والله هذا المشكلة عايشتها مع أحد طلابي الصغار في مدينة الخرج .

الطالب كان اسمه (نابي) أي مرتفع . وكان كثيرالغياب فاستدعيت والده .
وسألته عن سبب الغياب وقال لي ضاحكاً هو متعقد من اسمه ويقول مايحبه .

قلت بالله عليك وتضحك بعد ...

طيب غير اسمه وخل عنك .....قال مستحيل هذا جده اللي مسميه .

ومدري وش سوى فيه غيره ولا باقي.

لكن أنا سألت أحد شياب البدو هناك وقلت ليش هذي الأسماء الغريبة .
مثل (شخبوط) وهذا اسم شخص عزيز لحد يضحك .

قال ياولدي زمان كنا نسمي علشان القبايل الأخرى وقت الغزو تهاب رجالنا .
لأنهم يسألون من هم فرسان القبيلة قبل الإغارة عليهم .

فإذا قالوا فرسانهم ....شالح ....وذيب ....و شليويح .....ونمر .

العدو يضرب ألف حساب قبل الإغارة على القبيلة لسلب الحلال .

أما إذا قالوا الفرسان .....هيثم ......ورامي ....وفؤاد ....وعبادي
عزالله جتهم في ربع ساعة وشالوا الحلال وحتى الخيام