ينام الليل في عينك

[جبلية]

سواد الليل في عينك وخدّك به شعاع الشمس=يميل الظل من خدك ورمشك للعيون ظلال

على حد الحسام اللي برز ما بين لليلٍ غِلس=وقف خيطٍ مع البرقع يميّز ليلك القتال

تبعثر في الهوى أهله وتفرض في دروسه درس=تعلمهم فنون الحب وكيف إن الغلا أشكال

تحاول تسلبه قلبي تسوق خيولها والفرس=تظن إني مثل أهل الهوى دايم لهم تغتال

أنا يا بنت غير أعلى مكانٍ في الحشا ما مس=على حب العذارى فارس ولقلوبهن خيال

فلا تغتر في حسنك وأنظر في جمال النفس=قبل لا تطغي غرورك تأكد هالحلا زوّال

انا يا صاحبي عيني تناظر في الهوى وتحس=وتعرف من يصافي الود ومنهو للصفا ما نال

وفكري هاديٍ راكد ثقيل ويكشف المندس=ويصرفني عن عيونٍ تدور في الهوى منزال

وانا يا بنت لي قلبٍ عنيدٍ دايمٍ لي حرس=ولا يعشق سوى النادر بعد صبرٍ وطولت بال

وشفّي ضاميٍ للي هجرته غصب عني بس=وداده باقيٍ بين الحنايا والحشا لا زال

بقربه ينتثر فكرٍ تلمّه من شفاه الهمس=وبعده كم يغيرني من أزين حال لأشين حال

وحبّه ساكنٍ بالجوف راسي كالجبال الرس=رغم بعد السنين اللي قساها ضيّق الاحوال

سنين العمر لو طالت حبيبي قربكم في إنس=يكّحل زولك عيوني لها شوفك دوا وكحال

على عهده أنا باقي ويشهد حاضري والأمس=أصون العهد ما خونه ولو يكثر لغا العذال

وانا يا بنت يوم أوصف جمالك والعيون النعس=مجرد وصف وأحذر لا تصدق كل ما ينقال

على ظل الرموش اللي تظّلك من شعاع الشمس=ينام الليل في عينك ... وعينك ليلها قتّال


للشاعر الذيب

[عبدالله الحلوي]

سواد الليل في عينك وخدّك به شعاع الشمس=يميل الظل من خدك ورمشك للعيون ظلال

جبلية تصوير رائع جدا وافتتان خيالي بعين المها واحساس راقي ينبع من جنون مشرق على اعين الجمال

فلا تغتر في حسنك وأنظر في جمال النفس=قبل لا تطغي غرورك تأكد هالحلا زوّال

دوام الحال من المحال


جبلية شكرا من الاعماق على هذه المعزوفة


ننتظر الجديد


مع حبي
القبس