ما لقي أبو زيد حيله أو أي طريقه يتخلص منها من العلام
راح واستشار عجوز طاعنه في السن وقال لها انه بيقتل العلام حتى لو خالف عهده
قالت العجوز لا تقتله لكن اعقر فرسه ( يعني اقتلها ) إذا كثروا الفرسان من حوله لان العهد اللي بينكم أنكم ما تقتلون بعض ولا تعاهدوا على الخيل وإذا طاح بين الفرسان استطاعوا قتله
بدأت المعركة في اليوم الثاني وكان هدف أبو زيد قتل فرس العلام وكان ينتظر إن يكثروا من حوله الفرسان وفعلا عندما اشتبكوا وكثر من حوله الفرسان ضرب أبو زيد فرس العلام وقتلها قال العلام لابو زيد
أبا زيد بقت العهد الذين بيننا *** تبوق عهد الله يالغدار
قال أبو زيد
لك الله يا لعلام ماني ببايق *** ما بيننا والسابقات جوار
قال العلام
ابازيد جرني سبق الخيل جنني *** عليها حماقا يدعون بثار
قال أبو زيد
لك الله يالعلام ماني بشيخهم *** قدمي كبار ومقتفين صغار
قال العلام
خذ السيف والدبوس مني هديه *** قدام لا اذبح يوخذن جهار
قال أبو زيد
اهب يالعلام ما اقوى باسك *** لو هي بغيرك كان عقله طار
قال العلام
والله يا لو به مدفع ما لحقتني *** لو رف مهرك بالجناح وطار
ولو دامت العباد تقرا مصاحف *** يوم(ن) دنا ما زودوه نهار
مااااااااااااااااااااااات العلام
بعد موت العلام استولى بني هلال على كل شي حتى على ديار بني قابس وصارت السلطة لهم والأمر لهم وقد قال أبو زيد قصيده يذكر فيها أهم الإحداث من يوم ما أرسل إلى إن استتب لهم الأمر يقول أبو زيد
يقالـوا تقـدم يا سلامـه فـلا هـفـا*** مقامك يـا ذيـب السرايـا الدواهـم
قـول أبو زيـد الهلالـي سلامـه*** قلبـي لعبـا بيـن شـاري وسـايـم
قالـوا تقـدم يا سلامـه فـلا هـفـا*** مقامك يـا ذيـب السرايـا الدواهـم
طلبت الفتى يحيى ومرعـي ويونـس***ولا غيـر هـذا ولا رفيـق يـوالـم
دعيتهـم والـكـل دنــا قلـوصـه*** دعيتهـم ثـم احـرمـوا بالمـحـارم
سـرنا بـلـيـل بـه ق،ليـل نجومـه*** مغلنطـس والجـدي بالجـو حـايـم
سرنـا لمـا قالـوا الربـع كلـهـم*** زهابنـا كـمـل حــذات الذمـايـم
قلت ابشروا ثـم ابشـروا ثـم ابشـروا*** بعـز ورد كـل يـوم يوالـم
سرنـا مـع الحـرات تسعيـن ليلـه***نقـود ا لطوعـات خلـف الجهايـم
وردنا بها تسعيـن عيـن غزيرة*** ولا أسقانا عقـب الفـلا للبهـايـم
سرنـا علـى اللـي بالقـا واعديينـا***على شيخنـا غاديـن مثـل العلايـم
عزلنـا لهـم تسعيـن ألف مـدرع***من أهل عزوتي وأهل الوفى والعزائم
ضـربـنا بتهـم ضرب بدوس وهمه*** كـز العوالـي والسيـوف الصيـارم
تبك الصفيرا عبـرة بعـد عبـره***تزيـد علـى ماقيـل آه وهـايـم
وقال ابـن سرحـان عليهـا مجـوره***حـرام عليهـا مالغيـري تلايـم
قـال ذيـاب بـدلـوا ذا بـغـيـره***انا شوقها انـا ستـر قـان الرقايـم
كثـرت مـن هـذا وكثـرت مثـلـه***وطال العيا بينـي وبيـن بن غانـم
ولا يــد إلا ويــد الله فـوقـهـا***ولا ظـالـم إلا ويبـلـى بـظـالـم
وأعمارنا راحـت نـداري زماننـا***ولا خير في عمـر مـداره دايـم
ولا خير في عمـر الفتـى وحياتـه***ليا عـاد مـا تكثـر عليـه الجرائـم
لك الله مـا ذقـنـا بنجـد طرابـه***حذا العيـد اوحـذا ليـال الصرايـم
يا نجـد لـو إن الجفـى منـك مـره***صبرنـا لكـن الجفـى منـك دايـم
يا نجد وان جاك الحيا فأرسلي لنـا***مع الطير وإلا مـع هبـوب النسايـم
يـا نجد وان جاك الحيا فاصعقـي لنـا***بصوت رفـيـع موقـض كل نايـم
سرنـا خـلا العـد تسعيـن ليـلـه*** ليا دار قوم مـن كـبـار العـمايـم
في هذا الوقت طاح المطر على الجزيرة العربية وتأخر أبو زيد ما رجع لعليا وأرسلت له قصيده تسأله عن أسباب غيبته وان المطر نزل على ديارهم في نجد ووقتها كانت عليا في ببشة تقول عليا
يا ركب اللي مـن عقيـلٍ تقللـوا***على ضمرٍ شروى الحنايا نحايل
أبا أوصيكم وصاةٍ ما تثقّل ركابكم*** خفيفة على راعي الثنا والجمايل
واليا لفيتو لأهلكم عقـب غربـه*** متغبطينٍ فـي بطـون الحلايـل
فقولوا لبو زيـد إنّ بغانـي بغيتـه*** وأنّ دوّر البـدلا لقينـا البدايـل
والله لولا البحـر بينـي وبينـه***جيته على وجناّ من الهجن حايل
أبا زيد غرّات الصبـا لاتغـرّك***ترى الهجن خيرٍ بالسرا والقوايل
نجبت أخضـر مايـزرر ثيابـه***هبيل يلعـب بالقلـوب الهبايـل
بالشتا عليك من الهجن سمرغيّـه***وبالقيظ دوّر من كبـار الشمايـل
غزاليّـة المقـدم جماليّـة القفـا***عليكم بهـا ياراكبيـن الرحايـل
أبا زيد لوّ انّ النسا تركب النضا***جيتك على وجناّ من الجيش حايل
لكن صريخ الكور حدري وفوقها***صريخ القطا في محكمات الحبايل
أبا زيد تنساني وتنسـى جمايلـي***الله أكبـر يانـكـور الجمـايـل
نسيت يوم إن عرقات الارطا بيننا***يوم إن جعدي فوق متنيك مايـل
ويوم وصلت الرساله لابوزيد ركب ذلوله وتوجه لبيشه اول ما وصل وشاف عليا عرفها وقبل ما تعرفه ويوم تعرفت عليه استغربت من شكله متغير وقالت له
وراك يا ابوزيد غاد شايب *** شايب ومشهوهب وكنك ذيب
انا اشهد إن البعد ما يهم طيب *** ولا هو على جزل الرجال صعيب
قال أبو زيد
بلا من هجرك ومن غربة النيا *** ومن نوبتن تزمي وهذيك تهيب
اهـلـك بـالوديان وديان بيشة*** وأهلي شمال الشمس يوم تغيب
انتهى الجزء الرابع وانتظرونا في الجزء الخامس وسيكون عن بعض ما قالوه الكتاب والمؤرخون عن بني هلال
المراجع هي:
1- الروايات الشعبة التي كانت تروى لنا من كبار السن بمنطقتنا
2 - سيرة بنى هلال الشامية الأصلية، وهى تشتمل على ستة وأربعين جزءا. ملتزم الطبع عبد الحميد احمد حنفي/القاهرة ط 1 / 1948
3 - سيرة بنى هلال, مكتبة كرم ومطبعتها بدمشق "دون تاريخ ".
4 - تغريبة بنى هلال ورحيلهم إلى بلاد الغرب وحروبهم مع الزناتى خليفة... تحتوى على أثنى عشر جزءا: مكتبة ومطبعة محمد على صبيح وأولاده / القاهرة "بدون تاريخ.
5 - تغريبة بنى هلال ورحيلهم إلى بلاد الغرب وحروبهم مع الزناتى خليفة... المكتبة الشعبية / بيروت (د. ت .
6 - تغريبة بنى هلال ورحيلهم إلى بلاد الغرب, وهى ستة وعشرون جزءا مطبوعة مكتبة محمد المهاينى، دمشق 0
7- الشبكة العنكبوتية(منتديات) ودراسات
رد مع اقتباس