موضوع مررره قاهرني
بسم الله الرحمن الرحيم
السلام عليكم ورحمة الله وبركاته...وبعد
بصراحة في موضوع مره قاهرني ورافع ضغطي...
وهو موضوع لبس العبايات؟؟!!((لاتخافون ماادعو للتحرر))..
المشكله هي اني كنت ذاهب الى احد الاسواق الكبيره في الرياض((هايبر بنده))..
دخلت السوق واتجهت فورا لقسم الخضار..وقفت امامي فتاة عمرها مابين 25 الى 30 سنه
ومعها زوجها..المهم ان البنت هذي سابت العربيه وتولى القيادة الحمش اللي معاها..
واهتمت هي بشد عبايتها بكل ماتستطيع من قوة((لا تقولوا هذا عينه طويله))
والله العظيم انا منذهل من جرأت هذه البنت((ماادري وش تحس فيه))..اللي زاد الطين بله
ان السوق مزدحم نسبيا وخاصة في هذا القسم..وصارت ملفته جدا وكل اللي في السوق حاطين
يديهم في الخضره وعيونهم يسار((راحوا فيها))بما فيهم العمال والرجال وحتى الحريم بصراحة
قاموا يتخافتون ويأشرون عليها..لا..ازيدكم من الشعر بيت:ثبتت العباية باليسار ودنقت تدور باليمين
على شي داخل العربية يعني بالعربي((شوفووووني..جنيفر لوبز))..المهم جاء واحد ضحية
العشق والهيام((لاتخافون مو أنا)) رايح جاي سوى طريق وراها والشباب راحوا وطي في السوق
((انا اولهم))..استغفر الله..سوت زحمه في السوق..وخلاص قفلت مع العاشق((ابوالشباب))
ومادري وش سوالها وفجأه صراااااااااااخ؟؟!! كل الناس سكتوا واتجههت الانظار الى مصدر
الصرااااخ((الصواعق))الا والحمش ماسك الولد من رقبته((زاغته))وحاشره على رف العصيرات
والمحترمه تضرب فيه بالشنطه وتصايح ياحيوان ياك..((تكرمون)) طبعا رميت ابو الاغراض ومن قهري
عصبت((سبايدر مان))وتلقفت وقلت للحمش يالطيب وش الموضوع؟؟ قال وش دخلك((اف اف))
رديت:الا دخلني انا اعرف الرجال هذا((ابو الشباب)) ياسلام الحين((دخلت الحلبه))
قال الحمش:الحيوان هذا يسوي حركات وسخه واليوم والله لو اشرب من دمه مايرضيني..
دقي على الشرطه الحين يالله((يقول لجينيفر لوبز))..والله بغيت اقوله واخربها معاه
لكن ماسرع ماجوا الامن اخذوهم لمكتب الامن وانا معاهم(( مسوي خوي ابو الشباب))
والله قاعد يضربون الولد هو وحرمته وكأنه هو الوحيد اللي غلطان وهو قاعد يبكي ويترجاهم
يتنازلون وبأنه مريض وما يدري كيف سوى هذي الحركه..وهو والله واحلف عنه انه مافيه الا العافيه
لكن زله بسبب عله..وماتنازلوا ودق الامن على الشرطه وشالوه وهي راحت كملت مشوارها لكن المره هذي
العبايه صارت تطير من ورى((بات مان))..طيب ليش من اول ماسوت كذا..وش ذنب هالولد ينضرب
وينهان وتتشوه سمعته ويتبهذل بسبب وحده قليلة ادب زي هذي..حرااااااااام والله العظيم حرام الوحده تشد العبايه..طيب ليش تشد العبايه؟؟وش الهدف؟؟ابراز مفاتن؟؟ولا انها..؟؟انتشرت هذي الحركه انتشار
فضيع فين اولياء الامور؟؟فين الزوج اللي يشوف حرمته تسوي كذا بعدين يقول ليش تغازل زوجتي؟؟!!
والله يااخواني ويااخواتي اني انقهر وازعل من هذي الحركه من جد..وتجي الوحده بعدين وتسوي انها
مرررررررره مقطعه ام العفه والشرف((الكتاب يبان من عنوانه))..المشكله انه كثير مرات يكون زوجها معاها واحيان اكثر وراها!!طيب عادي عنده يعني..ولا هذا تفتح وتحضر..نفسي اعرف ليش اللي تشد العبايه تزعل لمن واحد يعاكسها؟!الله المستعان..اقسم بالله ان العفيفه الساتره لنفسها هي اللي ينعجبون فيها الناس
ويحترمونها ويدعون لها..انا عن نفسي احس ان اللي تسوي الحركه هذي بالذات..قد تخطت مرحلة
قلة الادب بمراحل كثيرة جدا..
واخيرا فلتتقي الله كل امرأه في نفسها وفي شباب المسلمين والله مالهم ذنب والله انهم ضحايا..
يارب اسألك ان تحمي زوجاتنا وبناتنا واخواتنا من كل شر وتستر عليهم وسبرهم على الصراط المستقيم.
اسف عالاطاله..بحفظ الله..
|
 |
رد مع اقتباس
