيب تكبير الأمور السخيفه
وترك الزعل يابنت يسعا لتخريب
كل ما بنينا بيننا بالنصيفه
ليتك سعيتي لبعض الأراء تقريب
ولقاصدن شوفك غديتي مضيفه
ياهيه كل ن له ضروس ومخاليب
لاشك مالي و العقول الخفيفه
اقول تكفي ظن مغليك لايخيب
هجرك بليا اسباب مااطيق صيفه
مافي الغلا والعشق يازين تثريب
لاشك كوني لاحكمتي لطيفه
|
 |
رد مع اقتباس
المشاركة الأصلية كتبت بواسطة عبده حكمي
